नवलपरासी । नारायणगढ-बुटवल सडकखण्ड पाँच वर्ष पूरा हँुदासमेत ४८.५० प्रतिशतमात्रै काम भएको छ । सडक आयोजनाको ठेक्का पाएको चाइना स्टेट कम्पनीले तीन वर्ष छ महिनामा पूरा गर्नुपर्ने आयोजनाको दुर्ईपटक म्याद थप हुँदा पनि काम कछुवा गतिमै छ । एसियाली मापदण्डको राजमार्ग बनाउने गरी सुरु गरिएको नारायणगढ-बुटवल सडकखण्डको निर्माण कार्यमा ढिलासुस्ती गरेपछि बर्दघाटका स्थानीय सरोकारवालाले आक्रोश व्यक्त गरेका छन् ।
बर्दघाट प्रेस क्लबको आयोजना, बर्दघाट खानेपानी र बर्दघाट उद्योग वाणिज्य संघको समन्वयमा राजमार्ग निर्माणमा भएको ढिलासुस्ती र यसले पारेको प्रभावका विषयमा सरोकारवालासँगको छलफल तथा अन्तरक्रिया कार्यक्रमका वक्ताहरूले आक्रोश व्यक्त गरेका हुन् ।
२०७५ साल पुस ४ गते सम्झौता गरी माघ २४ गतेदेखि सुरु गरिएको आयोजना तीन वर्ष छ महिनाभित्रमा सम्पन्न गर्नुपर्ने थियो तर दुई÷दुईपटक म्याद थप्दासमेत आयोजना नसकिने निश्चितजस्तै देखिन्छ । म्याद सकिएकै आधारलाई हेर्दा पनि २०८० असारसम्म आयोजना सक्नुपर्ने थियो ।
निर्माण कार्यमा अपनाउनुपर्ने सावधानी नअपनाएको देखिएपछि पटक-पटक पत्र काट्दा पनि अटेर गरेको नारायणगढ-बुटवल सडकखण्डका रेसिडेन्ट इञ्जिनियर शशी श्रेष्ठले बताउनुभएको छ । राष्ट्रिय गौरवको आयोजनाअन्तर्गत नारायणगढ-बुटवल सडकखण्ड एक सय १३ किलोमिटर चारलेनमा विस्तार गर्ने सम्झौता भएको थियो ।
निर्माण कार्यको जिम्मा लिएको चाइना स्टेट कम्पनीका कन्ट्र्याक सहायक म्यानेजर विनित कोइरालाले काम गर्ने सवालमा केही कमजोरी रहेको भन्दै आफूले समस्या सम्बन्धित निकायमा पुर्याउने प्रतिबद्धता व्यक्त गर्नुभयो । बर्दघाट नगर उपप्रमुख रुद्रप्रकाश उपाध्यायले सडक निर्माण कार्य ढिला हुँदा स्थानीयवासीले निकै सास्ती खेप्नुपरेको बताउनुभयो । उहाँले नगरले आयोजनालाई उपलब्ध गराउनुपर्ने नदीजन्य वस्तु उपलब्ध गराउन सक्ने जति उपलब्ध गराउन नगरपालिका तयार रहेको प्रतिबद्धता जनाउनुभयो ।
निमित्त प्रमुख जिल्ला अधिकारी प्रकाश देवकोटाले नारायणगढ-बुटवल सडकखण्डको निर्माण कार्यका लागि आवश्यक पर्ने नदीजन्य वस्तुको सहजताका लागि पहल गर्नेदेखि लिएर अनुगमनका साथै गुणस्तरका सवालमा आवश्यक कारबाही गर्ने बताउनुभयो । बर्दघाट उद्योग वाणिज्य संघका अध्यक्ष लेखनाथ न्यौपानेले निर्माण कम्पनी सधैँ विभिन्न वहाना बनाएर पन्छिने गरेको आरोप लगाउँदै निर्माणमा ढिलासुस्ती गरेमा व्यवसायी जस्तोसुकै कदम चाल्न पनि बाध्य हुने चेतावनी दिनुभयो ।
बर्दघाट खानेपानीका अध्यक्ष दिपक लम्सालले सडक निर्माणका क्रममा आयोजना कम्पनीसँग राम्रो समन्वय भई समयमै खानेपानीका पाइपलाइन विस्तार र व्यवस्थापन गर्न सफल भएको बताउनुभयो । बर्दघाट बजार विकास समितिका अध्यक्ष तारा गौतम र पञ्चनगर बजार विकासका अध्यक्ष रामजी चापागाईंले निर्माण कार्य ढिलो भएकोमा एकले अर्काेलाई दोषारोपण गर्नुभन्दा सम्बन्धित निकायले नै जिम्मेवारी वहन गर्नुपर्नेमा जोड दिनुभयो ।
संसारकोट हरियाली सामुदायिक वनका अध्यक्ष कमल पराजुली र पारिजात सामुदायिक वनका अध्यक्ष कमानसिंह थापाले निर्माण कम्पनीले सामुदायिक वनसँग सहकार्य नै नगरी काम गरिरहेको आरोप लगाउनुभयो । वनसँग एउटा सम्झौता गर्ने, काम अर्कै गर्ने गरेको उहाँको भनाइ थियो । सम्झौताअनुरूप काम नभएपछि काम रोक्न बाध्य भएको थापाले बताउनुभयो ।
नेपाल विद्युत् प्राधिकरण बर्दघाट वितरण केन्द्रका गजेन्द्र चौधरीले आयोजनाले गर्नुपर्ने विद्युतीकरणका काम समयमै नगर्दा त्यसको अपजस विद्युत्लाई आएको भन्दै विद्युत्को काम भनेको लाइन काट्ने र लाइन दिनेमात्र भएको र बाँकी काम सडक डिभिजन कार्यालयको भएको बताउनुभयो । नेपाल टेलिकम बर्दघाट शाखाका बाबुराम आचार्यले सडकमा टेलिकमका कारण कुनै अवरोध नरहेको बताउनुभयो ।
बर्दघाट नगरपालिका ४ का वडाध्यक्ष वेदविना तिवारीले नागरिकले पनि सम्बन्धित निकायलाई झकझक्याउनुपर्ने भन्दै नगरपालिका र मातहतका निकायबाट आवश्यक समन्वय भइरहेको जिकिर गर्नुभयो । उपभोक्ता हित संरक्षण मञ्च बर्दघाट नगर समिति अध्यक्ष हुमनाथ आचार्यले सडकका खाल्टाखुल्टीका कारण शिक्षकको निधन भएको स्मरण गर्दै प्रदूषणका कारण मानव स्वास्थ्यमा गम्भीर असर परेको बताउनुभयो ।
कार्यक्रममा सहभागी बर्दघाट नगरका स्थानीयवासी तथा व्यापारीले अव्यवस्थित बिजुलीका पोल व्यवस्थापन, सडक निर्माणका क्रममा भएका खाल्टाखुल्टी, रुख कटान, इन्टरनेट तथा केबलका तार व्यवस्थापन, हिलो, धुलोलगायतका समस्यादेखि निरन्तर खबरदारी गर्नेसम्मका विषय उठान भएका थिए ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच