सभापतिको आलोचना सुन्न रास्वपालाई गाह्रो

काठमाडौं । प्रतिपक्ष दलहरूले प्रतिनिधिसभा बैठक अवरुद्ध गरेका छन् । सदनलाई विधि र प्रक्रियाअनुसार चलाउनुपर्ने माग राख्दै प्रतिपक्षी दलका सांसदहरूले संसद् बैठक अवरुद्ध गरेका हुन् । प्रतिनिधि सभाको मंगलबार बसेको बैठकमा आकस्मिक समय र शून्य समयको प्रक्रिया पूरा भइसकेपछि सभामुखको आसनमा रहनुभएकी उपसभामुख इन्दिरा राना मगरले नेपाली कांग्रेसका सांसद रामहरि खतिवडालाई बोल्न समय दिनुभएको थियो । सांसद खतिवडाले अदालत परिसरमा कानुन व्यवसायी कुटिएको लगायतका विषयमा आफ्नो धारणा राख्नुभएको थियो । सांसद खतिवडाले आफ्नो मन्तव्य राखेलगत्तै राष्ट्रिय स्वतन्त्र पार्टी (रास्वपा)का सांसद गणेश पराजुलीले नियमापत्ति जनाउनुभयो । सांसद पराजुलीले सत्तापक्षीय सांसदलाई कुन नियममा रहेर आकस्मिक र शून्य समय सकिएपछि बोल्न दिइयो ? भन्दै प्रश्न गर्नुभयो । सभामुखको आसनमा रहनुभएकी उपसभामुखले सांसद खतिवडाले आकस्मिक समयमा नै नाम टिपाएको भए पनि छुटेका कारणले बोल्न दिइएको स्पष्टीकरण दिनुभयो । विधि र प्रक्रियाबारे लगातार प्रश्न उठाएपछि उपसभामुख रानाले अध्ययन गर्न सचिवालयलाई निर्देशन दिनुभयो । तर, विपक्षी दलका सांसदहरूले चित्त नबुझेको भन्दै सांसद खतिवडाका अभिव्यक्ति संसद्को रेकर्डबाट मेट्न माग गरे । त्यसपछि सभाको नेतृत्व गर्न सभामुख देवराज घिमिरे आउनुभयो । सभामुख आउँदा पनि विपक्षी दलका सांसद आ-आफ्नो स्थानबाट उभिएर बैठकमा अवरोध गरिरहे । सभामुख घिमिरेले पनि अध्ययन गरेर आवश्यक निर्णय लिन आदेश दिइसकेकाले बसेर बैठक सञ्चालनमा सघाउन आग्रह गर्नुभयो । तर, विपक्षी दलका सांसदहरूले नमानेपछि सभामुख घिमिरेले बैठक स्थगित गर्नुभयो । सभामुख घिमिरेले १५ मिनेटको लागि स्थगित गरेको बैठक एक घण्टा २५ मिनेटपछि मात्र सुरु भएको थियो । दोस्रो बैठकको प्रारम्भ गर्दै सभामुख घिमिरले यसअघि सभाबाट भएको निर्देशनबमोजिम छानविन गरी निष्कर्षमा पुग्ने जानकारी दिनुभयो ।

संसद् नै अवरोध हुनेगरी के बोलेका थिए सांसद खतिवडाले ?
मंगलबार बसेको प्रतिनिधि सभामा आकस्मिक र शून्य समय सकिएर विशेष समय सुरु हुन लाग्दै सांसद रामहरि खतिवडाले उठेर समय माग गर्नुभयो । आफूले आकस्मिक समयमा बोल्नका लागि समय मागेको तर नपाएको उहाँको दाबी थियो । सभाध्यक्षको आसनमा रहनुभएकी उपसभामुख इन्दिरा रानाले आकस्मिक र शून्य समय दुवै सकिएको बताउनुभयो । तर, आफूले समय मागेको खतिवडाले दोहोर्‍याउनुभयो । त्यसबेला सभामुखको आसनको दायाँ बायाँ रहेका संसद् सचिवालयका कर्मचारीहरूले टिपाएको तर, नाम बोलाउन बिर्सिएको स्मरण गराए । त्यसपछि उपसभामुख रानाले दुई मिनेट समय दिनुभयो । त्यसपछि बोल्न सुरु गर्नुभएका खतिवडाले रास्वपा सभापति रवि लामिछाने लक्षित गर्दै भन्नुभयो, ‘नेपाल प्रहरीलाई दुरुपयोग गरियो भन्ने समाचार सुन्नमा आएको छ । तर, हामीले को गृहमन्त्री हुँदा देखेका थियौँ, एक नम्बरकोलाई नबनाएर १५ नम्बरकोलाई प्रमोसन गरेको हामीले हिजो देख्यौँ । आइजीलाई समितिमा बोलाएर निर्दोष छ भन्देऊ भनेर कानेखुसी गरेको पनि सुन्यौँ । कल्ले सदुपयोग गर्‍यो, कल्ले दुरुयोग गर्‍यो ?’ खतिवडा बोलिरहँदा रास्वपाका सांसद गणेश पराजुलीले प्रश्न उठाएर विधिअनुसार नभएको भन्दै रास्वपाका सांसदहरूले विरोध सुरु गरे । त्यसपछि रास्वपालाई प्रमुख प्रतिपक्षी माओवादी केन्द्रका सांसदहरूले पनि साथ दिए ।

सत्ता र प्रतिपक्ष दलका प्रमुख सचेतकबीच सवाल जवाफ
प्रमुख प्रतिपक्षी दल नेकपा माओवादी केन्द्रले सरकार सदनप्रति अनुत्तरदायी भएको भन्दै विरोध गरेको छ । मंगलबारको प्रतिनिधिसभा बैठकको सुरुवातमै आकस्मिक समय लिएर बोल्नुभएका प्रमुख प्रतिपक्ष दल नेकपा माओवादी केन्द्रका प्रमुख सचेतक हितराज पाण्डेले सरकारले संसद्लाई अपहेलना गरेको र जनताको प्रतिनिधिको आवाज नसुनेको आरोप लगाउँदै भन्नुभयो, ‘आजको विषय सूचीमा कार्यव्यवस्था परामर्श बैठक बसेर कार्यतालिका बनाइयो । आज भ्रष्टाचार विधेयक पारित गर्ने थियो । यहाँ पस्दा सरकारले समय छैन भनेर सूची हटायो भनेर जानकारी आयो सरकारले पालना गर्नुपर्दैन ? संसद्ले सधैँ सरकारले भनेको गर्ने हो ? जनताको प्रतिनिधिले बनाएको कार्यसूची सरकारले पारित गर्नुपर्ने हो ?’ विधायनसँग सम्बन्धित विधेयकबारे सरकारले संसद्को प्रक्रिया अभ्यासलाई बेवास्ता गरेको समेत टिप्पणी गर्दै पाण्डेले भन्नुभयो, ‘बारम्बार हामीले यो विषय उठायौँ तर ख्याल भएन । सरकार यो भ्रष्टाचारबारे कसरी जान खोजेको छ ?’ पाण्डे बोलेलगत्तै नियमापत्ति जनाउँदै नेकपा एमालेका प्रमुख सचेतक महेश बर्तौलाले सदन सभामुखले चलाउने र तलबाट के लाग्यो ? भनेर प्रतिनिधिसभा बैठक नचल्ने जिकिर गर्दै भन्नुभयो, ‘कार्यसूचीमा के रहने नरहने भन्ने राख्नुभयो । सरकारले थप्न पनि सक्छ र कार्यसूची हटाउन पनि सक्छ ।’ लगत्तै रास्वपा सांसद गणेश पराजुलीले प्रश्न गर्दै भन्नुभयो, ‘दुई तिहाइको धाक दिने हो ? सांसदले, सरकारले सदन चलाउन सभामुखलाई सिकाउने हो ?’

गृहमन्त्री लेखकको क्षमतामाथि प्रश्न
रास्वपाका सांसद शिशिर खनालले आफूले कमाण्ड गरेको नेपाल प्रहरीको सुरक्षा गर्न नसकेको भन्दै गृहमन्त्री रमेश लेखकमाथि प्रश्न उठाउनुभएको छ । मंगलबार बसेको प्रतिनिधि सभाको बैठकमा सांसद खनालले गृहमन्त्री कुन नैतिकताले कुर्सीमा बस्न सकेको ? भन्ने प्रश्न गर्दै भन्नुभयो, ‘ड्युटीमा रहेका प्रहरीलाई कुट्ने अस्कल क्याम्पसका नेतालाई पक्रन नेपाल प्रहरीले अनुसन्धान गर्ने पनि हिम्मत गरेनछ । त्यो क्षेत्रको प्रतिनिधित्व गर्ने सांसदको रूपमा मलाई त्यहाँका धेरै विद्यार्थीहरूले मेसेज गर्नुभएको छ । उहाँहरूले लेख्नुभएको छ, क्याम्पसको कक्षा कोठामा सधैँ उहाँहरूको दादागिरी चल्थ्यो । तर, अब पुलिसले पनि आँट नगरेपछि कसरी क्याम्पसमा पढ्ने वातावरण होला र ? कृपया यसको बारेमा बोलिदिनु न ।’ कहिले नेविसंघका विद्यार्थी भनेर गृहमन्त्रीसँगको फोटो देखाएर प्राध्यापक थर्काउन पाइने त कहिले सत्ता टिकाउन पर्ने बहानामा अखिल समर्थक विद्यार्थीहरूलाई प्रहरीले अनुसन्धान गर्न पनि आँट नगर्ने जिकिर गर्दै खनालले भन्नुभयो, ‘दुई तिहाइको तपाईँहरूको बहुमत छ, गृहमन्त्री आफैँले कमाण्ड गरेको प्रहरीको सुरक्षा दिन सक्दैन भने नेपाली युवा देशमा किन बस्ने ? तपाईंहरूलाई भोट हाल्न मात्र बस्ने ?’

मन्त्रीहरूको सम्पत्ति विवरण सार्वजनिक गर्न माग
विपक्षी दल रास्वपाले मन्त्रीहरूको सम्पत्ति विवरण सार्वजनिक गर्न माग गरेको छ । मंगलबारको प्रतिनिधिसभा बैठकको शून्य समयमा बोल्दै रास्वपा सांसद अशिम शाहले मन्त्रीहरूको सम्पत्ति विवरण सार्वजनिक गर्न माग गर्दै भन्नुभयो, ‘सरकारले अहिलेसम्म सम्पत्ति विवरण सार्वजनिक गरेन । पारदर्शिताको नारा घन्काउनेहरू किन मौन छन् ? मन्त्रीहरूले कहिले सम्पत्ति विवरण सार्वजनिक गर्ने सोच राखेको छ ? मन्त्रीको सम्पत्ति विवरण सार्वजनिक नगर्ने सरकारबाट भ्रष्टाचारको फाइल खुल्ने आशा गर्नु बेकार हो त ? तुरुन्त सम्पत्ति विवरण सार्वजनिक गरोस् ।’