एथलेटिक्समा एकै दिन तीन कीर्तिमान

काठमाडौं । राष्ट्रिय खेलकुद परिषद् (राखेप) द्वारा आयोजित १४औँ केन्द्रीयस्तरीय राष्ट्रपति रनिङ शिल्डअन्तर्गत एथलेटिक्सको अन्तिम दिन बिहीबार तीन नयाँ जुनियर राष्ट्रिय कीर्तिमान कायम भएको छ । त्रिपुरेश्वरस्थित दशरथ रंगशालामा सुदूरपश्चिम प्रदेशका आशिष महरले छात्र ट्रिपलजम्पमा १४.१९ मिटर जम्प गर्दै ३६ वर्षअघिको जुनियर राष्ट्रिय कीर्तिमान भंग गरी स्वर्ण चुम्नुभयो । आशिषले २०४४ सालमा धनवीर चौधरीले बनाएको १४.०६ मिटरको कीर्तिमान तोड्नुभएको हो । प्रतियोगितास्थलमै रहनुभएका धनवीरले आशिषलाई प्रोत्साहनस्वरूप नगद पनि प्रदान गर्नुभएको थियो । बागमती प्रदेशका विशाल गुरुङ दोस्रो तथा लुम्बिनी प्रदेशका विजय थारु तेस्रो हुनुभयो । सो स्पर्धाको छात्रामा लुम्बिनीकी अनिशा थारु पहिलो हुनुभयो । अनिशाले १०.५७ मिटर जम्प गर्नुभयो । सुदूरपश्चिमकी रेनुका ऐर दोस्रो तथा बागमतीकी अपेक्षा महतो तेस्रो हुनुभयो ।

छात्रा तीन हजार मिटर दौडमा सुदूरपश्चिमकी देवकीकुमारी धामीले जुनियर राष्ट्रिय कीर्तिमानसहित पहिलो हुनुभयो । देवकीले निर्धारित दूरी १० मिनेट ५२.८२ सेकेण्डमा दौड पूरा गर्दै २०७५ सालमा राममाया बुढाले स्थापित गरेको १० मिनेट ५७.२ सेकेण्डको कीर्तिमान तोड्नुभयो । लुम्बिनीकी गुञ्जा यादव दोस्रो तथा कर्णाली प्रदेशकी कल्पना बुढा तेस्रो बन्नुभयो । उक्त स्पर्धाको छात्रमा कर्णाली प्रदेशका अजय विकले स्वर्ण जित्नुभयो । उहाँले दूरी पूरा गर्न नौ मिनेट २४.२ सेकेण्ड समय लगाउनुभएको थियो । बागमतीका विश्वराम कुँवरले रजत तथा कर्णालीका अक्कल बडुवालले कांस्य हात पार्नुभयो ।

यस्तै, छात्रा चार गुणा चार सय मिटर रिलेमा भावना फर्साल, सरिता खड्का, हिमाली शाही र कृष्णा राना सम्मिलित कर्णाली टोलीले कीर्तिमानी स्वर्ण जित्यो । उक्त टोलीले निर्धारित दूरी चार मिनेट १७.२ सेकेण्डमा पार ग¥यो । यसअघि उक्त कीर्तिमान लुम्बिनीका अरुणा रिजाल, पूर्णिमा खड्का, पूजा चौधरी र करुणा रिजालको नाममा चार मिनेट २३.८ सेकेण्डको थियो । लुम्बिनी दोस्रो तथा सुदूरपश्चिम तेस्रो स्थानमा रहे । सोही स्पर्धाको छात्रमा सुदूरपश्चिम पहिलो, मधेश प्रदेश दोस्रो र बागमती प्रदेश तेस्रो बने ।

तीनदिने एथलेटिक्स प्रतियोगितामा योसहित जम्मा पाँच जुनियर राष्ट्रिय कीर्तिमान बन्यो । पहिलो दिन गण्डकीका गणेश विकले छात्र हाइजम्पमा १.८१ मिटर जम्प गर्दै जुनियर राष्ट्रिय कीर्तिमानसहित स्वर्ण जित्नुभएको थियो । दोस्रो दिन कर्णालीकी सरिता खड्काले छात्रा आठ सय मिटर दौड दुई मिनेट २८.५ सेकेण्डमा पूरा गर्दै कीर्तिमान रच्नुभएको थियो ।

बिहीबारै भएको सटपुटको छात्रमा कर्णालीका बालकुमार नकाल पहिलो हुनुभयो । उहाँले १२.९५ मिटर टाढा फाल्नुभयो । सुदूरपश्चिमका गणेश विक दोस्रो तथा लुम्बिनीका सुरज थापा तेस्रो स्थानमा रहनुभयो । सो स्पर्धाको छात्रामा सुदूरपश्चिमकी कृष्णा बम १०.५७ मिटर टाढा फाल्दै शीर्ष स्थानमा रहनुभयो । सुदूरपश्चिमकै पूजा साउदले दोस्रो तथा बागमतीकी एलिना विक तेस्रो बन्नुभयो ।

छात्रको दुई सय मिटर दौडमा मधेशका आदेशकुमार यादव पहिलो हुनुभयो । उहँले २२.८ सेकेण्ड समय खर्चनुभयो । सुदूरपश्चिमका चन्द्र बोहरा दोस्रो तथा बागमतीका सन्तबहादुर दराई तेस्रो हुनुभयो । उक्त स्पर्धाको छात्रामा कोशी प्रदेशकी आरती चौधरीले निर्धारित दूरी २८.२ सेकेण्डमा पूरा गर्दै स्वर्ण जित्नुभयो । सुदूरपश्चिमकी रितु जोशीले रजत तथा गण्डकीकी एञ्जल अधिकारीले कांस्य हात पार्नुभयो ।