काठमाडौं । सरकारले पारा ओलम्पिकमा नेपाललाई ऐतिहासिक कांस्य पदक दिलाउने पलेशा गोवद्र्धनसहित प्रशिक्षक र टोली व्यवस्थापकलाई नगदसहित पुरस्कृत गरेको छ । एक कार्यक्रमबीच शुक्रबार प्रधानमन्त्री केपी शर्मा ओलीले पारा तेक्वान्दो खेलमा कांस्य पदक जितेबापत पलेशालाई ६५ लाख रुपैयाँ पुरस्कार प्रदान गर्नुभएको हो ।
यस्तै, प्रशिक्षक कविराज नेगी लामालाई पाँच लाख ८५ हजार र टोली व्यवस्थापक रामचन्द्र श्रेष्ठलाई दुई लाख ९२ हजार रुपैयाँ पनि प्रदान गरिएको छ । मन्त्रिपरिषद्को यही भदौ २० गतेको निर्णयबमोजिम पलेशालाई ६५ लाख रुपैयाँ पुरस्कार राशिमा कर नकटाई पुरस्कृत गरिएको हो ।
कार्यक्रममा प्रधानमन्त्री ओलीले खेलमा विजय हासिल गरेपछि खेल क्षेत्रको उत्साह कायम राख्न छिटो–छिटो पुरस्कार दिने र राशिमा कर नकटाउने नीति लिइएको बताउनुभयो । उहाँले आगामी विश्वस्तरका खेलमा नेपालले थप सफलता पाउने विश्वास व्यक्त गर्दै पलेशाले हासिल गरेको सफलता नेपालकै अहिलेसम्मको ठूलो पदक भएकाले देशले गौरव गरेको बताउनुभयो ।
कार्यक्रममा युवा तथा खेलकुदमन्त्री तेजुलाल चौधरी, सचिव सुमनराज अर्याल, राष्ट्रिय खेलकुद परिषद्का सदस्य-सचिव टंकलाल घिसिङ, नेपाल तेक्वान्दो संघका पदाधिकारीलगायत सहभागी हुनुहुन्थ्यो ।
महिला उद्यमीद्वारा सम्मानित
महिला उद्यमी महासंघ नेपालले पारा तेक्वान्दोकी ऐतिहासिक पदक विजेता पलेशा गोवद्र्धनलाई सम्मान गरेको छ । महासंघले आफ्नो २१औँ वार्षिक साधारणसभाका अवसरमा पलेशालाई ५० हजार पाँच सय रुपैयाँसहित सम्मान गरेको हो ।
उद्योग, वाणिज्य तथा आपूर्ति मन्त्रालयका सचिव कृष्णबहादुर राउत र महासंघकी अध्यक्ष शोभा ज्ञवालीले पलेशालाई सम्मानपत्र र नगद पुरस्कारसहित सम्मान गर्नुभएको थियो ।
सम्मानपछि पलेशाले प्रतिस्पर्धामा लड्नभन्दा अगाडि समाजसँग लड्न आफूले धेरै चुनौतीको सामना गर्नुपरेको उल्लेख गर्दै आफूमा आत्मविश्वास र दृढ संकल्प भए हरेक अप्ठ्यारा परिस्थिति पार गर्न सकिने बताउनुभयो ।
महिला उद्यमीबाट सम्मान पाउँदा आफूलाई धेरै गर्विलो महसुस भएको उहाँको भनाइ थियो । उक्त कार्यक्रममा पलेशाका पिता प्रदीप गोवद्र्धनलाई पनि सम्मान गरिएको थियो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच