धनगढी । कैलालीको धनगढीमा जारी लिटल फ्लावर प्रिमियर लिग (एलपिएल) को बुधबार सम्पन्न दुई खेलमा क्रिकेट एक्सिलेन्स सेन्टर र कैलाली मल्टिपल क्याम्पस(केएमसी) विजयी भएका छन् । समूह ‘डी’ अन्तर्गतको खेलमा एक्सिलेन्स सेन्टरले जेएस स्पोर्ट्स-११ सुपर स्टार्सलाई तथा समूह ‘बी’ अन्तर्गतको खेलमा कैलाली मल्टिपल क्याम्पसले शारदा सेकेण्डरी स्कुललाई पराजित गर्यो ।
बुधबारको पहिलो खेलमा क्रिकेट एक्सिलेन्स सेन्टरले जेएस स्पोर्ट्स-११ सुपर स्टार्सलाई ३ विकेटले पराजित गर्यो । जेएस स्पोर्ट्स-११ ले दिएको १३२ रनको लक्ष्य क्रिकेट एक्सिलेन्स सेन्टरले ७ विकेट गुमाएर १८.५ ओभरमा पूरा गर्यो । क्रिकेट एक्सिलेन्स सेन्टरका लागि योगेश भाटले सर्वाधिक ३० रन बनाउनुभयो भने अर्जुन घर्तीले २२, राजकुमार शाहले २० तथा सचिन लेखकले १९ रन बनाउनुभयो । जेएस स्पोर्ट्स-११ का बलर साजन बिटालुले ३, विकास सुनारले २ तथा भरत विष्ट र खगेन्द्र महराले १/१ विकेट लिनुभयो ।
यसअघि टस जितेर ब्याटिङ गरेको जेएस स्पोर्ट्स-११ सुपर स्टार्सले २० ओभरमा ९ विकेट क्षतिमा १३१ रन बनायो । जेएस स्पोर्ट्स-११ का लागि राज बमले अर्धशतकीय योगदान दिने क्रममा ६१ रन बनाउनुभयो । उहाँले ४९ बलमा ४ चौका र ४ छक्का प्रहार गर्नुभयो । विकास सुनारले २२, सुनिल चन्दले १६ तथा साजन बिटालुले १४ रन बनाउनुभयो ।
प्लेयर अफ द म्याच घोषित क्रिकेट एक्सिलेन्स सेन्टरका बलर अभिनाश बस्यालले ४ विकेट लिनुभयो जुन क्रममा ४ ओभरमा १ मेडन ओभर गर्दै ११ रन खर्चिनुभयो । मनोज यादवले २ तथा दयानन्द मण्डल र राजकुमार शाहले १/१ विकेट लिनुभयो । समूह ‘डी’ बाट यसअघि नै तीनवटै खेलमा जितका साथ सत्यवती एकेडेमी समूह विजेताका रूपमा सेमिफाइनल प्रवेश गरिसकेको छ । क्रिकेट एक्सिलेन्स सेन्टर दोस्रो चरण प्रवेश गर्न असफल रहृयो जसले तीन खेलमा दुई जित र एक हार बेहोर्यो ।
दोस्रो खेलमा कैलाली मल्टिपल क्याम्पसले शारदा सेकेण्डरी स्कुललाई २ रनले पराजित गर्यो । कैलाली मल्टिपलले दिएको १५० रनको लक्ष्य पछ्याएको शारदा सेकेण्डरी स्कुलले पूरै २० ओभर ब्याटिङ गर्दै १४७ रन बनायो । शारदा सेकेण्डरी स्कुलका लागि दुई ब्याट्सम्यान शंकर बोहरा र सुशान्त कार्कीले अर्धशतक बनाए तापनि जितका लागि पर्याप्त भएन । शंकरले ४३ बलमा ६ चौका मद्दतले ५० रन तथा सुशान्तले २८ बलमा ५ चौका र २ छक्का मद्दतले अविजित ५१ रन बनाउनुभयो । कैलालीको बलिङमा दिपक कपडेल, लोकेन्द्र खनाल र पारस रोकायाले १/१ विकेट लिनुभयो ।
यसअघि टस जितेर ब्याटिङ गरेको कैलाली मल्टिपल क्याम्पसले २० ओभरमा ८ विकेट गुमाएर १४९ रन बनायो । कैलालीका लागि अभिषेक कुँवरले सर्वाधिक ५१ रन बनाउनुभयो । जुन क्रममा प्लेयर अफ द म्याच घोषित उहाँले ३९ बलमा ५ चौका र १ छक्का प्रहार गर्नुभयो । रोशन रावलले २९, लोकेन्द्र खनालले २१ तथा प्रविन सिंह ठकुरीले १५ रन बनाउनुभयो । शारदा सेकेण्डरी स्कुलका सुनिलबहादुर सिंहले ३, अभिषेक मल्लले २ तथा सुनिल सिंह, विश्वास पन्त र सलिन बोहराले १/१ विकेट लिनुभयो ।
समूह ‘बी’ बाट युथ अफ टिकापुर तीनवटै खेलमा जित दर्ता गर्दै सेमिफाइनल प्रवेश गरिसकेको छ । मल्टिपल क्याम्पसले तीन खेलमा १ जितमात्र हात पार्न सक्यो भने शारदा सेकेण्डरी तीनवटै खेलमा पराजित भयो । प्रतियोगिताको सेमिफाइनल पुग्ने तीन टिमको टुंगो लागिसकेको छ । समूह ‘बी’ बाट युथ अफ टिकापुर, समूह ‘सी’ बाट घोडाघोडी क्रिकेट एकेडेमी र समूह ‘डी’ बाट सत्यवती एकेडेमी सेमिफाइनल प्रवेश गरिसकेका छन् ।
सेमिफाइनल पुग्ने अन्तिम टिमको टुंगो बिहीबार धनगढी स्पोर्ट्स क्लब र खप्तड इन्डोर स्पोर्ट्स ट्रेनिङ सेन्टरबीचको खेलपछि लाग्नेछ । उक्त खेलमा धनगढी स्पोर्ट्स क्लब विजयी भए सेमिफाइनल प्रवेश गर्नेछ भने धनगढी पराजित भएको खण्डमा धनगढी र शुक्लाफाँटा ब्ल्याकबक्सबीच नेट रन रेटमा अघि हुने टिम सेमिफाइनल प्रवेश गर्नेछ । समूह ‘ए’ का अन्य दुई टिम कैलाली जिल्ला क्रिकेट क्लब र खप्तड इण्डोर स्पोर्ट्स ट्रेनिङ सेन्टरको सेमिफाइनल पुग्ने सम्भावना समाप्त भइसकेको छ ।
लिटल फ्लावर स्पोर्ट्स क्लबको आयोजनामा सुरु भएको प्रतियोगिताको यो आठौँ संस्करण हो । प्रतियोगिताको उपाधि विजेताले दुई लाख ५५ हजार र उपविजेताले एक लाख २८ हजार रुपैयाँ पुरस्कार पाउनेछन् । प्रतियोगितामा काठमाडौं, रौतहट, दाङ, कैलाली र कञ्चनपुरका गरी १६ वटा टिमको सहभागिता रहेको छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच