नक्कली शरणार्थी प्रकरण : पहिलो दिन दुई अभियुक्तको बयान

काठमाडौं । नक्कली शरणार्थी प्रकरणका अभियुक्तको बयान लिन थालिएको छ । शुक्रबारदेखि जिल्ला अदालत काठमाडौंमा अभियुक्तहरूको बयान लिन थालिएको हो । जिल्ला न्यायाधीश प्रेमप्रसाद न्यौपानेको इजलासमा पहिलो दिन दुईजना अभियुक्तको मात्रै बयान लिइएको छ । शुक्रबार केशव दुलाल र सागर राईको बयान लिइएको छ । यसअघि सानु भण्डारीको बयान लिने तयारी गरिए पनि उहाँले बिरामी भएको बताएपछि दुलाल र राईको बयान लिइएको जिल्ला अदालत स्रोतले जनाएको छ । यसअघि प्रकरणमा पक्राउ परेका सबैलाई अदालतमा उपस्थित गराइएको थियो । पहिलो दिन दुई जनाको मात्रै बयान हुने भएपछि उहाँहरूलाई पुनः हिरासत लगिएको थियो ।

सबैको बयान सकिएपछि अभियुक्तहरूलाई थुनामा पठाउने कि बाहिर राख्ने भन्ने आदेश अदालतले दिनेछ । पक्राउ परेकाहरू सबैको बयान सकेर थुनछेक आदेश आउनेछ । पक्राउ परेका सबैको बयान सक्न कम्तीमा एक साता लाग्ने अदालत स्रोतको दाबी छ ।

नेपालीहरूलाई नक्कली भुटानी शरणार्थी बनाई अमेरिका पठाउने कार्यमा संलग्न ३० जनाविरुद्ध बुधबार सरकारी वकिलको कार्यालयले काठमाडौं जिल्ला अदालतमा मुद्दा दर्ता गरेको थियो । उहाँहरुविरुद्ध ठगी, सरकारी लिखत किर्ते, राष्ट्रियता विरुद्धको अपराध, संगठित अपराध र एकीकृत कसुरमा मुद्दा दायर भएको छ ।

प्रकरणमा नेकपा एमालेका नेता तथा सांसद टोपबहादुर रायमाझी, कांग्रेस नेता तथा पूर्वगृहमन्त्री बालकृष्ण खाँण, उपराष्ट्रपति कार्यालयका बहालवाला सचिव टेकनारायण पाण्डे, पूर्वगृहमन्त्री रामबहादुर थापा बादलका सुरक्षा विज्ञ इन्द्रजित राईलगायत उच्च पदस्थसहति १७ जना पक्राउ गरेका छन् । प्रकरणमा जोडिएको १३ जना भने अझै फरार छन् ।

रिजालसँग सडकमै नोकझोंक
शरणार्थी प्रकरणमा पक्राउ पर्नुभएका शरणार्थी नेता टेकनाथ रिजाल र सर्वसाधारणबीच अदालत परिसरमै नोकझोंक भएको छ । जिल्ला अदालत काठमाडौंमा बयानका क्रममा लगिएका रिजाल प्रहरीको गाडीबाट ओर्लिएर सर्वसाधारणसँग झोक्किनुभएको थियो । सर्वसाधारणले भुटानबाट आएर देश बेच्ने भन्दै आक्रोश पोखेपछि उहाँ पनि गाडीबाट उत्रिएर झोक्किनुभएको थियो । रिजाललाई प्रहरीले गाडीमा हालिसकेपछि ती सर्वसाधारण अझै झोक्किएर ‘हाम्रो देश बेचिएको छ । तपाईं भुटानबाट आएर देश बेच्ने । देश बेचेर उल्टै ठूला कुरा गर्ने ? भनेपछि रिजाल झोक्किनुभएको थियो । उहाँ सर्वसाधारणसँग बाझ्न खोजेपछि प्रहरीले गाडीमा राखेको थियो ।

थप एक अभियुक्त पक्राउ
शरणार्थी प्रकरणमा फरार थप एक अभियुक्तलाई प्रहरीले पक्राउ गरेको छ । यसअघि पक्राउ परेकाहरूको बयान चलिरहेका बेला प्रहरीले शुक्रबार थप एक अभियुक्तलाई पक्राउ गरी अदालतमा उपस्थित गराएको हो । प्रकरणको अनुसन्धानअघि फरार रहनुभएकी अभियुक्त ललितपुरकी–३२ वर्षीया लक्ष्मी महर्जनलाई प्रहरीले पक्राउ गरी अदालतमा उपस्थित गराएको हो । अब उहाँको पनि अदालतमै बयान अघि बढ्ने भएको छ । महर्जनसँगै यो प्रकरणमा पक्राउ पर्नेको संख्या पनि अब १७ पुगेको छ ।

प्रकरणमा एमालेलाई जबरजस्ती मुछ्न खोजियो : ओली
नेकपा एमालेका अध्यक्ष केपी शर्मा ओलीले नक्कली भुटानी शरणार्थी प्रकरणमा एमालेलाई जबरजस्ती मुछ्न खोजिएको आरोप लगाउनुभएको छ । पार्टीका स्थानीय तहका जनप्रतिनिधिहरूलाई प्रशिक्षण कार्यक्रममा बोल्दै उहाँले शरणार्र्थी प्रकरणमा एमाले संलग्न नभएको दाबी गर्नुभयो । प्रकरणमा मुख्य योजनाकार केशव दुलालले बयानका क्रममा ओलीको स्वकीय सचिव, तत्कालीन गृहमन्त्री रामबहादुर थापा लगायतको नाम मुछिएपछि ओलीले आपत्ति जनाउनुभएको हो । ‘नक्कली भुटानी शरणार्थी बनाएर विदेश पठाउने धन्धामा केही व्यक्ति सामेल रहेछन् । अदालतमा केस भएकाले को संलग्न छ म धेरै भन्न चाहन्नँ,’ उहाँले भन्नुभयो, ‘त अहिले सबै बाढी एमालेतर्फ फर्काउन खोजियो । मिडिया र सामाजिक सञ्जालले एमालेविरुद्ध हावाहुरी चलाएको छ । एमाले यसमा कहीँ संलग्न छैन ।’