दशैँपछि पनि सेयर बजार उस्तै

काठमाडौं । दशैँ बिदापछिको पहिलो दिन आइतबार २८ अंकले घटेको सेयर बजार दोस्रो दिन भने ३.०४ अंकले बढेको छ । सोमबार दुई सय ८७ कम्पनीका २८ लाख २४ हजार सात कित्ता सेयर ६९ करोड ४२ लाख २२ हजार दुई सय १७ रुपैयाँमा कारोबार भएका छन् । अघिल्लो दिन दुई सय ८३ कम्पनीका २७ लाख १२ हजार एक सय २३ कित्ता सेयर ७४ करोड २९ लाख २५ हजार रुपैयाँमा कारोबार भएका थिए । कारोबारमा आएका १३ समूहगत सूचकमध्ये तीनवटा क्रमशः उत्पादन तथा प्रशोधनमूलक ०.८०, होटल तथा पर्यटनमूलक ०.४२ र म्युचुअल फण्ड ०.४६ प्रतिशत घटेको छ भने बाँकी १० सूचक बढेको छ । निर्जीवन बिमाको सूचक सर्वाधिक ०.८६, व्यापार ०.८१, फाइनान्स ०.८० र विकास बैंक ०.७४ प्रतिशतले बढेको हो ।

सोनापुर सिमेन्टको सेयर मूल्यमा दोस्रो दिन नकारात्मक सर्किट लागेर प्रतिकित्ता दुई सय ८३ रुपैयाँ ५० पैसामा झरेको छ । उक्त कम्पनीका ११ हजार पाँच सय ५७ कित्ता सेयर ३२ लाख ७९ हजार तीन सय एक रुपैयाँमा खरिदबिक्री भएका हुन् । त्यसैगरी विन्दवासिनी हाइड्रोपावरको ६.६७, अपर सोलु हाइड्रोको ६.५८, लक्ष्मी उन्नति कोषको ४.२९ र ग्लोबल आइएमई ब्यालेन्स्ड फण्ड–१ को सेयरमूल्य ३.९२ प्रतिशतले घटेको छ । पञ्चकन्या माई हाइड्रोपावरको सेयर मूल्य सर्वाधिक ७.८२ प्रतिशतले बढेको छ भने मन्दाकिनी हाइड्रोपावरको सेयरमूल्य ५.८९, सुपर माई हाइड्रोपावरको ५.२६ प्रतिशतले बढेको छ । पाँच कम्पनीको सेयरमूल्य चार प्रतिशतले बढेकोमा इमर्जिङ नेपालको ४.५०, छ्याङ्दी हाइड्रोपावरको ४.४८, रिभर फल्स हाइड्रोपावरको ४.२७, जोशी हाइड्रोपावरको ४.१३ र हिमालयन ऊर्जाको ४.०३ प्रतिशतले बढेको छ ।

कारोबार रकमका आधारमा साधना लघुवित्तको प्रमोटर सेयर तीन करोड ६० लाख ७४ हजारको कारोबार भएको छ भने नेपाल लाइफ इन्स्योरेन्सको तीन करोड २३ लाख, सिद्धार्थ बैंकको प्रमोटर सेयर दुई करोड ९० लाख, नबिल बैंकको दुई करोड ३० लाख र नेसनल हाइड्रोपावरको एक करोड ५३ लाख बराबरको सेयर कारोबार भएको नेपाल स्टक एक्सचेन्ज(नेप्से)ले जनाएको छ । सिद्धार्थ बैंकको प्रमोटर सेयर सर्वाधिक दुई लाख कित्ता कारोबार भएको छ भने दोस्रो स्थानमा एनआइसी एसिया फ्लेक्सी क्याप फण्डको एक लाख ९३ हजार चार सय कित्ता कारोबार भएको छ । नेसनल हाइड्रोपावरको एक लाख १७ हजार चार सय छ कित्ता, साधना लघुवित्तको प्रमोटर सेयर एक लाख १७ हजार चार सय छ कित्ता र प्रभु स्मार्ट फण्डको एक लाख एक हजार छ सय कित्ता कारोबार भएको छ । सोमबार कुल बजार पुँजीकरण २८ खर्ब ९४ अर्ब एक करोड ५४ रुपैयाँमा समेटिएको छ । आइतबार कुल बजार पुँजीकरण २८ खर्ब ७९ अर्ब ६३ करोड ६१ लाख रुपैयाँ थियो ।

दर्ता र नवीकरण शुल्क बुझाउन निर्देशन
नेपाल स्टक एक्सचेन्ज (नेप्से) ले योग्य संस्थागत लगानीकर्ताको दर्ता तथा वार्षिक नवीकरण शुल्क बुझाउन निर्देशन दिएको छ । बुक बिल्डिङ विधिमार्फत् गरिने निष्कासनमा शिलबन्दी बोलकबोल सञ्चालनमा सहभागी हुन योग्य संस्थागत लगानीकर्तालाई दर्ता तथा नवीकरण शुल्क बुझाउन निर्देशन दिएको हो । नेप्सेले नयाँ दर्ता हुने योग्य संस्थागत लगानीकर्ताका लागि दर्ता शुल्क १० हजार र दर्ता भइसकेका योग्य संस्थागत लगानीकर्ताका लागि नवीकरणबापत पाँच हजार रुपैयाँ शुल्क तोकेको छ । संस्थागत लगानीकर्ताले ग्लोबल आइएमई बैंक कमलादीमा रहेको नेप्सेको बैंक खातामा शुल्क बुझाउन सक्ने पनि नेप्सेले जनाएको छ । बुक बिल्डिङ विधिमार्फत् धितोपत्रको प्रारम्भिक सार्वजनिक निष्कासन गर्दा योग्य संस्थागत लगानीकर्ताबाट खरिद आशय मूल्य प्राप्त गर्नुपर्ने व्यवस्था छ । खरिद आशय मूल्यका आधारमा धितोपत्रको बिक्री मूल्य सीमा निर्धारण गरी योग्य संस्थागत लगानीकर्तालाई निष्कासित धितोपत्रको ४० प्रतिशत र सर्वसाधारण लगानीकर्ताका लागि ६० प्रतिशत धितोपत्र निष्कासन गर्नुपर्ने हुन्छ ।