काठमाडौं । सन्दीप जोराको शतकीय पारी मद्दतमा नेपाल एपिएफ क्लबले प्रधानमन्त्री कप एकदिवसीय राष्ट्रिय प्रतियोगितामा बागमती प्रदेशलाई ८९ रनले पराजित गरेको छ । जितका लागि २४२ रनको मध्यम विजयी लक्ष्य पछ्याएको बागमती ४२.५ ओभरमा १५२ रनमा अल आउट भयो । बागमतीका कप्तान रित गौतमले ८९ बलमा ८ चौकासहित सर्वाधिक ६६ रन बनाउनुभयो । यस्तै ओपनर आशुतोष घिरैयाले ५७ बलमा ५ चौकासहित ४१ रन बनाउनुबाहेक कुनै पनि ब्याटरको प्रदर्शन सम्झनलायक रहेन ।
एपिएफका रोहित पौडेलले ९ ओभरमा १ मेडनसहित २६ रन खर्चेर ४ विकेट लिनुभयो । अभिनाश बोहरा र श्याम ढकालले २-२ विकेट हात पार्नुभयो । त्यसअघि टियु क्रिकेट मैदानमा टस हारेर पहिला ब्याटिङको निम्तो पाएको एपिएफले निर्धारित ५० ओभरमा ९ विकेट गुमाएर २४१ रन बनाएको थियो । एपिएफको जितमा सन्दीप जोराले ११७ बलमा ७ चौका र ५ छक्का प्रहार गर्दै ११२ रनको शतकीय इनिङ खेल्नुभयो । उहाँले १०३ बलमा आफ्नो करिअरको पहिलो शतक पूरा गर्नुभएको थियो ।
एपिएफका ओपनर प्रज्वल शाही १०, कप्तान रोहित पौडेल २, आसिफ शेख १५, सुमित महर्जन ६ रनमा आउट हुनुभयो । छैटौँ विकेटका लागि लोकेश बम र सन्दीप जोराले ६६ रनको साझेदारी गर्नुभएको थियो । लोकेशले ४२ बलमा १ छक्कासहित २७ रन जोड्नुभयो । बागमतीका सूर्य तामाङले १० ओभरमा ३२ रन खर्चेर ४ विकेट लिनुभयो । प्रतिश जिसी र रिजन ढकालले २-२ तथा सोनु देवकोटाले १ विकेट लिनुभयो । बागमती पहिलो खेलमा नेपाल पुलिस क्लबसँग ६८ रनले पराजित भएको थियो । एपिएफको यो पहिलो खेल हो ।
यस्तै भैरहवामा भएको अर्को खेलमा कर्णाली प्रदेशले गण्डकी प्रदेशलाई ७ विकेटले हराएको छ । सिद्धार्थ रंगशालामा गण्डकीले दिएको १२३ रनको लक्ष्य पछ्याएको कर्णालीले ३३ ओभर २ बलमा तीन विकेट गुमाउँदै पूरा गर्यो । कर्णालीका लागि हिमान्सु शाहीले ५३ रनको अर्धशतकीय पारी खेल्नुभयो । ७१ बल खेल्नुभएका उहाँले ५ चौका र २ छक्का प्रहार गर्नुभयो । त्यस्तै निश्चल रावलले २९ रन बनाउँदा कप्तान रविन्द्र शाहीले २० रन बनाउनुभयो । गण्डकीका लागि अंकित न्यौपानेले दुई विकेट लिनुभयो ।
त्यसअघि पहिले ब्याटिङ गरेको गण्डकीले निर्धारित ४५ ओभरमा ९ विकेट गुमाउँदै १२२ रन बनाएको थियो । गण्डकीका लागि अमृत गुरुङ र कमल परियारले समान २१-२१ रन बनाउनुभयो । त्यस्तै आश्विन रानाले १६ रन बनाउँदा चन्द्र पौडेलले १४ रनको योगदान गर्नुभयो ।
कर्णालीका लागि अनुज चुनारा, दिनेश अधिकारी र दिपेन्द्र शाहीले २-२ विकेट लिनुभयो । त्यस्तै प्रकाश जैसी, दिवन पुन र रविन्द्र शाहीले एक-एक विकेट लिनुभयो । जितसँगै कर्णालीले एक खेलबाट दुई अंक जोडेको छ । यता गण्डकीको यो दोस्रो हार हो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच