आफैंले बनाएका संरचना अलपत्र पार्दै नगर सरकार

पाल्पा । पाल्पाको तानसेन नगर सरकारले आफैंले बनाएका संरचना अलपत्र छाडेको छ । नगरपालिकाले टुँडिखेल मैदान सुधारसहित ज्येष्ठ नागरिकमैत्री र बाल उद्यान निर्माण गरे पनि त्यसको संरक्षणमा ध्यान नदिई अलपत्र अवस्थामा छाडेको हो । नगरपालिकाले आर्थिक वर्ष २०७६/७७ मा टुँडिखेल सुधार योजनाअन्तर्गत टुँडिखेलमा ज्येष्ठ नागरिकमैत्री र बाल उद्यान बनाउने गरी काम अगाडि बढाएको थियो ।

योजनाअनुसार बाहिरी संरचना निर्माण भए पनि भित्री संरचना भने अझै बनेका छैनन् । बनेका संरचनाको समेत संरक्षण हुन सकेको छैन ।
टुँडिखेल मर्निङवाक, फुटबल मैदानसहित विश्राम गर्न आउने नागरिक, बालबालिका र अन्यका लागि आराम गर्न मिल्ने गरी संरचना बनाउन खोजिए पनि त्यसले पूर्ण रूपमा मूर्त रूप पाउन सकेको छैन । मैदानभित्र वस्तुभाउ छिर्न नसक्ने गरी पर्खाल, फलामको रेलिङ, बाउण्डरी वाल, फुटपाथ ब्लक र मिनी स्टेज बनाइए पनि अहिले त्यसको कुनै संरक्षण नै गरिएको छैन । अहिले पार्कभित्र हिँड्न नमिल्ने गरी घाँस उम्रिएको छ । नगरपालिकाले आफैंले निर्माण गरेको संरचनाको संरक्षणमा चासो देखाएको छैन भने योजनाअनुसारको काम नगरी त्यसै छाडेको छ । टुँडिखेलमा घाँस उम्रिएको र पानी जमेर हिलो, खाल्डाखुल्डी हुँदासमेत नगरपालिकाले त्यसको मर्मतसम्भारमा ध्यान नदिएको स्थानीयको आरोप छ ।

टुँडिखेल सुधारका लागि मोटो रकम खर्चिएको छ । नगरपालिकाका इञ्जिनियर रामप्रसाद श्रेष्ठका अनुसार उक्त योजनाका लागि करिब चार करोड २२ लाख बजेट छुट्याइएको हो । उहाँले टेण्डर भएको दुई वर्षभित्र काम सक्ने गरी काम भए पनि ढिला गरी काम सकिएको बताउनुभएको छ । इञ्जिनियर श्रेष्ठले टेण्डरअनुसारको काम सकिएको भने पनि नगरको योजनाअनुसारको काम भने भएको छैन् । ज्येष्ठ नागरिक र बाल उद्यान पार्क निर्माण भए पनि त्यसभित्रका संरचनाहरू अझै बनाइएको छैन ।

बाल उद्यानमा केटाकेहीहरू खेल्न र भुल्नका लागि बगैँचा निर्माण गर्ने भनिए पनि त्यो बनेको छैन । टुँडिखेलवरिपरि विभिन्न किसिमका फूल रोपेर सुन्दरता बढाउने भनिएको थियो । त्यो काम पनि अहिले अलपत्र छाडिएको छ ।

तानसेनवासीले पटक-पटक नगरपालिकालाई टुँडिखेलभित्र सरसफाइ गर्न आग्रह गरे पनि त्यसको बेवास्ता गरिएको छ । केही समयअघि पार्कवरपर घाँस उम्रिएर जान नसक्ने भएपछि स्थानीय अशोक महर्जन र सुरेश लिगलले घुम्न आउने स्थानीयहरूसँग सहयोग जुटाई घाँस काटेर सरसफाइ गर्नुभएको थियो । बर्खाको समय भएकाले अहिले फेरि अवस्था उस्तै भएको छ ।

नगरप्रमुख सन्तोषलाल श्रेष्ठसँग पटक-पटक भेटेर पार्कभित्र सरसफाइ गर्न आग्रह गर्दा पनि नसुनेपछि स्थानीयसँग पैसा उठाएर घाँस काट्न लगाएको स्थानीय अशोक महर्जनले बताउनुभयो । नगरप्रमुख श्रेष्ठले भन्नुभयो, ‘नगरपालिकासँग तत्काल सरसफाइका लागि पर्याप्त जनशक्ति नभएको र केही समयमा त्यो काम गर्ने भने पनि स्थानीय साथीहरूले पैसा उठाएर काम गरेको बताउनुभयो । उहाँले भन्नुभयो, ‘हामीले काम गर्छौं भन्दाभन्दै साथीहरूले सहयोग जुटाएर गर्नु भएछ, केही छैन, अब हामीहरूले पार्क सरसफाइमा ध्यान दिन्छौँ ।’

‘आफ्नो कार्यालयअगाडिको हरिबिजोग नदेख्नेले नगरको विकास गर्छ भनेर के आशा गर्नु ?,’ स्थानीय सुरेश लिगलले आक्रोश पोख्दै भन्नुभयो । आन्तरिक तथा बाहृय पर्यटकको पहिलो आँखा लाग्ने ठाउँ नै टुँडिखेल भएकाले यसको संरचना आकर्षक बनाउन नगरपालिकाको ध्यान पुग्नुपर्ने स्थानीय वसन्त सिमांगैडा बताउनुहुन्छ । टुँडिखेलमा फुटबल मैदान र पैदलमार्गको काम निवर्तमान मेयर अशोककुमार शाहीको पालामा नै ठेक्का लागेर सुरु भएको थियो । वर्तमान नगरप्रमुखको टिम आएपछि टुँडिखेलको संरचना बनाउन केही काम नभएको अमन श्रेष्ठले बताउनुभयो ।

टुँडिखेल मात्र होइन पञ्चायत कालमा बनेको वीरेन्द्र पार्कको पनि उस्तै हरिबिजोग छ । त्यहाँभित्र जान सक्ने अवस्था छैन । केही वर्षअघिसम्म चारैतिर रंगीबिरंगी गुलावको फूल फुलेका हुन्थे । त्यहाँ पुग्ने जोकोही भित्र पसेर रमाउने गर्थे । तर, पार्क अहिले शौचालय जस्तो बनेको स्थानीय सुरेन्द्रमान कर्माचार्यको गुनासो छ । पाल्पा उद्योग वाणिज्य संघको आर्थिक सहयोगमा त्यहाँ केही वर्षअघि पार्क सरसफाइ र रंगरोगन गरिएको थियो तर नगरपालिकाले त्यसलाई निरन्तरता नदिँदा अहिले नाममात्रको फूलबारी बनेको संघका अध्यक्ष शैलेन्द्र भट्टराईले बताउनुभयो । ‘तानसेन नगरपालिकाले कर उठाउँदा राजस्व पहिलाभन्दा बढेको नगर प्रमुखले कार्यक्रममा भन्ने गरेको सुनिन्छ कहाँ के कामका लागि त्यो रकम खर्च हुन्छ कहीँ देखिन्न,’ मोहन सुवालले भन्नुभयो ।

तानसेनभन्दा पछिको शहर बुटवलको आकर्षक स्थल फूलबारीले देशैभरि चर्चा पाएको छ । श्रीनगर त्योभन्दा धेरै रमणीय ठाउँ हो तर त्यसको विकास सधैं भाषणमा मात्र हुन्छ । त्यहाँ जाँदा घाँसे मैदान र प्लाष्टिक यत्रतत्र छरिएका र फुटेका सिसाबाहेक अरू केही देखिँदैन । प्रकृतिले वरदान दिएको ठाउँ तानसेन पाल्पा ढाका र करुवाले मात्र चर्चा पायो तर शहर आकर्षक बनाउने योजना न त विगतमा भयो न त अहिले नै बनेको छ । हरेक वर्ष योजना बन्छ, बजेट खर्च हुन्छ तर नगरको सुन्दरता बढाई आकर्षक बनाउने योजना कहिल्यै नभएको तानसेनवासीको गुनासो छ ।