‘संसद्‌मा केपी शर्मा ओली’ विमोचन

काठमाडौं । पूर्वराष्ट्रपति विद्यादेवी भण्डारीले समकालीन नेतामा नेकपा (एमाले)का अध्यक्ष केपी शर्मा ओली सर्वाधिक प्रतिभाशाली भएको बताउनुभएको छ । ओलीका सम्बोधन समेटेर प्रकाशित भएको पुस्तक ‘संसद्‌मा केपी शर्मा ओली’को मंगलबार काठमाडौंमा विमोचन गर्दै भण्डारीले समकालीन नेतामा ओली पृथक् पहिचान भएको नेता भएको बताउनुभएको हो । राजनीतिका साथै कला, साहित्य, विज्ञान तथा धर्म र दर्शनमा गहन ज्ञान हुनुभएका ओली प्रेरणाको स्रोत भएको उहाँको जिकिर थियो ।

‘केपी शर्मा ओलीज्यू समकालीन नेतामा पृथक् पहिचान बनाउनुभएका नेता हुनुहुन्छ, सर्वाधिक प्रतिभाशाली नेताको रूपमा उच्च स्थान प्राप्त गर्न सफल एमालेको अध्यक्ष र प्रधानमन्त्री भइसकेको व्यक्ति हुनुहुन्छ,’ भण्डारीले भन्नुभयो, ‘राजनीतिका साथै कला साहित्य, धर्म गहन ज्ञान भएको नेता हुनुहुन्छ । सघन अध्ययन र लामो संघर्षले खारिनुभएका नेता हामी सबैका प्रेरणा र ज्ञानको स्रोत हुनुहुन्छ ।’

निष्ठाका साथ राजनीति गरिरहेको छु : ओली
नेकपा (एमाले) का अध्यक्ष केपी शर्मा ओलीले आफूले सदनमा संयमित भएर नबोलेको स्वीकार गर्नुभएको छ । पुस्तक विमोचन कार्यक्रममा उहाँले आफ्नो बोली पुस्तकमा आउने भन्ने भए अलि संयमित भएर बोल्ने सुनाउनुभयो । उहाँले भन्नुभयो, ‘अलि संयमित भएर बोल्नुपर्ने रहेछ । सावधानीको कमी हो । विचारको कमी होइन । मिसाइल ठिक ठाउँमा हानेको छु । एउटा हान्दा पुग्ने ठाउँमा कहिले पाँचवटा हानेको छु ।’

उहाँले आफू सम्पूर्ण रूपमा देश, जनता र लोकतन्त्रप्रति समर्पित भएको बताउनुभयो । लोकतन्त्र स्वतन्त्रता मात्र नभएर आर्थिक, सामाजिक परिवर्तनको पक्ष पनि आफू भएको उहाँको भनाइ थियो । राजनीति आर्थिक, सामाजिक, सांस्कृतिक पक्षसँग सम्बन्धित नभई अघि नबढ्ने ओलीले बताउनुभयो । ‘राजनीति एक्लै राजनीति नै रहँदैन’, ओलीले भन्नुभयो ।

लोकतान्त्रिक प्रणाली पाइयो भन्दैमा खुसी मात्र भएर त्यसलाई परिपूर्ण ढंगले अघि बढाउन सकिएन भने त्यसले अर्थ नराख्ने ओलीले बताउनुभयो । जनताले थाहा पाउने गरी अघि बढाउन सकिएन भने लोकतन्त्र नै खतरामा पर्ने उहाँको भनाइ थियो । जनतामा असन्तुष्टि पैदा भयो भने कुनै पनि व्यवस्था नटिक्ने उहाँले प्रष्ट पार्नुभयो । ‘असन्तुष्टि बढ्दै गएर आक्रोश बन्छ, असन्तुष्ट जनता जति खतरनाक केही हुँदैन’, उहाँले भन्नुभयो ।

माओवादीले जनताको असन्तुष्टिमा टेकेर हतियार उठाई अनेक प्रकारका बेठिक काम गरेको उहाँको दाबी थियो । माओवादीले गलत गरेको कारण जनताले उसको साथ छाडेको ओलीको जिकिर थियो ।

ओलीले राजनीति लोकतन्त्रका लागि चाहिने र लोकतन्त्र देश विकास, जनताको हितका लागि आवश्यक रहेको बताउनभयो । लोकतन्त्रको विकल्प लोकतन्त्र नै हुने उहाँले स्पष्ट पार्नुभयो ।

आफ्ना कुरा माथि पार्नको लागि नभई देश र जनताको स्तर माथि उठाउनको लागि आफूले बोल्ने गरेको उहाँको भनाइ थियो । आफूले हरेक विषय स्पष्टताका साथ राख्ने गरेको उहाँको जिकिर थियो । राष्ट्रिय संकल्प, राष्ट्रिय दृढता र आत्मविश्वास साथ देश निर्माणको काममा लाग्नुपर्नेमा ओलीको जोड थियो ।

ओली अग्लो सांसद् : आचार्य
पूर्वराजदूत नीलाम्बर आचार्यले केपी शर्मा ओली समसामयिक राजनीतिको अग्लो नेता र संसद्को अग्लो सांसद् भएको बताउनुभएको छ । पुस्तकको विमोचन समारोहमा बोल्दै पूर्वराजदूत आचार्यले यस्तो जिकिर गर्नुभएको हो । उहाँले भन्नुभयो, ‘समसामयिक राजनीतिको केपी शर्मा ओली अग्लो नेता हो, संसद्मा केपी शर्मा ओली अग्लो सांसद हो ।’

केपी ओलीमा देश, जनता र राष्ट्रप्रतिको समर्पणभाव प्रखर रूपमा रहेको उहाँको भनाइ थियो । तत्कालीन नेपालको सबै कुरा यस किताबमा रहेको उहाँले बताउनुभयो । १० वर्षे हिंसाको कुनै औचित्य छैन भन्ने कुरा पनि यस किताबले उजागर गरेको आचार्यले बताउनुभयो ।

एमाले र नेपाली कांग्रेसबीच खाडल पुरिनुपर्ने उहाँको धारणा थियो । भ्रष्टाचार, राष्ट्रिय हित, असमान सन्धि पुनरावलोकनलगायत कुरा ओलीले उठाउनुभएको भन्दै उहाँले ओली प्रधानमन्त्री हुँदा इपिजी र सीमाका कुरा उठेका तर अहिले रोकिएका समेत बताउनुभयो । अहिलेका प्रधानमन्त्री प्रचण्डले भारत भ्रमणका क्रममा इपिजीको कुरा उठाए वातावरण बिग्रन्छ भनेर नबोलेको समेत उहाँले सुनाउनुभयो ।

एमाले र कांग्रेस मिलेर सरकार चलाउनुपर्छ : प्रा. दाहाल
वरिष्ठ पत्रकार एवं साहित्यकार प्रा. पुरुषोत्तम दाहालले एमाले र कांग्रेस मिलेर सरकार चलाउनुपर्ने बताउनुभएको छ । विमोचन समारोहमा बोल्दै प्रा. दाहालले कांग्रेस र माओवादी केन्द्रको सरकार बन्नु दुर्भाग्य भएको जिकिर गर्नुभयो । प्रचण्ड र भारतको बिहारका मुख्यमन्त्री नितिश कुमार एउटै भएको बताउँदै उहाँले भन्नुभयो, ‘मेरो त अहिले पनि आग्रह छ, नेपाली कांग्रेस र एमाले मिल्नुहोस् र सरकार चलाउनुहोस्, यो बीचमा कसैले खेल्नै पाउँदैन, देश कमसेकम यो झगडा र अनिश्चितताको स्थितिमा जाँदैन, हाम्रो माओवादीको अध्यक्ष पुष्पकमल दाहाल र नितिश कुमार एउटै रहेछन् ।’

झापा विद्रोहको नालीबेली समेटिएको उपन्यास ‘२८ साल’ पढेपछि ओलीबारे आफ्नो बुझाइ अझ फराकिलो भएको उहाँको भनाइ थियो । अंग लिनेलाई मात्र नभएर दिनेलाई पनि राज्यले सहयोग गर्नुपर्ने भन्दै उहाँले यस विषयमा आवाज उठाउन अध्यक्ष ओलीलाई आग्रह गर्नुभयो । ‘अस्ति कुमार भट्टराईको पुस्तक विमोचनमा ओली आउन सक्नुभएन, त्यो जिम्मा मलाई आइलाग्यो । किताब पूरै पढेपछि मैले केपी ओलीलाई फरक ढंगले मूल्यांकन गरेँ । झापा विद्रोहमा सातजना सरकार पक्षबाट, नौजना झापाली काण्ड मच्चाउने तर्फबाट मारिएका थिए’, उहाँले भन्नुभयो, ‘मान्छे मार्ने कुरामा उहाँको सहमति रहेनछ, उहाँ राष्ट्रवादी हुनुहुँदो रहेछ ।’

‘मान्छे मार्ने कुरामा ओलीको सहमति देखिँदैन । हामी धेरैलाई भ्रम छ, हालै मात्र एकजना (दुर्गा प्रसाईं)ले हजुरबाले मान्छे काटेको भन्नुभयो । किताबमा सबैको बकपत्र छ, कसैले पनि केपी ओलीले मान्छे मार्ने कुरामा सहमति जनाएको भनेका छैनन्,’ प्रा. दाहालले थप्नुभयो । प्रा. दाहालले ओलीको उक्त किताबको समीक्षा गर्नुभएको थियो ।

