सर्लाही । उत्पादनदेखि बजारसम्म जोड्ने उद्देश्यका साथ सर्लाहीको ईश्वरपुरमा खाद्य बैंकको स्थापना हुने भएको छ । खाद्य बैंकले किसानद्वारा उत्पादित खाद्यान्न तथा तरकारी बाली भण्डारण गरी बजारसम्म पुर्याउने लक्ष्य राखेको छ । जसबाट किसानलाई फाइदा पुग्ने विश्वास लिइएको छ ।
कृषकको आलीदेखि उपभोक्ताको थालीसम्म भन्ने मूल नारासहित खाद्य बैंकले ईश्वरपुरमा आफ्नो शाखा विस्तार गर्न लागेको खाद्य बैंकका कार्यकारी अध्यक्ष शंकरनाथ उप्रेतीले बताउनुभयो । मधेश प्रदेशभरि कार्यक्षेत्र बनाएको खाद्य बैंकले पहिलो चरणमा ईश्वरपुर आसपासका क्षेत्रमा खाद्यान्न, माछा, तरकारी तथा फलफूलको बजारीकरण गर्ने र किसानद्वारा उत्पादित कृषि उपज खरिद तथा मूल्य निर्धारणका साथै बजारको सुनिश्चितताका लागि बैंकले काम गर्ने उहाँको भनाइ थियो । उप्रेतीका अनुसार रैथाने बालीनाली संरक्षण गर्दै विषादीमुक्त खाद्यान्नको बजारीकरण गरिनेछ । खाद्य बैंकमा विषयगत विज्ञ रहेको जनाउँदै बैंकले माछाका दाना, कुखुराको दानालगायत पनि उत्पादन गर्ने र सर्वसुलभ दरमा किसानलाई बिक्रीवितरण गर्ने उहाँले बताउनुभयो ।
किसानद्वारा उत्पादित तरकारी, फलफूल तथा माछा बिग्रन नदिन कोल्डस्टोरको समेत व्यवस्थापन भइरहेको छ । खाद्य बैंक स्थापनापछि कृषि उपजमा बिचौलियाको रजगज समाप्त हुने र किसान लाभान्वित हुने भक्तिपुरका किसान पुरुषोत्तम बडालले दाबी गर्नुभयो । उहाँले भन्नुभयो, ‘अहिले किसान बिचौलियाबाट नै प्रभावित छन्, खाद्य बैंक स्थापनापछि सोझै किसानको खाद्यान्न खरिद गरी उपभोक्तालाई बेच्दा बिचौलियाको रजगज हट्छ । यसले किसान र उपभोक्ता दुवैलाई फाइदा पुग्छ ।’
खाद्य बैंक स्थापनाका लागि ईश्वरपुर नगरपालिकाले सहयोग तथा सहजीकरण गरिरहेको छ । किसानलाई फाइदा पुगोस् भन्ने उद्देश्यका साथ नगरपालिकाले बैंक स्थापनाका लागि जग्गा खरिद तथा कार्यालय सञ्चालनमा सहयोग गरिरहेको नगर प्रमुख मनोजकुमार आचार्यले जानकारी दिनुभयो । बैंक स्थापनापछि यस क्षेत्रका किसानलाई फाइदा पुग्ने उहाँको भनाइ थियो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच