काठमाडौं । सत्तारूढ नेपाली कांग्रेसले आगामी मंसिर १६ गते हुने स्थानीय तहको उपनिर्वाचन केन्द्रित तयारी थाल्ने भएको छ । उपनिर्वाचनको तयारी गर्न कांग्रेस सभापति शेरबहादुर देउवाले आज (आइतबार) केन्द्रीय कार्यसम्पादन समितिको बैठक बोलाउनुभएको छ । बैठकले उपनिर्वाचनको तयारीबारे विभिन्न निर्णय लिने कांग्रेस प्रचार विभागका प्रमुख मीन विश्वकर्माले जानकारी दिनुभयो ।
निर्वाचन आयोगले स्थानीय तहको उपनिर्वाचनमा भाग लिन चाहने राजनीतिक दलहरूलाई दल दर्ता गर्न आहृवान गरिसकेको छ । निर्वाचन कार्यक्रमअनुसार दल दर्ता गर्न असोज १० गतेदेखि १६ गतेसम्मको समय दिइएको छ । तत्कालै दल दर्ता गर्नुपर्ने भएकाले कांग्रेसले केन्द्रीय कार्यसम्पादन समितिमार्फत आवश्यक निर्णय लिन लागेको हो । बैठकमा उम्मेदवार सिफारिश प्रक्रिया, उम्मेदवार छनोटको मापदण्ड, उम्मेदवारलाई आधिकारिक पत्र दिने अधिकार प्रत्यायोजन लगायतका विषयमा छलफल हुने प्रचार विभाग प्रमुख विश्वकर्माले बताउनुभयो । ‘कार्यसम्पादन समितिको मुख्य एजेण्डा स्थानीय तहको निर्वाचन केन्द्रित हुनेछ । स्थानीय उपनिर्वाचनमा कसरी पार्टीलाई सफल बनाउने भन्नेमा केन्द्रित रहन्छौँ । उम्मेदवारको योग्यता, सिफारिश विधि र मापदण्डबारे पनि छलफल हुनेछ’, उहाँले हिमालय टाइम्ससँग भन्नुभयो । निर्वाचनका लागि कांग्रेस जुनसुकै बेला तयार रहने भए पनि उपनिर्वाचनका प्राविधिक तयारीहरू सम्पन्न गर्न कार्यसम्पादन समिति बैठकले आवश्यक निर्णयहरू लिने उहाँले बताउनुभयो ।
कांग्रेसले जितेका दुई जिल्ला समन्वय समितिको प्रमुख पद रिक्त रहेका छन् । त्यस्तै कांग्रेसबाट निर्वाचित कीर्तिपुर नगरपालिकाका प्रमुख राजकुमार नकर्मीको निधनपश्चात सो पदपनि रिक्त छ । दुई गाउँपालिका अध्यक्ष र १६ वडा अध्यक्ष पनि कांग्रेसबाट निर्वाचित जनप्रतिनिधिको निधनका कारण रिक्त रहेको छ । कांग्रेसले आफूले विगतमा जितेका पदहरू जोगाउने र अन्यत्र थप गर्ने योजनाका साथ तयारी गर्ने जनाएको छ । ‘स्थानीय तहको उपनिर्वाचन थोरै स्थानमा हुँदै गरेको भएपनि ताजा जनादेशको विशेष अर्थ हुन्छ । कांग्रेस उपनिर्वाचन जितेर आफ्नो सान्दर्भिकता अझ बढाउने गरी तयारी गर्नेछ’, कार्यसम्पादन समिति सदस्य एवं पूर्व महामन्त्री डा.शशांक कोइरालाले बताउनुभयो । उहाँले स्थानीय तहमा लोकप्रिय, युवा र जुझारु उम्मेदवारलाई कांग्रेसले यसपटक प्राथमिकता दिने उल्लेख गर्नुभयो ।
निर्वाचन आयोगले रिक्त रहेका स्थानीय तहका पदहरूका लागि आगामि मंसिर २ गते उम्मेदवारी दर्ता गराउँदै छ । कांग्रेसले असोज ७ गतेदेखि नै पुस १६ गतेसम्मका लागि सय दिने विशेष अभियान सुरु गरिसकेको छ । ७७ वटै जिल्लामा सो अभियान सञ्चालन हुने भएपनि स्थानीय तहको उपनिर्वाचन हुने जिल्लाहरूमा अझ प्राथमिकताका साथ अभियान केन्द्रीत गरिने कांग्रेसले जनाएको छ ।
कोजाग्रतमा चियापान
कांग्रेसले विगतमा झै यो वर्षपनि कोजाग्रत पूर्णिमाको दिन चियापान समारोह आयोजना गर्ने भएको छ । २०३३ सालमा मेलमिलापको नीति लिएर नेपाल फर्केपछि वीपी कोइरालाले हरेक वर्ष कोजाग्रत पूर्णिमाको दिन चियापान कार्यक्रम आयोजना गर्ने थालनी गर्नुभएको थियो । त्यसयता गम्भीर शोक बाहेकका वर्षमा कांग्रेसले चियापान आयोजना गर्दै आएको छ । प्रचार विभाग प्रमुख विश्वकर्माले यसवर्षको चियापानलाई भव्य र सभ्य बनाउने सन्दर्भमा पनि केन्द्रीय कार्यसम्पादन समितिले आवश्यक निर्णय लिने बताउनुभयो । चियापानमा प्रमुख राजनीतिक दलका नेताहरू, कुटनीतिक नियोगका प्रमुख एवं प्रतिनिधीहरू, सार्वजनिक क्षेत्रका हस्तीहरू, कलाकार, खेलाडी एवं समाजका लब्ध प्रतिष्ठित व्यक्तित्वहरूको उपस्थिति रहने कांग्रेसले जनाएको छ । चियापानले राष्ट्रिय राजनीतिमा शान्ति, एकता र मेलमिलापको सन्देश प्रवाह गर्ने कांग्रेसको दावी छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच