अर्घाखाँचीमा उद्यमीका समस्या समाधानको खोजी

अविजित पन्थी

२१ पौष २०८१, आइतबार १८:४३

Read Time = 3 mins

डिजिटल संस्करण

प्रदेश समाचार

लुम्बिनी प्रदेश

A A- A+

अर्घाखाँची। कोरोना महामारीपछि व्यापार व्यवसायमा परेको गहिरो प्रभाव र त्यसको समाधानका उपायबारे अर्घाखाँचीमा व्यापक छलफल भएको छ। घरेलु तथा साना उद्योग कार्यालय, अर्घाखाँचीद्वारा आयोजित "उद्यमीलाई व्यवसायिक योजना तयारी र ऋण प्राप्ति प्रक्रिया सहज बनाउने" कार्यक्रमले जिल्लाका साना र मझौला व्यवसायीहरूको समस्या उजागर गर्दै समाधानका लागि सम्भावना खोज्ने प्रयास गरेको छ।

जिल्ला समन्वय समिति अर्घाखाँचीका सभापति जीवनारायण कोइरालाले बैंकहरूद्वारा ऋण प्रवाहमा देखिएको असहजतालाई मुख्य समस्या भन्दै साना उद्यमीहरूको पहुँचमा सहजता ल्याउनुपर्ने आवश्यकता औँल्याउनुभयो। "साना व्यवसायीले अझै पनि आर्थिक सहयोगका लागि कठिनाइ झेलिरहेका छन्। बैंकहरूले प्रभावकारी नीति नल्याउँदासम्म व्यापारिक समस्या समाधान कठिन हुनेछ," कोइरालाले भन्नुभयो।

कार्यक्रमका प्रमुख जिल्ला अधिकारी बाबुराम अर्यालले साना उद्यमीहरूको सशक्तीकरणले मात्र जिल्लाको व्यापारिक गतिविधि पुनः सन्तुलनमा आउने बताउनुभयो। नगरपालिकाका शाखा अधिकृत मन्जु खनाल, वडा नं. १ का कार्यवाहक अध्यक्ष सुन्तली श्रेष्ठ, र नेपाल पत्रकार महासंघका अध्यक्ष गणेश खनालले पनि साना व्यवसायीहरूलाई सहयोग गर्नुपर्नेमा जोड दिनुभयो।

कार्यक्रमको अध्यक्षता घरेलु कार्यालय प्रमुख दुर्गा न्यौपानेले गर्नुभएको थियो। सञ्चालन हुमबहादुर विकले र स्वागत मन्तव्य अरुणकुमार सिंहले गर्नुभएको थियो।

नविल बैंकका प्रबन्धक डोलराज न्यौपाने र कृषि विकास बैंकका कर्जा अधिकृत विष्णुप्रसाद घिमिरेले कर्जा प्राप्ति प्रक्रियामा सहजीकरण गर्दै व्यवसायिक योजना निर्माणमा आवश्यक कदमबारे प्रस्ट्याउनुभयो।

उद्यमीहरूको समस्या समाधानका लागि यस्ता छलफलले गहन असर पार्ने सहभागीहरूको विश्वास छ। "व्यवसायलाई माथि उठाउन साना उद्यमीहरूको लागि सहजीकरण अपरिहार्य छ," कार्यक्रमले निष्कर्ष दिएको छ।

यो खबर पढेर तपाईलाई कस्तो महसुस भयो ?