काठमाडौं । ओमानमा जारी एसिसी प्रिमियर कप क्रिकेटमा नेपाल एक खेलअगावै समूह विजेता बन्ने निश्चित भएको छ । मंगलबार भएको खेलमा साउदी अरेबिया कतारसँग पराजित भएसँगै नेपाल समूह ‘ए’को विजेता बन्ने निश्चित भएको हो । तीन खेल खेलेको नेपालको तीन जितसहित ६ अंक छ । चार खेल खेलेको कतारको चार अंक, तीन खेल खेलेको साउदी अरेबियाको दुई अंक, तीन खेल खेलेको मलेसिया र हङकङको दुई-दुई अंक छ ।
अन्तिम खेलमा नेपाल पराजित भए पनि नेपालको ६ अंक कायम रहनेछ । अर्काेतर्फ कुनै पनि टिमले जित निकाले पनि ६ अंक पुग्ने छैन । तसर्थ नेपाल एक खेलअगावै समूह विजेता बन्ने निश्चित भएको हो । नेपालले पहिलो खेलमा मलेसियालाई पाँच विकेट, दोस्रो खेलमा कतारलाई ३२ रन र तेस्रो खेलमा हङकङलाई आठ विकेटले पराजित गरेको थियो । समूह चरणको अन्तिम खेलमा नेपालले बुधबार साउदी अरेबियासँग खेल्नेछ ।
नेपालले सेमिफाइनलमा समूह ‘बी’को उपविजेतासँग खेल्नेछ । समूह ‘बी’मा सोमबार ओमानले युएईमाथि नौ विकेटको सानदार जित हात पारेको थियो । उक्त नजिताले अब ओमान समूह ‘बी’ को विजेता र युएई उपविजेताका रूपमा सेमिफाइनल खेल्ने सम्भावना बलियो छ ।
समूह ‘बी’ मा ओमान तीन खेलमा ६ अंकका साथ शीर्ष स्थानमा छ । कुवेत तीन खेलमध्ये दुईमा जित र एकमा हारसहित चार अंकका साथ दोस्रो स्थानमा छ । युएई तीन खेलमा दुईमा जित र एकमा हारसहित चार अंकका साथ तेस्रो स्थानमा छ । बहराइन तीन खेल र कम्बोडिया दुई खेलमा अंकविहीन हुँदै पुछारमा छन् ।
बुधबार ओमानले कुवेत र युएईले कम्बोडियासँग खेल्नेछन् । ओमान र युएई दुवै सहजरूपमा विजयी हुने सम्भावना छ । त्यसैले नेपाल र युएई सेमिफाइनलमा भिड्ने समीकरण देखिन्छ । बुधबार हङकङ र मलेसियाबीचको खेलमा फराकिलो जित हात पार्न सक्ने टोली सेमिफाइनलमा पुग्नेछ अथवा साउदी नेपालसँग पराजित र हङकङ झिनो अन्तरले विजयी हुँदा कतार सेमिफाइनल खेल्नेछ । सेमिफाइनल शुक्रबार, तेस्रो स्थानका लागि शनिबार र फाइनल आइतबार हुनेछ ।
प्रतियोगिता विजेताले टी-२० एसिया कप खेल्न पाउनेछ । शीर्ष तीन टोलीले एसिसी इमर्जिङ टिम्स एसिया कप पनि खेल्न पाउनेछन् ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच