नयाँदिल्ली । भारतको उत्तरी पहाडी राज्य हिमाचल प्रदेशमा भारी वर्षाका कारण आएको बाढी र पहिरोका कारण पछिल्लो दुई दिनमा मृत्यु हुनेको संख्या ६१ पुगेको छ । सिमलाको समर हिल क्षेत्रमा गएको भीषण पहिरोले क्षति पुर्याएपछि पछिल्लो दुई दिनमा जारी खोजी तथा उद्धार कार्यमा १२ जनाको शव फेला परेको छ भने नौजना अझै हराइरहेका छन् ।
भारी वर्षाका कारण काँगडा जिल्लामा बाँध भत्किने जोखिममा परेको छ । यसले तल्लो क्षेत्रमा बाढीको चिन्ता बढाएको छ । बाढीको जोखिममा परेका आठ सयभन्दा बढी मानिसलाई तल्लो इलाकाबाट सुरक्षित स्थानमा स्थानान्तरण गरिएको छ र कठिन भूगोलमा बाढीको पानीमा फसेका करिब ८० जनालाई उद्धार गरिएको छ ।
भारतीय वायु सेनाका डुंगा र हेलिकोप्टर कठिन भू-भागहरूमा प्रभावितको उद्धारका लागि सेवामा खटिएका छन् । हिमाचल राज्यको राजधानी सिमलाका साथै मण्डी, कुल्लु र काँगडा जिल्ला पनि सबैभन्दा बढी प्रभावित भएका छन् ।
पछिल्लो समयसम्म करिब तीन सडक र राजमार्गको यातायात प्रभावित भएको छ । एक सय वर्षभन्दा पुरानो सिमला–कालका रेल मार्गको लिक केही स्थानमा उखेलिएको छ, पुलहरू भत्किएका छन् भने ट्रान्सफर्मर ढलेका वा बिग्रिएका छन् । धेरै खानेपानी परियोजना पनि प्रभावित भएका छन्, जसले गर्दा राज्यको सामान्य जनजीवन अस्तव्यस्त भएको छ ।
हिमाचल राज्य सरकारी अधिकारीले लगातारको वर्षाका कारण ७२० घर र २४१ पसल पूर्णरूपमा क्षतिग्रस्त भएको र करिब सात हजार १६१ घरमा आंशिक क्षति पुगेको पुष्टि गरेका छन् ।
राज्यका मुख्यमन्त्री सुखविन्दर सिंह सुखुका अनुसार राज्यलाई एक सय अर्ब भारतीय रुपैयाँ (करिब १.२ अर्ब अमेरिकी डलर) बराबरको क्षति भएको थियो र प्रभावित क्षेत्रमा संरचना पुनः निर्माणका लागि कम्तीमा एक वर्ष लाग्ने बताइएको छ । रासस/सिन्हृवा ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच