पाल्पामा पहिरोका कारण ३४ घर जोखिममा

रामचन्द्र रायमाझी पाल्पा, संवाददाता

१३ आश्विन २०८१, आइतबार २०:१७

Read Time = 3 mins

डिजिटल संस्करण

प्रदेश समाचार

लुम्बिनी प्रदेश

A A- A+

पाल्पा । विहीबारदेखि परेको निरन्तर अविरल वर्षाका कारण पहिरो जाँदा पाल्पामा ३४ घर जोखिममा रहेका छन् । यहाँका तानसेन र रम्भा गाउँपालिकाका विभिन्न स्थानमा गएको पहिरोका कारण उक्त संख्यामा घर जोखिममा रहेका हुन् ।

तानसेनमा १४ र रम्भामा २० घर जोखिममा रहेका छन् । रम्भा गाउँपालिका– ३, अगाहाखोलामा माथिबाट झरेको पहिरोका कारण सिंगो बजार जोखिममा परेको छ । शनिबार दिउँसो गएको पहिरोले यहाँको बजार क्षेत्रको वस्ती नै जोखिममा परेका हो ।

पहिरोका कारण अहिलेसम्म यहाँका २० घर परिवार विस्थापित भएका छन् । जोखिममा परेका घर परिवारलाई सुरक्षित स्थानमा स्थान्तरण गरिएको गाउँपालिकाका अध्यक्ष विष्णु भण्डारीले बताउनुभयो । पहिरोले यहाँका घरहरुमा भेल र लेदो पसेको छ । ठूला–ठूला ढुँगासहितको पहिरो खस्दा बर्तुङ–राम्दी खण्ड समेत लामो समय अवरुद्ध हुन पुुग्यो । बन्द भएको सडक शनिबार राती अवेरसम्म पहिरो सफा गरे पछि एकतर्फी सुचारु भएको अध्यक्ष भण्डारीले बताउनुभयो । उहाँका अनुसार पहिरोका कारण सडक छेवैमा पार्किङ्ग गरेर राखिएको गाडी समेत पुरिएको थियो । पुरिएको गाडीलाई अहिले बाहिर निकालिएको छ ।

यस्तै तानसेन नगरपालिका–५ कैलाशनगरस्थित देउराली नजिकै सुकुम्वासी वस्तिमा पहिरो गएको छ । वस्तीको तल्लो भाग सडक छेउबाट झरेको पहिरोले यहाँका १४ वटा घरहरु जोखिममा परेका छन् । जोखिम न्युनिकरणका लागि वडा कार्यालयको पहलमा प्लाष्टिक र त्रिपाल लगाइएको छ । घर जोखिममा रहेका स्थानीयहरुलाई सतर्कता अपनाउन आग्रह गरिएको वडा कार्यालयले जनाएको छ । अविरल वर्षाका कारण जिल्लाका विभिन्न स्थानमा पहिरो जानुको साथै सडक अवरुद्ध भएका छन् । ठूलो स्केलमा झरेको पहिरोका कारण तानसेन– रिडी सडक खण्डको वनदेवी जनिकैको सडक समेत शनिवार केही समयका लागि बन्द भएको थियो । वर्षाका कारण अन्य ठाउँमा भएका क्षतिको विवरण आउन बाँकी रहेको जिल्ला प्रहरी कार्यालयले जनाएको छ ।

सरोकार

यो खबर पढेर तपाईलाई कस्तो महसुस भयो ?