काठमाडौं । नेपाल पुलिस क्लबकी सुस्मिता थापा र बागमती प्रदेशका रिक्साङ तामाङ आठौँ राष्ट्रिय प्रोफेसनल तेक्वान्दो आइटिएफ च्याम्पियनसिपमा च्याम्पियन हुनुभएको छ । रामेछाप आइटिएफ तेक्वान्दो संघको आयोजना तथा खाँडादेवी गाउँपालिका र खाँडादेवी गाउँपालिकाको वडा-७ को सहआयोजनामा भएको प्रतियोगितामा सुस्मिता महिलामा र रिक्साङ पुरुषतर्फ च्याम्पियन हुनुभएको हो ।
सुस्मिता र रिक्साङले च्याम्पियन ट्रफीका साथै ५० हजार रुपैयाँ नगद प्राप्त गरेको आयोजक रामेछाप आइटिएफ तेक्वान्दो संघका सचिव सपूत मोक्तानले जानकारी दिनुभयो । सुस्मिताले फाइनलमा कोशी प्रदेशकी कुसुम राजवंशीलाई हराउनुभयो । रिक्साङले भने फाइनलमा आयोजकका निर्मल लामालाई पराजित गर्नुभयो । दोस्रो स्थानमा सीमित कुसुम र निर्मलले ४० हजार रुपैयाँ नगद पुरस्कारमा चित्त बुझाउनुपर्यो ।
पुरुषतर्फ नेपाल पुलिस क्लबका श्रीप्रसाद बुढाले तेस्रो स्थान प्राप्त गर्नुभयो । महिलामा भने आर्मीकी निकिता धिमाल तेस्रो हुनुभयो । यी दुवैले नगद ३० हजार रुपैयाँ, ट्रफी र पदक प्राप्त गर्नुभयो । प्रतियोगिताका विजेतालाई खाडादेवी गाउँपालिकाका अध्यक्ष ज्ञानकुमार श्रेष्ठ, वडा-७ का अध्यक्ष सिरे तामाङले पुरस्कृत गर्नुभएको थियो । उक्त कार्यक्रमका प्रमुख अतिथि खाडादेवी गाउँपालिकाका अध्यक्ष ज्ञानकुमारले देशमा खेल क्षेत्र विकासका लागि हरेक स्थानीय तहको भूमिका अहं हुने र त्यसका लागि सबै स्थानीय तहले प्रयत्न गर्नुपर्ने आवश्यकता औँल्याउनुभयो ।
कार्यक्रमको अध्यक्षता गर्नुभएका वडा-७ का अध्यक्ष सिरे तामाङले आफ्नो वडाले खेलाडीहरूलाई प्रोत्साहनका साथै खेलकुद विकासका कामहरू गरिरहेको उल्लेख गर्दै आगामी वर्षहरूमा पनि प्रोफेसनल आइटिएफ तेक्वान्दो खेल प्रतिस्पर्धालाई सहयोग गर्ने प्रतिबद्धता व्यक्त गर्नुभयो । प्रतियोगितामा आयोजक, सात प्रदेशका साथै तीन विभागीय टोली आर्मी, पुलिस र एपिएफका खेलाडीले प्रतिस्पर्धा गरेका थिए ।
प्रत्येक टोलीले छनोटबाट समान दुई पुरुष र दुई महिला खेलाडीमात्र प्रतिस्पर्धा गराउन पाउने प्रावधानअनुरूप प्रतिस्पर्धा गरेको आयोजक रामेछाप आइटिएफ तेक्वान्दो संघका सचिव सपूत मोक्तानले जानकारी दिनुभयो ।
प्रतियोगिताको उद्घाटन राष्ट्रिय खेलकुद परिषद् (राखेप) का बोर्ड सदस्य एवं दक्षिण एसियाली आइटिएफ तेक्वान्दो महासंघका उपाध्यक्ष अञ्जन धमला, नेपाली राष्ट्रिय टिम तयारी समितिका निर्देशक दीपक विष्ट र नेपाल आइटिएफ तेक्वान्दो महासंघका अध्यक्ष प्रवीणकुमार कार्कीले गर्नुभएको थियो । स्वास्थ्यका लागि खेलकुद, राष्ट्रका लागि खेलकुद भन्ने मूल नाराका साथ भएको प्रतियोगितामा देशभरका ४४ खेलाडीले प्रतिस्पर्धा गरेका थिए ।
संघका अध्यक्ष धनराज मोक्तानको सञ्चालनमा भएको प्रतियोगितामा महिलातर्फ ४७ देखि ५५ र पुरुषमा ५० देखि ५७ केजी तौल समूहका खेलाडीले प्रोफेसनल आइटिएफ तेक्वान्दोमा प्रतिस्पर्धा गरेका थिए ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच