सत्ता गठबन्धनभित्र खेल्ने प्रचण्डको प्रयास

काठमाडौं । प्रमुख प्रतिपक्ष दल नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले नेपाली कांग्रेस र नेकपा एमालेबीचको वर्तमान सत्ता गठबन्धन फुटाउने प्रयासलाई तीव्रता दिनुभएको छ । गत असार १७ गते नेकपा एमाले र नेपाली कांग्रेसबीच सत्ता साझेदारी सहितको सात बुँदे सहमति भएको थियो । दुई दलबीच भएको सोही सहमतिको जगमा नेकपा एमालेका अध्यक्ष केपी शर्मा ओली असार ३१ गते प्रधानमन्त्री बन्नुभयो । संसद्का दुई प्रमुख ठूला दलबीच सहमति भएसँगै कहिले कांग्रेस त कहिले एमालेलाई साथ लिएर सत्ताको नेतृत्व गरिरहनु भएका प्रचण्ड सत्ताविमुख हुन पुग्नुभयो । दुई ठूला दलबीचमा खेलेर निरन्तर सत्ताको स्वादमा रमाइरहनु भएका प्रचण्डले सत्ताविमुख भएको भोलिपल्टदेखि नै प्रधानमन्त्री ओली नेतृत्वको वर्तमान गठबन्धन सरकार ढाल्न निरन्तर प्रयास गरिरहनु भएको छ ।

हुन त संसद्का झण्डै दुईतिहाइ समर्थन प्राप्त प्रधानमन्त्री ओली नेतृत्वको सरकारका काम कारबाहीप्रतिको निराशा दिन प्रतिदिन बढ्दो क्रममा छ । सत्तारूढ दलको प्रमुख घटक नेपाली कांग्रेसभित्र सरकारप्रति तीव्र असन्तुष्टि छ । कांग्रेसभित्र संस्थापनइतर पक्षको नेतृत्व गरिरहनु भएका केन्द्रीय सदस्य डा.शेखर कोइरालाले निरन्तर सरकारप्रति प्रश्न उठाइरहनु भएको छ । सरकारका काम कारबाही प्रभावकारी बनाउनको लागि सुझाव दिने भन्दै गठन भएको सत्तारूढ दुई दल कांग्रेस र एमालेका शीर्ष नेताहरू सम्मिलित उच्चस्तरीय राजनीतिक संयन्त्रका सदस्यसमेत रहनुभएका कांग्रेस महामन्त्री गगन थापाले समेत सरकारका काम कारबाहीप्रति सार्वजनिक रूपमै असन्तुष्टि व्यक्ति गर्दै आउनुभएको छ । सरकारमा सहभागी नभए पनि सरकारलाई समर्थन गरिरहेको उपेन्द्र यादव नेतृत्वको जनता समाजवादी पार्टी (जसपा) नेपालले त औपचारिक रूपमै वर्तमान सरकार असफल भएको निष्कर्ष निकालेको छ ।

प्रतिपक्ष दलहरू सरकारमाथि निरन्तर प्रश्न उठाउँदै घेराबन्दी गरिरहेका छन् । प्रमुख प्रतिपक्ष दल नेकपा माओवादी केन्द्रका अध्यक्ष प्रचण्ड वर्तमान सरकार गठन भएदेखि ढाल्न निरन्तर प्रयत्नशील रहनुभएको छ । यद्यपि, ओली नेतृत्वको वर्तमान सरकार ढाल्ने प्रयास हालसम्म सफल हुन सकेको छैन । सरकारको आयु गनिरहनु भएका प्रचण्डले पहिलोपटक खुला रूपमै नेपाली कांग्रेसलाई निःसर्त सघाउन तयार रहेको बताउनुभएको छ ।

एक टेलिभिजन कार्यक्रमलाई दिएको अन्तर्वार्तामा अध्यक्ष प्रचण्डले मुलुक संकटमा फसिसकेको जिकिर गर्दै ठूलो दलको हैसियतमा कांग्रेसले समस्याको निकासका लागि नेतृत्व लिनुपर्ने प्रस्ताव राख्नुभएको हो । कांग्रेसले नेतृत्वको लागि आँट गरे माओवादी निःसर्त सघाउने पक्षमा रहेको दाबी गर्दै प्रचण्डले भन्नुभयो, ‘देशको संकटको स्थिति जस्तो देखापरेको छ । यसको निकास दिन सबभन्दा ठूलो दलको नाताले पनि, शान्ति सम्झौताको हस्ताक्षर दलको नाताले पनि, नेपाली कांग्रेसले निकास दिन आँट गर्नुपर्छ । कांग्रेसको जस्तो चाहना हुन्छ, त्यहीअनुसार हामी सहयोग गर्छौं, यो कुरा एकदम क्लियर हो । नेपाली कांग्रेसले बाहिरबाट सपोर्ट गर्देऊ भने पनि हामी तयार ।

सरकारमा आएर सपोर्ट गर भनेर कांग्रेसले भन्यो भने पनि उहाँहरूको भनाइअनुसार हुन्छ ।’ शान्ति सम्झौताका बाँकी काम टुंग्याउन पनि मुख्य दलको रूपमा कांग्रेस सभापति शेरबहादुर देउवा अगाडि सर्नुपर्ने जिकिर गर्दै प्रचण्डले भन्नुभयो, ‘मचाहिँ प्रधानमन्त्रीको रेसमा ०८४ सम्म छैन । एकदम प्रष्ट हो । सरकारको नेतृत्व ठूलो पार्टी र शान्ति सम्झौतामा हस्ताक्षर हुनुको नाताले भनेको हो । गम्भीर समीक्षा गरौँ । राष्ट्र र जनताको पक्षमा संविधान संशोधनको आधार खोजौँ ।’

प्रचण्डले सुरुवातदेखि नै केपी शर्मा ओली नेतृत्वको सरकारलाई असंवैधानिक सरकार भन्दै आउनुभएको छ । यो बीचमा प्रचण्डले गठबन्धनलाई अप्ठ्यारो पार्नेगरी नै विपक्षी मोर्चा बनाउनुभएको थियो । यद्यपि, कांग्रेस सभापति देउवाले भने गठबन्धनकै पक्षमा आफूलाई उभ्याउँदै आउनुभएको छ । देउवाले आफ्नो लाइन परिवर्तन नगर्दासम्म सरकार हेरफेरको सम्भावना छैन । यद्यपि, कांग्रेसभित्रबाटै गठबन्धनको समीक्षा गर्नुपर्ने आवाज बलियो गरी उठिरहेको छ । पार्टी महामन्त्री गगन थापाले केही दिनअघि एक सार्वजनिक कार्यक्रममा भन्नुभएको थियो, ‘हामी सरकारमा छौँ, हाम्रो जिम्मेवारी पनि छ, सरकारको बारेमा पनि हामीले अब अलिकति खुलेर छलफल गर्नुपर्ने बेला आएको छ । सरकारको गति ठीक छैन, जुन तरिकाले कामहरू गर्नुपर्ने हो, जसरी सरकारका कामहरूबाट नागरिकलाई भरोसा सिर्जना गर्नुपर्ने हो, त्यो हुन सकिरहेको छैन, यसले एकातिर सरकारको आयुमाथि प्रश्न उठाउँछ भने अर्कोतिर कांग्रेसकै भविष्यमाथि प्रश्न उठाउँछ ।’

सरकार ढल्न त के, हल्लन पनि हल्लँदैन : प्रधानमन्त्री
प्रधानमन्त्री एवं नेकपा एमालेका अध्यक्ष केपी शर्मा ओलीले वर्तमान सत्ता समीकरण आगामी निर्वाचनसम्मै जाने दाबी गर्नुभएको छ । राजनीतिक स्थायित्वका लागि एमालेले कांग्रेससँग मिलेर सरकार बनाएको उल्लेख गर्नुभएका प्रधानमन्त्री ओलीले सरकार ढल्ने होइन सामान्य हलचल पनि नहुने दाबी गर्दै भन्नुभयो, ‘देशका ठूला दलहरू नेपाली कांग्रेस र एमालेले मुलुकलाई स्थायित्व दिन र देशलाई परिवर्तनका लागि सरकार बनाएका हुन् । यो सरकार (समीकरण) आगामी निर्वाचनसम्मै जान्छ । सरकार ढल्न त के हल्लन पनि हल्लँदैन ।’ एमालेलाई सिध्याउँछु भन्ने स्वार्थी तत्वहरू असफल भएको जिकिर गर्दै ओलीले भन्नुभयो, ‘एमालेलाई सिध्याउँछु, केपी ओलीबिनाको एमाले बनाउँछु भन्नेहरू सफल हुँदैनन् । म धेरै बाँच्ने होइन, त्यसपछि पनि मभन्दा बलवान नेताहरू पार्टीमा आउनेछन् । यस देशको विकासको भाग्यरेखा हामी आफैँ कोर्छौं । मान्छेको घरमा आगो लगाएर र पसलबाट चोरेर भाग्नेहरूले क्रान्ति र परिवर्तनका लागि केही गर्न सक्दैनन् ।’

कुशासन छोप्न सत्ता गठबन्धन विकासको प्रोपगाण्डा फैलाउँदै छ : महासचिव भुसाल
विपक्षी दल नेकपा एकीकृत समाजवादी (नेकपा एस) का महासचिव घनश्याम भुसालले वर्तमान केपी शर्मा ओली नेतृत्वको गठबन्धन सरकारको आडमा दलाल र बिचौलिया गिरोहबाट राज्यदोहन चलिरहेको आरोप लगाउनुभएको छ । राज्य दोहनले गणतन्त्रलाई झस्काइरहने जिकिर गर्नुभएका महासचिव भुसालले आफ्नो कुशासन छोप्न सत्ता गठबन्धनले विगतको तुलनामा अहिले विकास भएको प्रोपगाण्डा फैलाएको टिप्पणी गर्दै भन्नुभयो, ‘अहिले यसरी प्रचार गर्न थालिएको छ ताकि राजनीतिको चुलीमा बसेर यिनीहरूले गरेका सबै नालायकी र भ्रष्टाचार आम नागरिकले भुलुन्, बरू यिनीहरूलाई उभ्याउनुपर्ने कठघरामा पनि ज्ञानेन्द्र शाह र दुर्गा प्रसाईँलाई नै उभ्याइयोस् । मुलुकमा गएको ७५ वर्षमा केही भएको छ । तर, अहिले विकास भएको राष्ट्रिय भाष्य निर्माण गर्न एउटा नयाँ प्रोपगण्डा जत्थालाई यसरी खटाइएको छ ताकि यिनको दलाल÷बिचौलिया गिरोहले गरेको राज्यदोहनको कुन मूल्य चुकाएर मुलुकले आजको बाटो, औसत आयु, स्वास्थ्य र साक्षरता, मोबाइल फोनजस्ता विकास पाएको छ भन्ने तीतो यथार्थ नागरिकका दिमागबाट मेटियोस् ।’

रवि लामिछाने र बालेन साहका हर्कत अशोभनीय रहेको टिप्पणी गर्नुभएका महासचिव भुसालले त्यो समूहलाई नेता मान्नेहरूले आफ्नाविरुद्ध नारा लगाउन थालेपछि सत्ता गठबन्धन झस्किएको दाबी गर्दै भन्नुभयो, ‘रवि लामिछाने र बालेन साहका अल्लारे/उत्ताउला हर्कत अशोभनीय छँदै छन् तर आफ्ना पाखण्डपूर्ण मिहिनेतबाट तयार भएको सामाजिक लफंगाहरूको अल्लारे उत्ताउलो समुदायले अरू कसैलाई नेता मानेर आफ्नैविरुद्ध नारा लगाउन थालेपछि सत्ता गठबन्धन झस्किएको छ । रवि/बालेनहरूको उखरमाउलोलाई यस्तो राष्ट्रिय खतरा देखाउन खोजिँदै छ जसमा सत्ताधारीका पाप पखाल्न पाइयोस् ।’