काठमाडौं । सहकारी ठगी र संगठित अपराधमा अनुसन्धानका लागि पक्राउ पर्नुभएका पूर्व-उपप्रधान तथा गृहमन्त्री एवं राष्ट्रिय स्वतन्त्र पार्टी (रास्वपा) का सभापति रवि लामिछानेलाई कास्की जिल्ला अदालतले ६ दिन हिरासतमा राख्न अनुमति दिएको छ । जिल्ला अदालत कास्कीका न्यायाधीश नवराज दाहालको इजलासले आइतबार लामिछानेलाई ६ दिन हिरासतमा राखेर अनुसन्धान गर्न अनुमति दिएको अदालतका सूचना अधिकारी सुरज अधिकारीले जानकारी दिनुभयो । दाहाल कास्की जिल्ला अदालतका १ नम्बर न्यायाधीश हुनुहुन्छ । आइतबारको बहसमा जिल्ला सरकारी वकिल कार्यालयका न्यायाधिवक्ता कमला काफ्ले, सहायक जिल्ला न्यायायधिवक्ता शान्तिदेवी शर्मा, विपिनराज तिवारी र पीडितका तर्फबाट वेदबहादुर विष्टले अनुसन्धानका लागि ६ दिनको म्याद थप गर्न माग गर्नुभएको थियो । लामिछानेका तर्फबाट वरिष्ठ अधिवक्ताहरू सुशील पन्त र नारायण घिमिरेले बहस गर्नुभएको थियो ।
जिल्ला अदालत कास्कीको पक्राउ पुर्जी जारी भएसँगै शुक्रबार प्रहरीको केन्द्रीय अनुसन्धान ब्युरो (सिआइबी) ले लामिछानेलाई काठमाडौंबाट पक्राउ गरेको थियो । उहाँलाई स्थलमार्ग हुँदै शनिबार बिहान पौन ३ बजे पोखरा लगिएको थियो । शनिबार सार्वजनिक बिदा परेकाले लामिछानेलाई आइतबार मात्रै अदालतमा पेस गरिएको थियो । अदालतले शुक्रबार लामिछानेसहित १४ जनाविरुद्ध पक्राउ पुर्जी जारी गरेको थियो । तर, रविबाहेक अरू पक्राउ परेका छैनन् ।
यसअघि कास्की प्रहरीको टोलीले काठमाडौं गएर जोशीसँग भदौ ८ मा र लामिछानेसँग भदौ १० मा बयान कागज गराएको थियो । संसदीय समितिको प्रतिवेदन आएपछि असोज ६ मा गोर्खा मिडियाका पूर्व-उपाध्यक्ष छविलाल जोशी काठमाडौंको शंखमूलबाट पक्राउ पर्नुभएको थियो । जोशीविरुद्ध अनुसन्धान गर्न कास्की जिल्ला अदालतले शुक्रबार २० दिनको म्याद थप गरिसकेको छ । जोशीले सहकारीबाट रकम ल्याएर गोर्खा मिडियामार्फत अपचलन गर्ने कार्यमा जिबी राई, लामिछानेलगायत संलग्न रहेको भन्दै आफू निर्दोष रहेको जिकिर गर्नुभएको छ । पोखराको सूर्यदर्शन सहकारीको बचत हिनामिनामा संलग्न रहेको आरोपमा हालसम्म ६० जनालाई प्रतिवादी बनाइएको छ । त्यसमध्ये सात जनालाई अदालतबाट अनुमति लिएर र दुई जनालाई जरुरी पक्राउ पुर्जी दिएर नियन्त्रणमा लिइएको थियो । यसअघि पक्राउ परेर मुद्दा चलाइएका मध्ये ६ जना पुर्पक्षका लागि हिरासतमा छन् । जिल्ला प्रहरी कार्यालय कास्कीका प्रवक्ता डिएसपी वसन्तकुमार शर्माले रविविरुद्ध पूरक मुद्दाका लागि अनुसन्धान अगाडि बढाएको जानकारी दिँदै भन्नुभयो, ‘हामीले पूरक मुद्दा लैजान अनुसन्धान अगाडि बढाएका हौं । यसअघि पक्राउ परेका छविलाल जोशीसँगै जोडेर लैजाने हो ।’
नेकपा एमालेका सांसद सूर्य थापाको संयोजकत्वमा गठन भएको सहकारी रकम अपचलनसम्बन्धी संसदीय छानविन विशेष समितिको प्रतिवेदनले गोर्खा मिडिया नेटवर्कका तत्कालीन प्रबन्ध निर्देशक लामिछाने, अध्यक्ष जिबी राई, तत्कालीन उपाध्यक्ष तथा नेपाल प्रहरीका पूर्वनायव महानिरीक्षक (डिआइजी) छविलाल जोशी र सञ्चालक कुमार रम्तेलविरुद्ध ठगी, किर्ते, संगठित अपराध र सम्पत्ति शुद्धीकरणसम्बन्धी कसुर आकर्षित हुनेगरी अनुसन्धान गर्न सिफारिश गरेको थियो । संसदीय समितिको प्रतिवेदनको परिच्छेद ८ मा सहकारी ठगी प्रकरण सहकारी ऐन २०७४, मुलुकी अपराध संहिताको किर्तेसम्बन्धी दफा, संगठित अपराध निवारण ऐन २०७० र सम्पत्ति शुद्धीकरण (मनी लाउण्डरिङ) निवारण ऐन २०६४ का कानुन आकर्षित हुने उल्लेख छ । जिबी अध्यक्ष र लामिछाने प्रबन्ध निर्देशक रहेको गोर्खा मिडिया नेटवर्कमा पोखराको सूर्यदर्शन, बुटवलको सुप्रिम, काठमाडौंको स्वर्णलक्ष्मी र चितवनको साहारा सहकारीका करिब ५० हजार सर्वसाधारणले बचत गरेको रकम सारिएको थियो । ती सहकारीबाट गोर्खा मिडियामा मात्र ६५ करोड ५४ लाख रुपैयाँ ल्याइएको थियो । लामिछानेले गोर्खा मिडियामा १५ प्रतिशत ‘स्वेट सेयर’ लिएर प्रवेश गरेको र निस्कँदा त्यो सेयर कम्पनीलाई नै फिर्ता गरेको दाबी गरेका थिए । तर, यो रकम ‘स्वेट सेयर’ नभई सहकारीको रकम भएको र उनी कम्पनीबाट बाहिरिने क्रममा पैसा लिन बुझाएका कागजातमा पनि किर्ते गरिएको प्रतिवेदनमा उल्लेख छ ।
रास्वपाको प्रदर्शनमाथि पानीको फोहोरा र अश्रुग्यास
सहकारी ठगी प्रकरणमा पक्राउ पर्नुभएका रवि लामिछानेको समर्थनमा उत्रिएका रास्वपा कार्यकर्तामाथि पोखरामा प्रहरीले हस्तक्षेप गरेको छ । नाराबाजीसहित भिड अनियन्त्रित हुन थालेपछि प्रहरीले पानीको फोहोरा र अश्रुग्यास प्रहार गरेको हो । पानीको फोहोरा र अश्रुग्यास हानेपछि आन्दोलित पक्ष तितरबितर भएका थिए । निषेधित क्षेत्रमा पसेर प्रदर्शन गरेपछि प्रहरीसँग धकेलाधकेलसमेत भएको थियो । यद्यपि, रास्वपाका कार्यकर्ताले निषेधित छोड्न मानेनन् । अटेरी गरे थप बल प्रयोग गर्न बाध्य हुने प्रहरीले चेतावनी दिए पनि निषेधित क्षेत्रमा प्रदर्शन जारी राखेपछि प्रहरीले प्रदर्शनकारीमाथि पानीको फोहोरा र अश्रुग्यास प्रहार गरेको हो । यसैबीच, रास्वपाका सभापति रवि लामिछानेको समर्थनमा पोखरामा गरिएको प्रदर्शनका क्रममा एक महिला पक्राउ परेकी छन् । उनले कोही सहकारीपीडित नभएको भन्दै गालीगलौज गरिरहेका बेला प्रहरीले नियन्त्रणमा लिएको जनाएको छ ।
हरेक जिल्लाबाट कम्तीमा सयजना पोखरा पुग्न सर्कुलर
रास्वपाले प्रत्येक जिल्लाबाट सय जनाको दरले कार्यकर्ता पोखरा पुग्न निर्देशन जारी गरेको छ । सभापति लामिछाने पक्राउ परेपछि विरोधका लागि रास्वपाले नेता कार्यकर्तालाई पोखरा उतारेको छ । केन्द्रीय सचिवालयको निर्देशनअनुसार प्रदेश कमिटीले मातहतमा सन्देश प्रवाह गरेका छन् । शनिबार मध्यरातमा मातहतका पार्टी संरचनालाई म्यासेज गरेर जतिसक्दो कम्तीमा सय जनाको दरले पोखरा पुग्न भनिएको छ । मध्यरातमा प्रसारित सन्देशमा भनिएको छ, ‘जतिसक्दो छिटो कम्तीमा प्रत्येक जिल्लाबाट सय जनाको दरले पोखरामा मास उतार्नुपर्ने भन्ने केन्द्रीय पार्टी सचिवालयको निर्देशन भर्खर ११ः३० मा सूचना प्राप्त भएकाले जिल्ला केन्द्रित कार्यक्रममा भन्दा पोखरा उपस्थित हुन हार्दिक अनुरोध गरिन्छ ।’ कार्यकर्तालाई पठाइएको सन्देशमा त्यसैले सक्दो छिटो पोखरा ‘मुभ’ हुन आग्रह गरिएको छ ।
ओलीको सरकार रहिरहने हो भने देशले धेरै दुःख पाउँछ : लामिछाने
कास्की जिल्ला प्रहरीको हिरासतमा रहनुभएका रास्वपा सभापति रवि लामिछानेले देशको सबैभन्दा ठूलो भ्रष्टाचारी प्रधानमन्त्रीसमेत रहनुभएका नेकपा एमालेका अध्यक्ष केपी शर्मा ओली भएको आरोप लगाउनुभएको छ । आइतबार जिल्ला अदालत कास्कीमा म्याद थपका लागि प्रवेश गर्नुअघि सभापति लामिछानेले नेकपा एमालेका अध्यक्ष ओली सत्तामा रहुञ्जेल देशले धेरै दुःख पाउनेसमेत दाबी गर्नुभएको छ । म्याद थपका लागि अदालत प्रवेश गर्नुअघि सञ्चारकर्मीसँग लामिछानेले भन्नुभयो, ‘केपी ओलीको सरकार रहिरहने हो भने यो देशले धेरै दुःख पाउँछ । त्यसकारण यो अधिनायकवादी सरकारका विरुद्धमा देशैभरीबाट जो जो जहाँ जहाँ हुनुहुन्छ, मेरो लागि होइन देशका लागि बाहिर निस्कनुपर्ने बेला आउन सक्छ । म सबैलाई अपिल गर्न चाहन्छु । यो सरकार रहुञ्जेलसम्म यस्तै हर्कत गरिराख्छ उसले । झुटा मुद्दामा मान्छेलाई फसाउने काम निरन्तर चलिरहन्छ ।’ आफूलाई जस्तै छानविन ओलीलाई गर्ने हो भने सबैभन्दा बढी भ्रष्टाचारको जगमा उभिएको फेला पर्ने दाबी गर्दै लामिछानेले भन्नुभयो, ‘भ्रष्टाचारीलाई संरक्षण गरेर, सारा सहकारी पीडितहरू आफ्नो पार्टीभित्र पालेर, भ्रष्टाचारको जगमा उभिएर अर्कालाई ठग भनेर झुटा मुद्दा लगाउने हो भने, मलाईजस्तै डेढ वर्ष लगाएर केपी ओलीलाई छानविन गर्ने हो भने सबैभन्दा बढी भ्रष्टाचारको जगमा उभिएको मान्छे केपी ओली हो । देशको प्रधानमन्त्री हुनुमा दुर्भाग्य छ ।’ न्याय प्रक्रियालाई सघाउन आफू पोखरा आएको उहाँको दाबी छ ।
रवि पक्राउ सही छ, निष्पक्ष छानविन होस् : राष्ट्रिय जनमोर्चा
राष्ट्रिय जनमोर्चाले सहकारी ठगी प्रकरणमा राष्ट्रिय स्वतन्त्र पार्टीका सभापति रवि लामिछाने पक्राउ पर्नु सही भएको बताएको छ । अध्यक्ष चित्रबहादुर केसीले आइतबार एक विज्ञप्ति जारी गरी विभिन्न सहकारीको रकम अपचलनमा नाम जोडिएकाले रविमाथि अनुसन्धान हुनु सही भएको उल्लेख गर्दै भनेको छ, ‘सहकारी ठगीमा रवि लामिछानेमाथि अनुसन्धान गर्न गरिएको गिरफ्तारी सामान्यतया सही नै छ । रविमाथि कुनै राजनीतिक पूर्वाग्रहका आधारमा नभएर सत्य र तथ्यको आधारमा निष्पक्ष छानविन गरेर कारबाही गरिनु पर्दछ ।’
संसदीय समितिले दिएको प्रतिवेदन कार्यान्वयन सुरु भयो : प्रवक्ता गुरुङ
सरकारका प्रवक्तासमेत रहनुभएका सञ्चार तथा सूचना प्रविधिमन्त्री पृथ्वी सुब्बा गुरुङले सहकारी संस्था बचत रकम दुरुपयोग सम्बन्धमा संसदीय छानविन विशेष समितिको प्रतिवेदनका आधारमा कारबाही सुरु भएको बताउनुभएको छ । आइतबार मन्त्रिपरिषद् बैठकका निर्णय सुनाउने क्रममा मन्त्री गुरुङले सरकारले समितिले बुझाएको प्रतिवेदनउपर सुरुवाती कारबाही सुरु गरेको बताउनुभएको हो । उहाँले संसदीय समितिले बुझाएको प्रतिवेदनउपर सरकारले आवश्यक थप अनुसन्धानसँगै कारबाही अघि बढाएको जानकारी दिँदै भन्नुभयो, ‘त्यो प्रतिवेदनले औँल्याएका व्यक्तिहरूलाई अनुसन्धानमा लिने क्रम सुरु भएको मात्र हो । जोजो व्यक्ति तोकिएको छ, सबैमाथि (छानविन) हुन्छ ।’ मन्त्री गुरुङले सरकारले सर्वदलीय संसदीय समितिको प्रतिवेदनले कारबाही गर भनेका व्यक्तिहरूलाई पक्राउ गरेर कारबाही थालिएको स्पष्ट पार्नुभयो ।
पोखरामा सहकारी पीडितको प्रदर्शन
रास्वपाका नेता तथा कार्यकर्ताहरूले पार्टी सभापति रवि लामिछाने पक्राउको विरोधमा प्रदर्शन गरिरहेको बेला सहकारी पीडितहरूले पनि प्रदर्शन सुरु गरेका छन् । पीडितहरूले आइतबार पोखरा महानगरपालिका-१७ मुस्ताङचोकमा प्रदर्शन गरेका हुन् । यसअघि राष्ट्र बैंक चोकमा प्रदर्शन गर्ने तयारी गरे पनि जिल्ला प्रशासन कार्यालय कास्कीले निषेधाज्ञा जारी गरेपछि उनीहरूले मुस्ताङ चोकमा प्रदर्शन गरेका हुन् ।
सूर्यदर्शन बचत पीडित संघर्ष तथा तदर्थ समिति/सहकारी बचत पीडित संघ कास्कीको आयोजनामा प्रदर्शन गरिएको हो । गोर्खा मिडिया प्रालिमा दुरुपयोग भएको बचत रकम तुरुन्त फिर्ता गर्न उनीहरूको माग छ । गोर्खा मिडिया प्रालिका सञ्चालकका विषयमा निष्पक्ष छानविन गर्नसमेत उनीहरूको माग गरेका छन् ।
पोखराका विभिन्न क्षेत्रमा निषेधाज्ञा
जिल्ला प्रशासन कार्यालय कास्कीले पोखराका केही क्षेत्रमा निषेधाज्ञा जारी गरेको छ । प्रमुख जिल्ला अधिकारी भरतमणि पाण्डेले प्रदर्शन, जुलुस, हुलदंगा तथा झडप हुनसक्ने भन्दै निषेधाज्ञा आदेश जारी गर्नुभएको हो । आइतबार बिहान पौने १२ बजेदेखि अर्को आदेश नभएसम्मका लागि पोखरा महानगरपालिकाका विभिन्न क्षेत्रमा निषेधाज्ञा जारी भएको छ । निषेधाज्ञा जारी गरिएको क्षेत्रमा पाँच जनाभन्दा बढी व्यक्ति भेला हुन रोक लगाइएको छ । त्यस्तै, अनशन, धर्ना, घेराउ, जुलुस, प्रदर्शन तथा सभा जस्ता विरोधका कार्यक्रम गर्नसमेत निषेध गरिएको छ । उक्त अवधिमा यस आदेशको उल्लंघन गर्ने जोसुकैउपर प्रचलित कानुनबमोजिम कारबाही हुने आदेशमा उल्लेख छ । शहीदचोक आसपास र गैह्रापाटन आसपास क्षेत्रमा निषेधाज्ञा जारी भएको हो ।
अपराध गरे कानुनअनुसार कारबाही हुन्छ : गृहमन्त्री लेखक
गृहमन्त्री रमेश लेखकले संयमित भएर काम गर्न नेपाल प्रहरीलाई निर्देशन दिनुभएको छ । प्रहरीले संयमित, सरल, सहज, इमानदार भएर आम नागरिकको सेवा प्रदान गर्ने काम गर्नुपर्ने गृहमन्त्री लेखकको भनाइ थियो । आफूले गल्ती गर्ने, अनि प्रहरीसँग जाइलाग्ने, झगडा गर्ने वा आफूले भनेको ठीक हो भन्न ढंगले कसैले पनि अघि बढ्न नहुने गृहमन्त्री लेखकले स्पष्ट पार्नुभयो । आइतबार काठमाडौं उपत्यका ट्राफिक कार्यालयमा ट्राफिक ‘भ्वाइलेन्स रेकर्ड सिष्टम’ को सुरुआत गर्दै गृहमन्त्री लेखकले भन्नुभयो, ‘अन्याय गरेको छ, अपराध गरेको छ भने देशको कानुनले, पद्धतिले, प्रक्रियाले त्यसको अनुसन्धान हुन्छ, छानविन हुन्छ । हेर्नुपर्ने निकायहरूले हेर्दछन् ।’
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच