बारा । जनमत नै नभएको पार्टीबाट बारा ४ को प्रतिनिधिसभा सदस्यका लागि उम्मेदवारी दिएका नेकपा एकीकृत समाजवादीका नेता किसान श्रेष्ठ यतिबेला कांग्रेसका नेता फकाउनमा व्यस्त देखिनुभएको छ। टिकट वितरणलाई लिएर असन्तुष्टि जनाउँदै आएको कांग्रेसले सहयोग नगर्ने देखेपछि श्रेष्ठले कांग्रेसका नेता फकाउन थाल्नुभएको हो ।
आफ्नो समेत केही प्रतिशत लगानी रहेको सिमरास्थित होटल क्लासिकमा बोलाउँदै नेता श्रेष्ठले कांग्रेसका नेता कार्यकर्तालाई फकाइरहनुभएको छ । कांग्रेस नेतालाई फकाउने क्रममा श्रेष्ठले तनँहु–१ कांग्रेसका वरिष्ठ नेतालाई छोडेर बारा झरेको बताउने गर्नुभएको छ । तर, उक्त क्षेत्रमा वरिष्ठ नेता पौडेलले टिकट पाउने भएपछि उहाँ बारा आउनु भएको हो । नेता पौडेलले टिकट पाउने निश्चित हुँदा श्रेष्ठ उम्मेदवार हुन नपाउने भएपछि उहाँ बारा झर्नुभएको हो ।
तनँहुबाट टिकट नपाउने देखेपछि बारा ४ मा रोज्नुभएका श्रेष्ठलाई अहिले आफ्नो निर्णय भारी पर्न थालेको छ । नेकपा एसको कमजोर जनमत हुँदाहुँदै पनि ठुलो पार्टीलाई पन्छाएर टिकट हत्याउन सफल भएका श्रेष्ठ अहिले सबैको जनमत जुटाउन प्रयासरत हुनुहुन्छ ।
तर, श्रेष्ठले कांग्रेसको मत भने प्राप्त गर्ने देखिँदैन । यस क्षेत्रमा कांग्रेस बलियो र धेरै जनमत भएको पार्टी हो । बलियो जनमत हुँदाहुँदै पनि कांग्रेसले यस क्षेत्रमा टिकट प्राप्त गर्न सकेन । लगातारको निर्वाचनमा पार्टीले अवसर प्राप्त गर्न नसकेपछि यस क्षेत्रका कांग्रेस कार्यकर्ता रुष्ट छन् ।
स्थानीय तह निर्वाचनमा पनि कांग्रेसले नगर प्रमुख पद माओवादी केन्द्रलाई सुम्पनु परेको थियो । कांग्रेसकै मतबाट माओवादी केन्द्रका उम्मेदवार राजन पौडेल नगर प्रमुखमा निर्वाचित हुँदा कांग्रेसकी उम्मेदवार मेघा शाही पराजित हुनुभएएको थियो । नगर प्रमुख निर्वाचत भएको आधार देखाएर माओवादी केन्द्रले यस निर्वाचनमा प्रदेशसभा ४ (क) तर्फको टिकट समेत प्राप्त गरेको छ ।
कांग्रेसलाई भर्याङ मात्रै बनाउँदा पार्टीको अस्तित्व समाप्त हुने देखेपछि कांग्रेसका अगुवा नेता ईच्छाबहादुर वाग्ले र नारायणी रायमाझीले स्वतन्त्र उम्मेदवारी दर्ता गराउनु भएको थियो । पार्टीका कार्यकर्ताको भावनामाथि निरन्तर प्रहार भएको भन्दै उम्मेदवारी दिएको बताउने रायमाझीले भने पार्टीमा उचित पद पाउने भएपछि चुनावी अभियानबाट पछि हट्नुभएको छ । कार्यकर्ताको भावनाको कदर नभएको बताउने रायमाझीले अन्तिम समयमा पार्टीले पदिय जिम्मेवारी दिने भएपछि काठमाडौं गएर चुनावी अभियानबाट पछि हट्ने घोषणा गर्नुभएको हो ।
स्वतन्त्र उम्मेदवारी दर्ता गराएका वाग्ले भने अझै चुनावी मैदानमा हुनुहुन्छ । वाग्लेले चुनावी प्रचारलाई तीव्र पार्नुभएको छ ।आफ्नो उम्मेदवारी कांग्रेसलाई जीवन्त राख्न भएको वाग्लेको भनाइ छ । कांग्रेसको उम्मेदवार नै नभएको ठाँउमा आफ्नो उम्मेदवारी एउटा विकल्प भएको वाग्लेको भनाइ छ । वाग्लेको प्रचारमा दैनिक सयौं कांग्रेस कायकर्ता र शुभेच्छुक सक्रिय देखिन्छन् ।
यता, केन्द्रीय शक्ति प्रयोग गरेर टिकट ल्याएका श्रेष्ठ भने वाग्लेको उम्मेदवारीले तनावमा हुनुहुन्छ । उहाँले उम्मेदवारी फिर्ता गराउन प्रयास गरेपनि वाग्ले अडिग देखिनुभएको छ। वाग्लेले कांग्रेस कार्यकर्ताको भावनामाथि खेलबाड हुन नदिने बताइरहनुभएको छ ।
-इन्दिप कोइराला
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच