ललितपुर । काठमाडौं महानगरपालिकाकी उपप्रमुख सुनिता डंगोलले नेपालको भाषा, कला, साहित्य, संस्कृतिसम्बन्धी पुस्तकहरूलाई विश्वव्यापीकरण गर्नुपर्नेमा जोड दिनुभएको छ । बिहीबार त्रिभुवन विश्वविद्यालय नेपालभाषा केन्द्रीय विभागको ई लाइब्ररीको समुद्घाटन कार्यक्रममा उपप्रमुख डंगोलले यस्तो जोड दिनुभएको हो ।
कार्यक्रममा बोल्दै डंगोलले नेपालभाषाको साथमा नेपालकै भाषा, कला, साहित्य, संस्कृतिको साथमा नेपालसँग जोडिएका हरेक क्षेत्रको अध्ययन विश्वकै कुनाकाप्चामा बसेर गर्न सकिने गरी अघि बढ्नुपर्ने बताउनुभयो । ‘अहिले २१औं शताब्दीको विकसित प्रविधिको सहायताले हामी एकैछिनमा संसारभरीका हरेक विषयवस्तु संसारको जुनै ठाउँमा बसेर पनि हेर्न सक्छौं । हाम्रो नेपालको बारेमा लेखिएका सामग्री, अध्ययन, अनुसन्धानलाई पनि विश्वव्यापीकरण गरिनुपर्छ’, उपप्रमुख डंगोलले भन्नुभयो । ‘त्रिवि नेपालभाषा केन्द्रीय विभागले बनाएको यो इलाइब्ररीमा काठमाडौं महानगरपालिकाले पनि सहकार्य गर्न पाउँदा खुशी लागेको छ । अघि बढ्नुस्, साथ दिन हामी छौं ।’
विभागकै प्रांगण ललितपुरमा आयोजित एक कार्यक्रमबीच कामपा उपप्रमुख डंगोलले नेपालभाषा केन्द्रीय विभागको इलाइब्ररीको समुद्घाटन गर्नुभएको थियो । काठमाडौं महानगरपालिकाको आर्थिक सहयोगमा विभागले इलाइब्ररी बनाएको हो । कामपाले इलाइब्ररी बनाउन अहिले ५० लाख रुपैयाँ उपलब्ध गराएको र यसलाई अपग्रेड र अपडेट गर्दै जानको लागि महानगरपालिका थप बजेट उपलब्ध गराउने प्रतिबद्धता पनि डंगोलले व्यक्त गर्नुभयो ।
त्यस्तै त्रिभुवन विश्वविद्यालय नेपालभाषा केन्द्रीय विभागका प्रमुख सहप्राध्यापक डा.राजनलाल जोशीले अहिले करिब चार हजार पुस्तकहरू इलाइब्ररीमा अपलोड भइसकेको र यसमा नेपालभाषा, नेवार र नेपालकै भाषा, कला, साहित्य, संस्कृतिसम्बन्धी लेखिएका हरेक पुस्तकहरूरु, पुराना थ्यासफूलगायतका ऐतिहासिक लिखित सामग्रीहरू खोजी खोजी यसमा अपलोड गर्ने लक्ष्य रहेको जानकारी दिनुभयो ।
मन्तव्यको क्रममा विभागका प्रमुख सहप्राध्यापक डा.जोशीले नेपालभाषा क्षेत्र र नेवार समुदायले विभागलाई प्राज्ञिक मञ्चको रुपमा सदुपयोग गर्न पनि आहृवान गनुृभयो । ‘यो विभाग अध्ययन, अनुसन्धानको थलो हो । अध्ययन, अनुसन्धानको क्षेत्रलाई व्यापक र सहज पनि बनाउनलाई हामीले इलाइब्ररी ल्यायौं । नेपालभाषा क्षेत्र र नेवार समुदायले इलाइब्ररीको साथमा यो विभागलाई प्राज्ञिक थलोको रूपमा सक्दो सदुपयोग गर्नुहोस्’ डा. जोशीले भन्नुभयोे ।
कार्यक्रममा उपप्राध्यापक डा. वज्रमुनि वज्राचार्य, पाटन संयुक्त क्याम्पसका प्रमुख डा.लक्ष्मण वीरसिंह कुवँर, रत्नराज्यलक्ष्मी क्याम्पसका प्रमुख प्रा.डा.जीवनधर ज्ञवाली, प्रमुख, नेवाः देय् दबूका अध्यक्ष पवित्र बज्राचार्य, नेपालभाषा केन्द्रीय विभागको विद्यार्थी संगठन लुमन्ति दबूका अध्यक्ष रामेश्वर श्रेष्ठलगायतकले विचार राख्नुभएको थियो ।
सोही कार्यक्रममा पुष्पदेवी छात्रवृत्ति, खैगुली छात्रवृत्ति, योगवीर सिंह विद्वत्वृत्तिलगायतका छात्रवृत्ति प्रदान गरिएको थियो । साथमा नेपालभाषा स्नातकोत्तर विषयमा उत्कृष्ट अंक ल्याउने विद्यार्थी, उत्कृष्ट अनुसन्धानलगायतलाई सत्यहिरा पुरस्कार, पियूष पदक, श्रेष्ठ पदकलगायत पुरस्कार पनि प्रदान गरिएको थियो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच