काठमाडौं । सातौँ शेरबहादुर खड्का स्मृति राष्ट्रिय भलिबल प्रतियोगिता यही वैशाख १२ देखि १५ गतेसम्म आयोजना हुने भएको छ । शेरबहादुर खड्का स्मृति प्रतिष्ठानको आयोजनामा हुने प्रतियोगितामा साबिक विजेता न्यु डायमण्ड युथ स्पोर्ट्स क्लब, नेपाल पुलिस, एपिएफ, त्रिभुवन आर्मी र जावलाखेल भलिबल प्रशिक्षण केन्द्रको सहभागिता रहने प्रतिष्ठानका अध्यक्ष रञ्जन खड्काले जानकारी दिनुभयो । उहाँले प्रतियोगितामा सहभागिताका लागि तीन विभागीय, विभिन्न प्रदेश तथा क्लबलाई आमन्त्रण गरे पनि अहिलेसम्म ६ टोलीको मात्रै टुंगो लागेको आयोजित पत्रकार सम्मेलनमा जानकारी दिनुभयो ।
महिला भलिबल खेलाडीको सशक्तिकरण र क्षमता अभिवृद्धि गर्ने उद्देश्यले २०७० सालदेखि हरेक वर्ष आयोजना हुँदै आएको प्रतियोगिता नेपाल भलिबल संघको प्राविधिक सहयोगमा सञ्चालन हुनेछ । प्रतियोगितामा सहभागी टोलीलाई दुई समूहमा विभाजन गरी लिगकम नक आउटका आधारमा खेल सञ्चालन गरिने अध्यक्ष खड्काले जानकारी दिनुभयो ।
त्रिपुरेश्वरस्थित राष्ट्रिय खेलकुद परिषद्को कभर्डहलमा सञ्चालन हुने प्रतियोगिताका विजेताले चार लाख ९९ हजार रुपैयाँ नगद पुरस्कार पाउनेछ । यस्तै, उपविजेताले दुई लाख ५० हजार र तेस्रो हुने टोलीले एक लाख २५ हजार रुपैयाँ नगद पुरस्कार प्राप्त गर्नेछन् । प्रतियोगिताको सर्वोत्कृष्ट खेलाडीले ५० हजार, विधागततर्फ उत्कृष्ट हुनेले जनही २५ हजार र हरेक खेलको प्लेयर अफ दी म्याचलाई १५ हजार रुपैयाँ नगद पुरस्कार प्रदान गरिने अध्यक्ष खड्काले जानकारी दिनुभयो । यसअघिको विजेतालाई तीन लाख, उपविजेतालाई एक लाख ५० हजार र तेस्रो हुने टोलीलाई ७५ हजार नगद पुरस्कार प्रदान गरिएको थियो ।
यसैगरी, सातौँ संस्करणको उद्घाटनका अवसरमा एक जना राष्ट्रिय खेलाडीलाई नगद ५० हजार रुपैयाँसहित स्पेसल अवार्डबाट सम्मान गरिने भएको छ । बहुराष्ट्रिय पेन्ट कम्पनी केएनपी नेरोलेकको मुख्य प्रायोजनमा सञ्चालन हुने यस प्रतियोगितालाई राष्ट्रिय खेलकुद परिषद्, प्रदेश खेलकुद परिषद्, बागमती प्रदेश, विभिन्न नगरपालिका र कर्पोरेट हाउसहरूले सहयोग गरेको अध्यक्ष खड्काले जानकारी दिनुभयो ।
पत्रकार सम्मेलनमा मुख्य प्रायोजनसम्बन्धी समझौतामा हस्ताक्षरसमेत गरिएको थियो । बहुराष्ट्रिय पेन्ट कम्पनी केएनपी नेरोलेकका कन्ट्री हेड मनोज मिश्र र शेरबहादुर खड्का स्मृति प्रतिष्ठानकी संरक्षक गमली खड्काले सम्झौतापत्रमा हस्ताक्षर गर्नुभएको थियो । कार्यक्रममा नेपाल भलिबल संघका उपाध्यक्ष तया पूर्व–अन्तर्राष्ट्रिय खेलाडी भरत शाह, संघका उपाध्यक्ष भीम ओली, कोषाध्यक्ष श्याम श्रेष्ठ, अन्तर्राष्ट्रिय भलिबल रेफ्री पूर्णप्रसाद चौलागाईं र प्रतिष्ठानका पदाधिकारीको उपस्थिति थियो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच