जेनेभा । संयुक्त राष्ट्रसंघले हिन्द महासागरको अण्डमान र निकोबार टापू नजिकै डुंगामा सवार महिला र बालबालिकासहित १८५ जना रोहिंगया आप्रबासीको तत्काल उद्धार गर्न शनिबार आहृवान गरेको छ । जहाजमा सवारमध्ये ७० जना बालबालिका र ८८ जना महिला रहेको राष्ट्रसंघीय शरणार्थी निकाय (यूएनएचसीआर)द्वारा जारी विज्ञप्तिमा उल्लेख छ ।
‘कम्तीमा एक दर्जनको अवस्था गम्भीर रहेको आशंका गरिएको छ र एकजनाको मृत्यु भइसकेको छ’, विज्ञप्तिमा भनिएको छ । ‘समयमै उद्धार गरी नजिकको सुरक्षित स्थानमा ओर्लिन नसके धेरै तटीय राज्यहरूको निगरानीका कारण धेरैको मृत्यु हुन सक्छ ।
यूएनएचसीआरका प्रवक्ता बाबर बलोचले एएफपीसँग कुरा गर्दै जहाजमा सवार व्यक्तिहरू रोहिंगया शरणार्थी भएको र एजेन्सीले यस क्षेत्रका सबै तटीय अधिकारीलाई तत्काल उद्धार गर्न अपिल गरिरहेको बताउनुभएको छ । उहाँले भन्नुभयो, ‘यो वास्तवमै एक निराशाजनक अवस्था हो ।’ म्यान्मामा अत्यधिक उत्पीडनमा परेका हजारौं मुस्लिम रोहिंगयाहरू हरेक वर्ष म्यानमार र बंगलादेशका शरणार्थी शिविरबाट जोखिमपूर्ण समुद्री यात्रा गरी मलेसिया वा इन्डोनेसिया पुग्ने प्रयास गर्छन् ।
युएनएचसीआरका अनुसार सन् २०२२ मा दुई हजारभन्दा बढी रोहिंगयाले जोखिमपूर्ण यात्रा गरी विभिन्न मुश्लिम बहुल एशियाली मुलुक पुगेका थिए ।
गत वर्षदेखि यस क्षेत्रमा रोहिंगया शरणार्थीसहित ५७० भन्दा बढी व्यक्तिको हताहत भएको बताइएको छ । अहिले छटपटाइरहेका मानिसहरूको कुरा गर्दा, एजेन्सीले जोड दियो कि ‘जीवन बचाउनको लागि समयमै प्रयास गरेमा ठूलो त्रासदी रोक्न सकिन्छ ।’
‘यो अवस्थाले यस क्षेत्रका सबै राज्यहरूले यस स्तरमा हुने मानवीय विपत्तिबाट बच्न आफ्नो पूर्ण खोजी र उद्धार क्षमता परिचालन गर्नुको महत्वलाई फेरि एकपटक उजागर गर्दछ ।’ रासस/एएफपी ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच