काठमाडौं । एसिसी प्रिमियर कप-२०२४ मा नेपालले आफ्नो अपराजित यात्रा कायमै राखेको छ । बुधबार खेलिएको समूह चरणको अन्तिम खेलमा नेपालले साउदी अरबलाई ६ विकेटले हराउँदै अपराजित यात्रा कायम राखेको हो । नेपाल समूह ‘ए’ बाट सबै चार खेलमा जित्दै सेमिफाइनलमा पुगेको छ । ७४ रनको लक्ष्य नेपालले ७.२ ओभरमा चार विकेट गुमाउँदै पूरा गर्यो । नेपालको जितमा गुल्शन झाले १९ बलमा दुई चौका र दुई छक्कासहित ३२ रन बनाउनुभयो ।
त्यस्तै, कप्तान रोहित पौडेल सात बलमा एक चौका र एक छक्कासहित १६ रनमा नट आउट रहनुभयो । त्यसअघि ओपनर कुशल भुर्तेल डक, आसिफ शेख र कुशल मल्ल दुई-दुई रनमा आउट हुनुभएको थियो । एक समय २.२ ओभरमा १५-३ को अवस्थामा पुगेको नेपाललाई गुल्शन झा र दीपेन्द्रसिंह ऐरीले ३३ रनको साझेदारी गर्नुभएको थियो । ऐरीले नौ बलमा तीन चौकासहित १७ रन बनाउनुभयो । साउदीका इस्ताक अहमदले दुई, उस्मान नाजिव र वाजी उल हसनले एक-एक विकेट लिनुभयो ।
त्यसअघि अलअमरेत क्रिकेट ग्राउण्ड-२ मा टस हारेर पहिला ब्याटिङको निम्तो पाएको साउदीले आठ ओभरमा सात विकेट गुमाउँदै ७३ रन बनाएको थियो । वर्षाको कारण मैदान समयमै खेल्न तयार नहुँदा खेल आठ-आठ ओभरमा झारिएको थियो । साउदीका ओपनर अब्दुल वाहिदले १६ बलमा तीन चौका र तीन छक्कासहित सर्वाधिक ३७ बनाउनुभयो । साउदीका अन्य कुनै पनि ब्याटरले दोहोरो अंकमा रन बनाउन सकेनन् । नेपालका करण केसीले दुई ओभरमा २१ रन खर्चेर दुई विकेट लिनुभयो । अभिनाश बोहराले दुई ओभरमा १५ रन खर्चेर दुई विकेट लिनुभयो । प्रतिश जि.सी र ललित राजवंशीले एक-एक विकेट लिनुभयो ।
नेपालले यसअघि मलेसियालाई पाँच विकेट, कतारलाई ३२ रन र हङकङलाई आठ विकेटले हराएको थियो । समूह ‘ए’ बाट नेपालको जितले हङकङ उपविजेता बन्दै सेमिफाइनलमा पुगेको छ । नेपाल चार खेलमा अपराजित रहँदै आठ अंकका साथ समूह ‘ए’ बाट शीर्ष स्थानमा रहेर सेमिफाइनलमा पुगेको हो । हङकङ चार खेलमा दुईमा जित र दुईमा हारसहित चार अंकका साथ दोस्रो स्थानमा रहेर सेमिफाइनल पुग्यो । नेपालले शुक्रबार समूह ‘बी’ को उप-विजेतासँग सेमिफाइनल खेल्नेछ । प्रतियोगिताको विजेताले टी-२० एसिया कप र शीर्ष तीन टोलीले एसिसी इमर्जिङ टिम्स एसिया कप खेल्न पाउनेछन् ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच