फुटबल खेलाउँदै एकेडेमी चलाउँदै सहारा

हिमालय टाइम्स
Read Time = 8 mins
A A- A+

पोखरा । सहारा क्लब पोखरा नाममात्रै होइन, यो असहाय विपन्न वर्गका बालकहरूको दरिलो सहारा पनि हो । स्थापनाको २४औं वार्षिकोत्सव मनाइरहेको क्लबले यसबीचमा विभिन्न अप्ठेरोमा परेका असहाय बालकलाई आश्रय दिँदै आएको छ । विद्यालयको पढाइ सम्पन्न गराउँदै ११, १२ को कक्षा पनि पूरा गराउन योगदान गरेको छ ।

खेलको माध्यमबाट समाजका युवालाई कुलतबाट जोगाउन विसं २०५८ मा स्थापित क्लबले फुटबल खेलाएरै सहारा फुटबल एकेडेमी सञ्चालन गर्दै आएको छ । ‘खेलकुदको विकासमा सहकार्य गरौं, पोखरालाई खेलकुद पर्यटन शहरका रूपमा विकास गरौं’ भन्ने नारासहित प्रत्येक वर्ष आहा रारा गोल्डकप फुटबल प्रतियोगिता क्लबले सञ्चालन गर्दै आएको छ । सो प्रतियोगितामा दर्शकले काटेको टिकटबाट बचेको रकम एकेडेमी सञ्चालनमा उपयोग गर्दै आएको क्लबका अध्यक्ष हरिराम गुरुङले जानकारी दिनुभयो ।

पोखरा महानगरपालिका–१७ दोभिल्लास्थित एकेडेमीमा १६ जिल्लाबाट २८ बालकहरू राखेर एकेडेमी सुरु गरिएको थियो । यस आर्थिक वर्षमा १२ कक्षा पूरा गरेका आठजनाको बिदाइ गरी बाँकी १० जिल्लाका १३ बालकले आवासीयरूपमा अध्ययन गर्दै आएको उहाँले बताउनुभयो । उहाँहरूको गाँस, बास, कपासका साथै उचित शिक्षाको प्रबन्ध र फुटबल प्रशिक्षणको कार्य निःशुल्करूपमा एकेडेमीले गर्दै आएको छ ।

आहा रारा गोल्डकप फुटबल प्रतियोगिता सञ्चालन गर्दा खेलप्रेमी दर्शक र प्रायोजकले दिएको उत्साहबाटै एकेडेमी सञ्चालन भइरहेको अवस्थामा कोरोना कहरले भने प्रभावित बनाएको उहाँको भनाइ छ । फुटबल प्रतियोगितामात्र नभई सामाजिक सेवाका विभिन्न क्षेत्रमा पनि काम गर्दै आएको क्लब राष्ट्रियरूपमा मात्र नभई अन्तर्राष्ट्रियरूपमा पनि चर्चामा छ ।

एकेडेमीमा आश्रित बालक पोखरा महानगरपालिका-३३ भरतपोखरीस्थित शिशु कल्याण माध्यमिक विद्यालयमा अध्ययनरत छन् । विसं २०५९ मा पहिलो क्याराभान गोल्डकप एवं २०६० देखि आहा गोल्डकप सञ्चालनसँगै आवासीयरूपमा एकेडेमी चलाउनुपर्दछ भन्ने सोचका साथ अघि बढेको क्लबका संस्थापक अध्यक्ष वसन्त थकालीले बताउनुभयो ।

एकेडेमी स्थापनासँगै क्लबबाट राष्ट्रियस्तरका खेलाडी उत्पादन भएपछि सहाराको महत्व र गरिमा अझै चुलिएको हो । एकेडेमीकै उत्पादन राष्ट्रिय खेलाडी अनिल गुरुङ, प्रशिक्षक विष्णु गुरुङ आदिका कारण पनि एकेडेमीको सार्थकतालाई पुष्टि गरेको छ । एकेडेमीकै अवसर पाएका सुशील लामा, अजित भण्डारी, नवीन श्रेष्ठजस्ता खेलाडीका कारण पनि क्लबको उचाइ अझै बढेको छ ।

