ग्रामीण क्षेत्रमा सेवा दिन पशु सेवा शिविर संचालन

निरोज कोइराला भोजपुर, संवाददाता

१ चैत्र २०८१, शुक्रबार १३:०८

Read Time = 5 mins

डिजिटल संस्करण

कोशी प्रदेश

प्रदेश समाचार

A A- A+

भोजपुर । ग्रामीण क्षेत्रका कृषकहरुलाई सहजरूपमा पशु स्वास्थ्य सेवा दिनका लागि एक दिने शिविरको आयोजना गरिएको छ ।
पशु चौपायाहरुमा बिभिन्न किसिमका समस्याहरु देखिने गरेको अवस्थामा सो नियन्त्रण र उपचारका लागि पशु स्वास्थ्य शिविरको आयोजना गरिएको आयोजक राम मिथिला बहुप्राविधिक शिक्षालयका प्रमुख नविन चापागाईले बताउनुभयो ।

जिल्लाको रामप्रसाद राई गाउँपालिका वडा नम्वर पाँच, मानेभञ्ज्याङमा संचालनमा रहेको शिक्षालयले भोजपुर उद्योग वाणिज्य संघको माग प्रस्ताव र भेटेरीनरी अस्पताल तथा पशु सेवा बिज्ञ केन्द्र भोजपुरको सहयोगमा भोजपुर नगरपालिकाको वडा नम्वर १२, टक्सारमा पशु सेवा शिविर संचालन गरेको हो । ३९० घण्टे (६५ दिने) निःशुल्क ग्रामिण पशु स्वास्थ्य कार्यकर्ता तालिमका सहभागीहरूलाई सीप सिकाउने र भोजपुरका कृषकहरुलाई सेवा सहयोग गर्ने उद्धेश्यले निःशुल्क आधारभुत पशु स्वास्थ्य शिविरको आयोजना गरेको शिक्षालयले जनाएको छ ।
शिविरमा तीन सय ४६ वटा पशुचौपायाहरूको स्वास्थ्य परीक्षण गरी औषधी समेत निशुल्करूपमा वितरण गरिएको छ । प्रशिक्षणका सहभागीहरुले आफ्नो क्षेत्रमा दक्ष ढङ्गले काम गर्न सक्ने शिक्षालयका प्रमुख चापागाईको भनाई रहेको छ । शिविरमा पशु स्वास्थ्य परीक्षण, खोप, बन्ध्याकरण, गोवर परीक्षण जस्ता सेवाहरू राखिएका शिविर सहजकर्ता अनिल बस्नेतले जानकारी दिनुभयो ।

उद्योग बाणिज्य संघको माग प्रस्तावमा संचालन भएको शिविर प्रभावकारी देखिएको संघका अध्यक्ष कर्ण मोक्तानले बताउनुभयो । प्राविधिक विषय अन्तर्गतका यस्ता तालिम र अभ्यासहरुले कृषकहरुलाई समेत राहत मिल्ने अध्यक्ष मोक्तानले बताउनुभयो । अध्यक्ष मोक्तानले भन्नुभयो, “जिल्लाका धेरै कृषकहरु पशुपालन व्यवसायमा जोडिएका छन, तर उनीहरुमा पशुमा लाग्ने रोग र उपचार पद्धतीका विषयमा पूर्ण जानकार छैनन ।” जनशक्ति अभावमा राज्य तहका पशु प्रविधिक सबै ग्रामीण भेगमा पुगेर सेवा प्रवाह गर्न नसकिरहेको अवस्था पनि छ । पशु स्वास्थ्यलाई सहज रूपमा विस्तार गर्ने लक्ष्यले गरिएको प्रशिक्षण कार्यक्रम प्रभावकारी हुने छ ।

‘एक सीप, एक प्रहरी’ को नारा कार्यान्वयमा शसस्त्र प्रहरी वल गुल्म नम्वर पाँच हेडक्वाटर टक्सारका प्रहरी समेत तालिममा सहभागी थिए । स्थानीयस्तरका नागरिकले भोगेको समस्यालाई ध्यानमा राख्दै शिक्षालयले ग्रामीण पशु स्वास्थ्य कार्यकर्ता तालिमको आयोजना गरेको हो । शिक्षालयबाट उत्पादन भएका जनशक्तिले भावी दिनमा सहज रूपमा ग्रामीण भेगमा पशु सेवालाई विस्तार गर्न सक्ने स्थानीय घमचन्द्र दाहालले बताउनुभयो ।

उहाँले भन्नुभयो, “वर्षौबाट पशुपालन गरिरहेको भएपनि पशुमा लाग्ने रोगका विषयमा कृषकहरु जानकारी नहुँदा समस्या रहेको अवस्थामा तालिम दिदै सहभागीलाई ग्रामीण क्षेत्रमा पनि परिचालन गरिदाँ स्थानीय कृषकहरुमा पनि उत्साह थपिएको छ ।” तालिम लिने अवसरसँगै सेवा समेत गर्ने मौका पाएकोमा तालिमका सहभागीहरु पनि खुशी देखिएका छन् ।

सरोकार

यो खबर पढेर तपाईलाई कस्तो महसुस भयो ?