ओली नेताको नेता : पोखरेल
नेकपा एमालेका महासचिव शंकर पोखरेलले एउटा नेता नायकका रूपमा कसरी बदलिन्छ भन्ने कुरा केपी ओलीको जीवनीबाट सिकिने बताउनुभएको छ । पुस्तकको विमोचन कार्यक्रममा बोल्दै महासचिव पोखरेलले केपी ओली नेताबाट नेताको नेता बन्नुभएको जिकिर गर्नुभयो । नेपालको लोकतन्त्र कस्ता कस्ता घटनाबाट गुज्रियो भन्ने कुरा केपी ओलीको अभिव्यक्ति र जीवनीबाट बुझिने उहाँको भनाइ थियो । ओलीले कानुनी राज्य, मानव अधिकार, सुशासन र शान्ति सुरक्षाको पक्षमा दिएको अभिव्यक्तिले नेपालको लोकतन्त्रलाई कसरी अघि बढाउने भन्ने बाटो देखाएको पोखरेलले बताउनुभयो ।

लिपुलेक, लिम्पियाधुरा नेपालको हो भनेर संसद्मा सो विषय भित्र्याउने पहिलो नेता केपी ओली नै भएको र आफ्नै प्रधानमन्त्री कालमा सो भूमि समेटिएको नक्सा प्रतिनिधि सभाबाट सर्वसम्मतिले अनुमोदन गराउनुभएको पोखरेलले स्मरण गराउनुभयो । देशको मिचिएको भूमिको रक्षा तथा परराष्ट्र नीतिमा ओली स्पष्ट हुनुभएको पोखरेलको भनाइ थियो । ‘उहाँ राष्ट्रलाई नेतृत्व गर्ने नायकका रूपमा स्थापित हुनुभयो’, पोखरेलले भन्नुभयो ।

ओलीले फेरि देशको नेतृत्व गर्नुपर्छ : उपाध्याय
प्राध्यापक जगतप्रसाद उपाध्यायले नेकपा एमालेका अध्यक्ष केपी शर्मा ओलीले फेरि देशको नेतृत्व गर्नुपर्ने बताउनुभएको छ । पुस्तकको विमोचन समारोहमा बोल्दै प्राध्यापक उपाध्यायले ओलीबाहेक अरूले यो देशलाई अगाडि बढाउन नसक्ने जिकिर गर्नुभएको हो । समकालीन राजनीतिक नेतामा देशको कुशल नेतृत्व गर्नसक्ने क्षमता केपी ओलीमा मात्र रहेको उहाँको भनाइ थियो । नेपाल प्रज्ञा प्रतिष्ठानका पूर्वसदस्य सचिवसमेत रहनुभएका उपाध्यायले ओली प्राज्ञिक क्षेत्रलाई धेरै माया गर्ने नेता भएको सुनाउनुभयो । केपी ओलीले संसद्मा गरेको भाषणमा लयात्मक भाव, लोक भाव, हास्य रस, जनभावना, राष्ट्रभक्तिलगायत भाव पाइने उहाँको दाबी थियो ।

गोलघरलाई केपी ओली राष्ट्रिय संग्रहालय घोषणा गर्न माग
केन्द्रीय कारागार जगन्नाथदेवलमा रहेको गोलघरलाई केपी शर्मा ओली राष्ट्रिय संग्रहालय घोषणा गर्न माग गरिएको छ । अन्वेषण केन्द्र काठमाडौंले मंगलबार आयोजना गरेको ‘संसद्मा केपी शर्मा ओली’ ग्रन्थ लोकार्पण कार्यक्रममा आयोजकले गोलघर र त्यसले ओगटेको क्षेत्रलाई केपी शर्मा ओली राष्ट्रिय संग्रहालय घोषणा गर्न माग गरेको हो । गोलघरमा ओलीले पञ्चायतविरुद्धको संघर्षमा १४ वर्ष जेलजीवन व्यतीत गर्नुभएको थियो । ग्रन्थका सम्पादक सानुमैया खड्काले गोलघरलाई केपी शर्मा ओली राष्ट्रिय संग्रहालय घोषणा गर्न माग गर्नुभएको हो । उहाँले बिपी कोइरालाले सात वर्ष सुन्दरीजलमा जेलजीवन बिताउँदा बिपी संग्रहालय घोषणा हुनसक्छ भने पञ्चायतविरुद्ध जनता र प्रजातन्त्रका लागि १४ वर्ष कठोर जेलजीवन बताएका नेपाली राजनीतिका शीर्ष व्यक्तित्व ओलीको नाममा गोलघरलाई ओली संग्रहालय बनाउन सकिने तर्क राख्दै माग गर्नुभएको थियो ।

सम्पादक खड्काले संसद्‌मा ओलीका सम्बोधनमा प्रयुक्त प्रतीक र विम्ब शीर्षकमा विधावारिधिका लागि शोध गर्नुभएको छ । त्यसक्रममा ओलीले ०४८ देखि ०७४ सम्म संसद्मा गरेको सम्बोधनलाई शोधार्थी खड्काले पुस्तकाकारको रूप दिनुभएको हो । पुस्तकमा ओलीले संसद् बैठकमा भाग लिँदा सम्बोधन गरेको १७३ वटा सम्बोधन समेटिएको छ । कार्यक्रममा सहप्राध्यपक डा. हेमनाथ पौडेल, डा. कल्याण रोक्का लगायतले ओलीको राजनीतिक, सामाजिकसहित बहुआयामिक व्यक्तित्वका साथै कृतिमाथि समीक्षा गर्नुभएको थियो ।