दिल्ली । भारतले टी-२० सिरिजअन्तर्गत दोस्रो खेलमा अष्ट्रेलियामाथि ४४ रनको जित हात पारेको छ । योसँगै पाँच खेलको टी-२० आई सिरिजमा भारतले २-० को अग्रता लिएको छ । जितका लागि २३६ रनको विशाल विजयी लक्ष्य पछ्याएको अष्ट्रेलियाले निर्धारित २० ओभरमा ९ विकेट गुमाउँदै १९१ रन बनायो ।
अष्ट्रेलियाका लागि मार्कस स्टोइनिसले २५ बलमा २ चौका र ४ छक्कासहित सर्वाधिक ४५ रन बनाउनुभयो । टिम डेबिडले २२ बलमा ४ चौका र २ छक्कासहित ३७ रन बनाउनुभयो । एक समय ७.२ ओभरमा ५८ रन ४ विकेटको अवस्थामा पुगेको अष्ट्रेलियालाई स्टोइनिस र डेबिडले ३८ बलमा ८१ रनको साझेदारी गर्दै जितको सम्भावना देखाउनुभएको थियो ।
ओपनर स्टिभ स्मिथ र म्याथ्यु सर्टले १९-१९ रन बनाउनुभयो । पहिलो खेलमा शतक बनाउनुभएका जोश इंग्लिस २ र ग्लेन म्याक्सवेल १२ रनमा आउट भएपछि दबाबमा परेको थियो । कप्तान म्याथ्यु वेड २३ बलमा १ चौका र ४ छक्कासहित ४२ रनमा नट आउट हुनुभयो ।
भारतका स्पिनर रवि विश्रोइले ४ ओभरमा ३२ रन खर्चेर ३ विकेट लिनुभयो । प्रसिद्ध कृष्णाले ४ ओभरमा ४१ रन खर्चेर ३ विकेट लिनुभयो । अर्शलिप सिंह, अक्षर पटेल र मुकेश कुमारले एक-एक विकेट लिनुभयो । त्यसअघि विशाखापट्नमा टस हारेर पहिला ब्याटिङको निम्तो पाएको भारतले निर्धारित २० ओभरमा ४ विकेट गुमाउँदै २३५ रन बनाएको थियो । भारतको जितमा ओपनर रितुराज गायकवाडले ४३ बलमा ३ चौका र २ छक्कासहित सर्वाधिक ५८ रन लिनुभएको थियो ।
बायाँ हाते युवा ओपनर यशस्वी जैसवालले २५ बलमा ९ चौका र २ छक्कासहित ५३ रन बनाउँदै उत्कृष्ट सुरुवात दिलाउनुभयो । दोस्रो विकेटका लागि रितुराज र इशान किशनले ५८ बलमा ८७ रनको साझेदारी गर्नुभएको थियो । इशान किशन ३२ बलमा ३ चौका र ४ छक्कासहित ५२ रनमा आउट हुनुभयो । सूर्यकुमार यादव १० बलमा २ छक्कासहित १९ रनमा क्याच आउट हुनुभयो ।
रिंकु सिंहले ९ बलमा ४ चौका र २ छक्कासहित ३१ रनमा नट आउट रहनुभयो । तिलक बर्मा २ बलमा १ छक्कासहित ७ रनमा नट आउट रहनुभयो । अष्ट्रेलियाका नाथन एलिसले ४ ओभरमा ४५ रन खर्चेर ३ विकेट लिनुभयो । मार्कस स्टोइनिसले १ विकेट लिनुभयो । भारत पहिलो खेलमा २ विकेटले विजयी भएको थियो । अब तेस्रो खेल मंगलबार गुवाहाटी, चौथो खेल शुक्रबार रैपुर र पाँचौँ तथा अन्तिम खेल आइतबार बेंगलोरमा हुनेछ । एजेन्सी ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच