असन्तुष्टिको आगोमा मट्टीतेल छर्किरहेको सरकार

काठमाडौं । प्रमुख दल, सत्ता र वर्तमान व्यवस्थाविरुद्ध बलिरहेको जनआक्रोशको आगोमा सरकार स्वयंले घिउ थप्ने काम गरेको छ । जनतामाझ लोकप्रिय कुलमान घिसिङलाई नेपाल विद्युत् प्राधिकरणको कार्यकारी निर्देशकबाट हटाएर सरकारले जनआक्रोश झन् बढाउने काम गरेको हो ।

राजसंस्था पुनःस्थापना पक्षधरहरू सल्बलाइरहेका बेला सरकारले कुलमानलाई हटाएपछि गणतन्त्र पक्षधरहरू पनि सडकमा आउने अवस्था बनेको हो । यसअघि राजावादीविरुद्ध व्यवस्था पक्षधर दलहरू झण्डै एक ठाउँमा आउने वातावरण बनेको थियो । तर, कार्यकाल सकिने बेला कुलमानलाई पदबाट बर्खास्त गरिएपछि विपक्षी दलहरू पनि सरकारविरुद्ध आन्दोलित बन्ने अवस्था आएको हो । यसले राजसंस्था पुनःस्थापनाका लागि ‘निर्णायक आन्दोलन’ गर्ने तयारीमा रहेका राजावादी दल र समूहलाई फाइदा पुग्ने देखिएको छ । तर, कांग्रेस–एमाले गठबन्धन सरकार भने असन्तुष्टहरूलाई झन् उचाल्ने काम गरिरहेको छ ।

कुलमानलाई हटाउने निर्णय होस् वा काठमाडौं महानगरपालिकाका मेयर बालेन्द्र साह ‘बालेन’लाई अप्ठ्यारो पार्नेगरी प्रमुख प्रशासकीय अधिकृत नपठाउने सरकारी कदमले असन्तुष्टहरूकै पक्षमा माहौल बन्ने देखिएको हो । स्वयं सत्ता पक्षकै नेताहरू सरकारका कामबाट असन्तुष्ट छन् । सरकारी निर्णयको सत्ता पक्षकै प्रभावशाली भनिएका नेताहरूले खुलेरै विरोध गरिरहका छन् । सत्तारूढ कांग्रेस महामन्त्री गगनकुमार थापाकै शब्दमा सरकार ‘असन्तुष्टिको आगोमा मट्टीतेल हाल्ने’ काम गरिरहेको छ । सरकारको पछिल्लो निर्णयसँगै असन्तुष्ट विपक्षी आन्दोलित बनेको छ ।

विकास, समृद्धि सुशासन, भ्रष्टाचार नियन्त्रणका साथै संविधान संशोधनलाई केन्द्रमा राखेर आठ महनिाअघि दुई ठूला दल कांग्रेस र एमालेको सरकार बनेको थियो । प्रमुख दुई ठूला दलको सरकार बनेपछि जनआक्रोश घट्ने अनुमान गरिएको थियो । तर, दुईतिहाइ सरकारले पनि जनअपेक्षित काम गर्न नसकेपछि जनआक्रोश घट्नुको साटो झन् बढिरहेको छ । छोटो समयमै सरकार आलोचित बन्दै गएको छ । जनतामा विकासको अनुभूति दिनुपर्नेमा त्यसो नगरी एकपछि अर्को अलोकप्रिय काम गर्दा सरकारबाट जनता झन् झन् निराश हुँदै गएका हुन् ।

सरकार सर्वसत्तावादको अभ्यास गर्न उद्यत छ : बस्नेत
माओवादी केन्द्रका सांसद शक्ति बस्नेतले राज्यका महत्त्वपूर्ण अंग र निकायहरूलाई आफ्नो नियन्त्रणमा लिएर सरकार सर्वसत्तावादको अभ्यास गर्न उद्यत भइरहेको आरोप लगाउनुभएको छ । बुधबारको संसद् बैठकमा बोल्दै बस्नेतले सरकार स्वार्थ समूहहरूको पृष्ठपोषण र बैशाखीमा निर्मित भएको कारणले स्वार्थ समूह, बिचौलियाको हित र रक्षाका लागि आफूलाई समर्पित गर्नु उसको नियत र नियति बनेको आरोप लगाउनुभयो ।

सरकारको दुई तिहाइको सामथ्र्य एउटा राष्ट्रसेवक कर्मचारीको मानमर्दन गर्न, अपमान गर्न र एउटा निश्चित सार्वजनिक संस्थालाई तेजोबध गर्न प्रयोग गरिरहेको उहाँको भनाइ थियो । सरकारले आफ्नो औचित्य गुमाउँदै गइरहेको उहाँको आरोप थियो ।

‘परिवर्तित व्यवस्थाप्रति जनतामा धेरै अपेक्षाहरू बढोत्तरी भएको छ । बदलिदो भू–राजनीतिक परिस्थितिमा राजनीतिक हितका मुद्दाहरू थप गम्भीर र संवेदनशील बन्दै गएको बेला सरकारले बेवास्ता गरिरहेको छ । तर, सरकार यी सबै विषयहरूप्रति बेखबरजस्तै देखिराखेको छ,’ उहाँले भन्नुभयो, ‘सरकार स्वार्थ समूहको पृष्ठपोषण र बैशाखीमा निर्मित भएको कारणले बिचौलियाको रक्षामा आफूलाई समर्पित सरकारको नियत र नियति बनिरहेको छ । लोकतन्त्रमा संख्या महत्त्वपूर्ण कुरा हो । तर, संख्याका पहाडहरू जनचाहनासामु गल्र्यामगुर्लुम ढलेका इतिहासहरू र अनुभवहरू छन् । सरकार यसतर्फ ध्यान दिइराखेको छैन । सरकार राज्यका निकाय कमजोर बनाउने, आफ्नो नियन्त्रणमा राख्ने, स्वेच्छाचारी ढंगले दुरुपयोग गर्ने र सर्वसत्तावाद लागू गर्ने जुन बाटोमा सरकार लागेको छ, हामी यसको सशक्त प्रतिवाद गर्दछौँ ।’

सरकारले केही गर्न सकेन भन्ने भाष्य गलत छ : गृहमन्त्री
गृहमन्त्री रमेश लेखकले लोकतन्त्र प्राप्तिपछि सरकारले देशमा धेरै काम गरे पनि केही गर्न सकेन भन्ने नकारात्मक भाष्य निर्माण गर्ने प्रयास भइरहेको दाबी गर्नुभएको छ । बुधबार भक्तपुरको दूधपाटीस्थित जुद्धवारुण यन्त्र कार्यालयको नयाँ कार्यालय भवन उद्घाटन गर्दै उहाँले लोकतन्त्र प्राप्तपछि सरकारले केही गर्न सकेन, देशमा केही भएन भन्ने गरी भाष्य निर्माण गर्नु गलत भएको दाबी गर्नुभयो । तत्कालीन राजाले ‘कू’ गरेर प्रजातन्त्र समाप्त पारेको दिन जनताले सम्झिरहेको उहाँको भनाइ थियो ।

‘तत्कालीन राजाले ‘कू’ गरेर प्रजातन्त्र समाप्त पारेको दिन जनताले बिर्सनुभएको छैन भन्ने मलाई विश्वास छ । प्रजातन्त्र समाप्त पारेर राज्यसत्ता एकलौटी हातमा लिएपछि सबभन्दा पहिला नेपाली सेना र प्रहरीले सञ्चार माध्यममा छापा मारेर समाचारमा रोक लगाएको, प्रकाशित पत्रिकाहरू बन्द गराउनेदेखि जफत गरेर लगेको, पत्रकारलाई धम्क्याएको, जनताको आवाज बन्द गराएको सिंगो प्रेस जगत र जनताले बिर्सेका छैनन्,’ उहाँले भन्नुभयो, ‘गणतन्त्रको विकल्प अन्य कुनै व्यवस्था हुन सक्दैन । केही हुँदै नभएको, केही गर्दै नगरेको होइन, धेरै काम भएका छन् तर, जनताले सोचेजस्तो छिटो काम नभएको पक्कै हो । मुलुकमा समस्या छैनन् भनेर म भन्दिनँ, समस्या छन्, त्यसलाई हल गर्दै अगाडि जाने व्यवस्था लोकतन्त्र मात्रै हो ।’

विभिन्न चुनौती र समस्याका बाबजुद धेरै काम भएको उहाँले दाबी गर्नुभयो । एकतन्त्रीय व्यवस्थाले जनताको आवाज, सञ्चारको आवाज कुल्चिने भन्दै लोकतन्त्रले जनता र सञ्चालकको आवाजलाई सुनेर समृद्धिको यात्रामा अगाडि बढ्ने उहाँको भनाइ थियो । ‘जनताको स्वतन्त्रता, भावना, आवाज बन्द गर्ने निरंकुशताको शासन हामीले व्यहोरिसकेका छौँ, जनताले बलिदान दिएर ल्याएको लोकतन्त्रलाई बिर्सिएर फेरि त्यही व्यवस्था चाहियो भनेर जनताले भन्छन् भनेर विश्वास गर्न सकिन्न, यो त केही तत्त्वहरूले भ्रम फैलाइरहेका मात्रै हुन्, यो भ्रम पनि केही दिनमै सकिन्छ,’ उहाँले भन्नुभयो । भ्रमको खेतीले जनता अब खोला, खोल्छीमा अल्झिन्छन् भन्ने आफूलाई नलागेको उहाँले बताउनुभयो ।

यो पनि पढ्नुहोस्

नियुक्तिपछि चार वर्ष अघिको रिट टुंग्याइदिन माग गर्दै सर्वोच्चमा शाक्य