एकेडेमी सञ्चालनकै लागि विसं २०६३ मा पोखरा–१७ दोविल्लामा लगभग २८ लाख ५० हजार लागतमा २६ रोपनी जग्गा खरिद गरेसँगै उक्त परिसरमा तीनतले भवन, मिनी प्यारापिटसहितको फुटबल मैदानलगायतका विभिन्न संरचना तयार गरिसकिएको छ । फुटबल खेलको अन्तर्राष्ट्रिय संस्था फिफाले यसका गतिविधिलाई समेटेर तयार पारेको ‘हिमालको देशमा फुटबलभित्र लुकेको कथा’ विषयको वृत्तचित्रले यसको भूमिकालाई अझै स्पष्ट पारेको क्लबका सल्लाहकार एवं मानार्थ सदस्य नारायण कार्कीले बताउनुभयो ।

‘क्लबको स्थापनाकालदेखि नै यसका सदस्यले देखाउने गरेको सेवाभाव र आर्थिक पारदर्शितासँगै क्रियाशीलताका कारण स्वदेश एवं विदेशमा यसले खेलप्रेमीको विश्वास जित्न सफल भएको छ,’ कार्कीले भन्नुभयो, ‘क्लबको आफ्नै एकेडेमी तथा रंगशाला हुनु पनि यसको विशिष्टता हो ।’

एकेडेमीको दीर्घकालीन सुसञ्चालनका लागि सूर्यबहादुर केसीको परिवारले वार्षिक १५ लाख उपलब्ध गराउने भएको क्लबका महासचिव रामजीप्रसाद अधिकारीले जानकारी दिनुभयो । दश वर्षसम्म केसीको पुण्यतिथिका अवसरमा परिवारले क्लबलाई वार्षिक १५ लाख प्रदान गर्ने सम्झौता गरी यसै वर्षदेखि एकेडेमीको नामाकरण ‘सूर्यबहादुर केसी स्मृति सहारा फुटबल एकेडेमी’ गरिएको उहाँले बताउनुभयो ।

एकेडेमीकै व्यवस्थित एवं दीर्घकालीन सञ्चालनका लागि संस्थाले स्थापना गरेको सहारा फुटबल एकेडेमी अक्षयकोषमा हालसम्म दुई करोड ५६ लाख ८४ हजार संकलन भइसकेको महासचिव अधिकारीले जानकारी दिनुभयो ।

यसैबीच क्लबले २४औं वार्षिकोत्सवका अवसरमा विभिन्न व्यक्तिलाई सम्मान गरेको छ । क्लबले खेल पत्रकारिताका माध्यमबाट योगदान पु¥याएको भन्दै पत्रकार नारायण शाहीलाई ‘सहारा खेलकुद पत्रकारिता पुरस्कार’ बाट सम्मान गरेको हो ।

उहाँलाई पोखरा महानगरपालिकाका प्रमुख धनराज आचार्यले २० हजार ५५५ नगदसहित दोसल्ला र ताम्रपत्रबाट सम्मान गर्नुभयो । त्यस्तै, क्लबको मानार्थ सदस्यबाट वरिष्ठ पत्रकार नारायण कार्की र उत्कृष्ट सदस्य सिद्धार्थ थापा मगरलाई सम्मान गरियो ।

कार्यक्रममा महानगरप्रमुख धनराज आचार्यले सामाजिक सेवा एवं खेलका माध्यमबाट सहारा क्लबले पुर्‍याएको योगदानको प्रशंसा गर्नुभयो । कार्यक्रममा वरिष्ठ पत्रकार नारायण कार्की, सम्मानित व्यक्तित्व नारायण शाही, वरिष्ठ उपाध्यक्ष केशवराज बराल, महासचिव रामजीप्रसाद अधिकारी, गण्डकी खेलकुद परिषद्का सदस्य-सचिव तेजबहादुर गुरुङलगायतले क्लबले खेल खेलाउँदै एकेडेमी चलाउनु अरूका लागि पनि अनुकरणीय भएको बताउनुभयो ।

guest
0 Comments
Inline Feedbacks
View all comments

रिलेटेड न्युज

छुटाउनुभयो कि ?