काठमाडौं । नेकपा (एमाले)का अध्यक्ष केपी शर्मा ओली एकाएक सरकारविरुद्ध आक्रामक रूपमा प्रस्तुत हुनुभएको छ । पछिल्लो केही समयदेखि सरकारसँग नरम देखिनुभएका ओली बिहीबार भने एकाएक आक्रामक बन्नुभएको हो । उहाँले वर्तमान सरकारलाई ‘बुख्याचा’को संज्ञा दिनुभयो । राष्ट्रियसभा सदस्य निर्वाचनको उम्मेदवारी मनोनयनअघि उहाँले सरकारसँगै भागबण्डा प्रयास गर्नुभएको थियो ।
राष्ट्रियसभा निर्वाचनमा आफूहरूलाई शून्य नबनाइदिन उहाँले प्रधानमन्त्री पुष्पकमल दाहाल ‘प्रचण्ड’सँग आग्रह गर्नुभएको थियो । तर, सत्ता गठबन्धनमा कुरा नमिलेपछि एमालेसँग सहकार्य हुन सकेन । एमालेले सरकारका पछिल्ला विवादास्पद क्रियाकलापबारे खासै जमेर अडान नलिएको, बरु राष्ट्रियसभा चुनावमा सिट साझेदारीकै तहसम्म सम्झौता गर्न अग्रसर भएको भन्दै आलोचना भएको थियो ।
त्यसपछि पनि उहाँले सरकारविरुद्ध आक्रामक अभिव्यक्ति दिनुभएको थिएन । पार्टी केन्द्रीय कार्यालय च्यासलमा पार्टीनिकट खेलकुद महासंघको बैठकलाई सम्बोधन गर्दै ओलीले अहिले देश बर्बाद हुँदै गएको आरोप लगाउनुभयो । वर्तमान सरकार भ्रष्टाचारी र भ्रष्टाचारीहरूको संरक्षणमा लागेको उहाँले आरोप लगाउनुभयो । अहिलेको सत्ता गठबन्धनका नेताहरू भ्रष्टाचारी कमिसन तन्त्रीय वंश, निकम्मा गोत्र र देशद्रोही जातका भएको उहाँले बताउनुभयो । ‘हाम्रो देश अहिले अलि अफ्ठ्यारो स्थितिमा छ । हामीले देशलाई जोगाउनु पर्नेछ,’ उहाँले भन्नुभयो, ‘साना-साना अंक जोडेर सबै मिलेर सरकार बनाएका छन् । सरकार टाउकोमा काग पनि बस्छ, सुँगा पनि बस्छ । सबै बस्छ । किनभने चिनिसके यो बुख्याचा हो भनेर । यो खासै केही होइन, कही गर्न सक्दैन भन्ने चिनिसके ।’
यस्तै अवस्था रहिरहे ‘मिसन २०८४’ पर्खिन नसक्ने उहाँले चेतावनी दिनुभयो । ओलीले बर्बादी नरोकिए वर्तमान गठबन्धन भत्काएर भए पनि सरकार सञ्चालन गर्ने आशय व्यक्त गर्नुभयो । ‘यस्तै अवस्था रहिरहे हामीले मिसन ०८४ भनेर पर्खिन नसक्ने स्थिति आउनसक्छ । देश बर्बाद हुन लाग्यो भने कहाँ ०८४ को चुनाव भनेर पर्खेर बसेर हुन्छ,’ उहाँले भन्नुभयो ।
विरोधीहरूले जुनसुकै बेलामा प्रहार गर्नसक्ने भएकाले त्यसका विरुद्धमा आन्दोलनमा उत्रिन तयार रहन पार्टी पंक्तिलाई उहाँले निर्देशित गर्नुभयो । एमालेमाथि प्रहार गर्नसक्ने अवस्था भएकाले आफूहरू निर्णायक लडाइँमा रहेको ओलीको भनाइ थियो । ‘उस्तै परे हामीले गठबन्धन भत्काएर, यो लोभीपापीहरू नभत्किन सक्छन् । यिनीहरूको घाँटी एकैठाउँमा जोडिएको छ । त्यसैले हामीले जनताको बलमा आन्दोलनमा उत्रिनुपर्ने आवश्यक छ । त्यसअघि हामीले आफूलाई संगठित गर्नुपर्छ,’ उहाँले भन्नुभयो ।
उहाँले सरकारविरुद्ध आन्दोलन गर्ने चेतावनी दिएको यो पहिलोपटक भने होइन । बुधबार पनि यस्तै आशयको चेतावनी दिनुभएको थियो । बुधबार पार्टीका नयाँ केन्द्रीय सदस्यहरूलाई निर्देशन दिँंदै ओलीले सरकारको अक्षमता प्रमाणित भइसकेकाले यसलाई हटाउन आन्दोलन चाहिएको बताउनुभएको थियो । च्यासलस्थित एमाले मुख्यालयमा उहाँले भन्नुभएको थियो, ‘विद्युत् व्यापार, देशको भूभाग रक्षाजस्ता संवेदनशील विषयमा सरकार विदेशका सामु कम्फर्टेबल र घुँडाटेकुवा मात्रै बन्यो । मुलुकलाई थप बर्बाद हुनबाट बचाउनका लागि एमालेले ठूलो आन्दोलनको सृष्टि गर्नुपर्ने हुनसक्छ ।’
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच