विपद व्यवस्थापन तथा वातावरण संरक्षणमा समन्वय

सिन्धुली । स्थानीय स्तरमा विपद व्यवस्थापन तथा वातावरण संरक्षण सम्बन्धी अन्तरक्रिया कार्यक्रम सम्पन्न छ ।

जिल्ला समन्वय समिति, सिन्धुलीको आयोजना तथा मरिण गाउँपालिका र नेपाल रेडक्रस सोसाईटी जिल्ला शाखा, सिन्धुलीको सहजिकरणमा कार्यक्रम गरिएको हो ।

मरिण गाउँपालिकाको सभाहलमा आयोजित एक दिने अन्तरक्रियामा घ्याङलेख गाउँपालिका अध्यक्ष जगतबहादुर भोलनले विपद बाजा बजाएर नआउने भएकाले जिल्लामा हुन सक्ने विपद्जन्य घटना व्यवस्थापनको पूर्व तयारीमा तत्त्कालै जुट्न जरुरी रहेको बताउनुभयो ।
विपदबाट हुने क्षति रोक्न सम्भावित जाखिम र क्षतिको आँकलन, समयमै आवश्यक सूचना प्रवाह र त्यसबाट उत्पन्न हुने परिस्थितिको सामनाका लागि गर्नुपर्ने तयारीमा स्थानीय पालिकासँगै सम्बन्धित सरोकारवाला निकाय, संघसंस्थाहरु सबै एकजुट भएर लाग्नुको विकल्प नभएको उहाँको ठम्याई थियो ।

जिल्ला विपद व्यवस्थापन समितिका संयोजकसमेत रहनुभएको प्रमुख जिल्ला अधिकारी भरत खनालले विपदबाट हुने क्षतिलाई न्युनिकरण गर्न सबै जिम्मेवारी हुनुपर्ने धारणा राख्नुभयो । उहाँले भन्नुभयाे, “विपद व्यवस्थापन पूर्व तयारीको क्षेत्रमा हामी असाध्यै कमजोर छौँ । सबै एकजुट भएर विपदको सामना गन, गराउन समक्ष बन्न आवश्यक छ ।”

९७ प्रतिशत आगलागीका घटना मानवीय कारणले हुने भएकाले यस्ता कार्य कसैले नगर्न, नगराउनसमेत उहाँले आग्रह गर्नुभयो । विपदबाट हुन सक्ने जनधनको क्षति कम गर्न सबै पालिकामा पुर्वतयारी तथा प्रतिकार्य योजना निर्माण गर्न आवश्यक रहेको उहाँल बताउनुभयोे ।
मरिण गाउँपालिका उपाध्यक्ष विमला माझीले स्थानीय सरकार विपद हुनु पुर्वको तयारीमाभन्दा पनि भइसकेपछि गर्नुपर्ने खोज, उद्धार र राहतमा केन्द्रित भएको जानकारी दिनुभयो । अब सचेतना र जनचेतनामा जोड दिन आवश्यक रहेको उहाँको भनाई थियो ।

जिल्ला सशस्त्र प्रहरी कार्यालयका प्रमुख बलराम प्रसाईले विपद जोखिम न्युनिकरण तथा व्यवस्थापन पुर्व तयारी स्थानीय सरकारको प्राथमिकता नपरेको धारणा राख्न्नुभयो । विपद् व्यवस्थापनसम्बन्धि जनचेतना जगाउनुका साथै विपदको घटनापछि खोज, उद्धारका लागि आवश्यक साधन, स्रोतको अभाव रहेकाले यसको व्यवस्थापनमा लाग्न उहाँले सुझाव दिनुभयो ।

नेपाल रेडक्रस सोसाईटी सिन्धुली शाखाका सभापति अशोक श्रेष्ठले हुन सक्न सम्भावित जोखिमलाई न्युनिकरण गर्न सबै पालिकाले विपद प्रतिकार्य योजना अनिवार्य बनाउनु पर्नेमा जोड दिनुभयो ।

उहाँ विपद व्यवस्थापनको लागि नियमित पालिका तथा जिल्ला स्तरिय बैठक र छलफल गर्नुपर्ने बताउनुभयो । यसका साथै सबै पालिकाले पूर्व तयारी तथा प्रतिकार्य योजना बनाए त्यसलाई एकिकृत गरेर जिल्ला स्तरीय पूर्वतयारी तथा विपद प्रतिकार्य योजना निर्माण गर्न सहयोग पुग्ने उहाँको भनाई थियो ।

यसैगरी, स्थानीय स्तरमा विपद व्यवस्थापन तथा वातावरण संरक्षणसम्बन्धी अन्तरक्रिया कार्यक्रम रेडक्रस सोसाईटी सिन्धुली शाखा अधिकृत पवन पाख्रिनले विपद्को अवस्था, विपद व्यवस्थापनका लागि स्थानीय सरकारले गर्नुपर्ने काम, कर्तव्य, सम्बन्धित सरोकारवालाहरुको पहल कदमी र पुर्व तयारीका बारेमा प्रस्तुति राख्नु भएको थियो ।

जिल्ल्ला समन्वय समितिका प्रमुख कार्साङ लामाको अध्यक्षतामा भएको कार्यक्रममा मरिण, हरिहरपुरगढी र घ्याङलेख गाउँपालिकाका जनप्रतिनिधि, पालिका स्तरमा रहेको वातावरण तथा विपद व्यवस्थापन शाखामा कार्यरत कर्मचारी, सुरक्षाकर्मी लगायत सम्बन्धित सरोकारवाला व्यक्तिहरुको उपस्थिति देखिन्थ्यो ।

उक्त कार्यक्रमका सहभागीहरुलाई जिल्ला समन्वय समिति उपप्रमुख शान्ता कार्कीले स्वागत गर्नुभएको थियो ।