बेलबारी । बेलबारी अन्तर्राष्ट्रिय आमन्त्रण गोल्डकप फुटबल प्रतियोगितामा आयोजक डाँगीहाट युथ क्लबलाई पराजित गर्दै सशस्त्र प्रहरी बल (एपिएफ) फाइनल यात्रामा पुग्न सफल भएको छ । मोरङको लक्ष्मीमार्गमा जारी पाँचौँ संस्करणको पहिलो सेमिफाइनल खेलमा विभागीय टिम एपिएफसँग सोमबार दुई–एक गोलअन्तरको हार बेहोर्नुपर्दा आयोजक उपाधि नजिक पुग्न नसकेको हो । घरेलु मैदानमा आयोजकलाई रोक्दै साबिक विजेता एपिएफले भने प्रतियोगिताको फाइनलमा आफूलाई सुरक्षित गरेको छ ।
घरेलु मैदानमा आयोजकको यात्रामा बाधक बनेको एपिएफले दुवै गोल मध्यान्तरपछि मात्रै गरेको थियो । पहिलो हाफ गोलरहित बराबरीमा सकियो । मध्यान्तरपछि आकर्षक प्रदर्शन गरेको एपिएफ अन्ततः आयोजकलाई पछि पार्दै नतिजा आफ्नो पोल्टोमा पार्न सफल भएको हो ।
कप्तान टोप विष्ट र नवीन लामाले गरेको गोल एपिएफलाई जितका लागि पर्याप्त बन्यो । आशिम राईले फर्काएको सान्त्वना गोल आयोजकलाई फाइनलयात्रा तय गर्न अपुग भयो । अन्ततः रोचक तथा संघर्षपूर्ण खेलको ४९औँ मिनेटमा टोप विष्टको गोलमार्फत् एपिएफले अग्रता लिएको थियो ।
खेलको ६५औँ मिनेटमा नवीन लामाले अर्को गोल थपेपछि एपिएफको जित निश्चित भएको हो । सेन्टरबाट पाएको पासमा अघि बढ्नुभएका उहाँले विपक्षी खेलाडीलाई बिट गर्दै बललाई पोस्टको दिशा दिँदा आयोजक हार स्वीकार गर्नुपर्ने बाध्यतामा पुग्यो ।
आयोजकका काशिम राईले खेलको ७२औँ मिनेटमा सान्त्वना गोल फर्काउनुभएको थियो । उहाँले गरेको प्रहारले सिधै पोस्टको बाटो तय गर्दा एपिएफका गोलरक्षक राजु नगरकोटी असफल बन्नुभयो । अन्ततः आयोजक डाँगीहाटको फाइनलयात्रामा पूर्णविराम लाग्यो । नगरकोटीबाट रिबाउण्ड भएको बलमा समेत विक्रम धिमाल असफल हुनु आयोजकका लागि दुर्भाग्यपूर्ण बन्यो । त्यसबाहेक गोल गर्ने अरू अवसरलाई सदुपयोग गर्न नसक्दा घरेलु मैदानमा नतिजा विपक्षीलाई सुम्पिन आयोजक बाध्य भयो ।
पहिलो सेमिफाइनल खेलको म्यान अफ दी म्याच एपिएफका कप्तान टोप विष्ट घोषित हुनुभयो । उहाँले पुरस्कारबापत पाँच हजार रुपैयाँ र ट्रफी प्राप्त गर्नुभयो । कात्तिक २३ गतेसम्म सञ्चालन हुने प्रतियोगिताको विजेता टिमले आठ लाख एक हजार र उपविजेताले चार लाख एक हजार नगद रुपैयाँ पुरस्कार पाउने आयोजक क्लबका अध्यक्ष विक्रम बान्तवा राईले जानकारी गराउनुभयो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच