काठमाडौं । मुलुकको सबैभन्दा पुरानो र ठूलो प्रजातान्त्रिक दल नेपाली कांग्रेसको महासमिति बैठक फागुन ७ देखि १० गतेसम्म ललितपुरको गोदावरीमा हुँदै छ । बैठकमा उपसभापति पूर्णबहादुर खड्काले नीति प्रस्ताव, महामन्त्री गगन थापाले सांगठनिक प्रतिवेदन र अर्का महामन्त्री विश्वप्रकाश शर्माले समसामयिक प्रतिवेदन प्रस्तुत गर्ने कार्यसूची छ । तर, पार्टीका मुख्य प्रस्तावलाई चुनौती दिनेगरी हिन्दू धर्म पक्षधर केही नेता र विभिन्न युवा नेता तथा समूहहरूले पूरक प्रस्ताव प्रवेश गराउन सक्रिय रहेका छन् । शुक्रबार सम्पन्न पार्टी केन्द्रीय समिति बैठकले विभिन्न चारवटा प्रस्तावलाई औपचारिक रूपमा अन्तिम रूप दिएको छ । तर, केन्द्रीय सदस्य शंकर भण्डारीको संयोजकत्वका सनातन हिन्दूराष्ट्र नेपाल स्थापना महाअभियानले महासमिति बैठकका लागि घोषणापत्र नै जारी गरेको छ । शनिबार काठमाडौंमा एक समारोहबीच भण्डारी नेतृत्वको समूहले घोषणापत्र सार्वजनिक गरेको हो । त्यसो त शुक्रबार बसेको केन्द्रीय समिति बैठकमा नै २२ जना केन्द्रीय सदस्यहरूले हिन्दूराष्ट्रको पक्षमा निर्णय गर्न दबाबस्वरूप हस्ताक्षरसहित प्रस्ताव राखेका थिए । अघिल्लो पटकको महासमिति बैठकमा हिन्दूराष्ट्रका लागि भन्दै हस्ताक्षर बुझाए पनि पार्टीले स्वीकार गरेको थिएन ।
पार्टीले संस्थागत रूपमा राजनीतिक, सांगठनिक सहितका प्रस्ताव ल्याउने तयारी गरे पनि अरू नेताले पनि विभिन्न माग राख्दै आ–आफ्नो एजेण्डा अगाडि सार्ने तयारी गरेका छन् । पार्टीको संस्थापन इतर समूहका नेता डा. शेखर कोइरालाले पनि महासमितिका लागि अनलाइनमार्फत सुझाव दिन नागरिकमा अपिल गर्नुभएको छ । युवा नेताद्वय नैनसिंह महर र भुपेन्द्रजंग शाहीले महासमितिमा युवाको एजेण्डा अगाडि सार्न सुझाव माग गर्नुभएको छ । महरले प्रवासमा रहेका नेपालीको सुझावलाई समेट्न जनसम्पर्क समितिका पदाधिकारीसँग छलफल गर्नुभएको छ । शाहीले देश दौडाहाका क्रममा नागरिकले भोग्नुपरेका समस्यालाई लिएर १५ बुँदामा प्रस्ताव तयार गरेको बताउनुभएको छ । अन्य कतिपय नेताहरूले पनि महँगी, मूल्यवृद्धि, बेरोजगारी, पार्टीमा अवसर नपाउने सहितका विषयलाई लिएर महासमिति बैठकमा पूरक प्रस्ताव लिने तयारी गरेका छन् । कांग्रेसमा चुनावी गठबन्धन गर्न नहुने पक्षमा मत बलियो छ । केन्द्रीय कार्यसमितिको बैठकमा अधिकांश सदस्यहरूले तल्ला तहका नेता तथा कार्यकर्ताको भावनाको प्रतिनिधित्व गर्दै चुनावी गठबन्धनको विपक्षमा मत प्रकट गरेका छन् ।
महामन्त्रीद्वय थापा र शर्माले प्रस्तुत गरेको दस्ताबेजमा चुनावी गठबन्धनमा जाँदा कांग्रेसको लोकप्रिय मत घटेको निष्कर्ष निकाल्नुभएको छ । चुनावअघिको गठबन्धनमा जान नहुनेमा उहाँहरूको साझा मत छ । निर्वाचन प्रणाली संशोधन गर्नुपर्ने मुद्दा पनि कांग्रेसमा जोडदार बन्दै गएको छ । मिश्रित निर्वाचन प्रणालीका कारण कुनै एक दलको बहुमत आउने सम्भावना नहुने र त्यसले सरकारमा स्थिरता नहुने तर्क कांग्रेसका अधिकांश नेताहरूले गरेका छन् । केन्द्रीय सदस्य रामहरि खतिवडाले निर्वाचन प्रणाली संशोधन गर्नुपर्ने पक्षमा केन्द्रीय कार्यसमितिमा झण्डै नब्बे प्रतिशत सदस्यहरू रहेको दाबी गर्नुभएको छ । तर, यस विषयमा औपचारिक रूपमै महासमितिमा प्रस्ताव लिने कुनै पनि नेताले सार्वजनिक गरेका भने छैनन् । सदस्यहरूले पार्टीमा न्यायोचित अवसरको वितरण हुन नसकेको आवाजलाई पनि मुखरित बनाएका छन् ।
महासमिति बैठकमा उठाउने एजेण्डालाई लिएर केन्द्रीय कार्यसमितिको बैठकबाहिर पनि विभिन्न भेला र छलफल हुन थालेका छन् । संस्थापनइतर पक्षका युवा समूहको भेलाले महासमितिमा राष्ट्रिय, पार्टीको आन्तरिक सवाल र जनजीविकाको सवालमा गम्भीर रूपमा बहसका लागि एजेण्डा तय गर्न छलफल गरेका छन् ।
सनातन हिन्दूराष्ट्र नेपाल स्थापना महाअभियानको घोषणापत्र सार्वजनिक
कांग्रेसका केन्द्रीय सदस्य शंकर भण्डारीको अगुवाइमा सनातन हिन्दूराष्ट्र नेपाल स्थापना महाअभियानले घोषणापत्र सार्वजनिक गरेको छ । शनिबार बानेश्वरमा आयोजित एक कार्यक्रममार्फत संगठनले घोषणापत्र सार्वजनिक गरेको हो । भण्डारी नेतृत्वको सो संगठनले मुलुकमा हिन्दूराष्ट्र स्थापना गर्ने अभियान सञ्चालन गर्दै आएको छ । महाअभियानको औपचारिक रूपमा घोषणा भएको जानकारी दिँदै नेता भण्डारीले महाअभियानमा साथ दिनका लागि पार्टीका नेता, महासमिति सदस्य तथा महाधिवेशन प्रतिनिधिसहित सम्पूर्ण कार्यकर्ता र शुभेच्छुकहरूमा आहृवान गर्नुभएको छ । ९४ प्रतिशतभन्दा बढी वैदिक सनातन हिन्दू धर्म र संस्कृतिमा आस्था र विश्वास राख्ने जनताको भावनालाई पूरै उपेक्षा गरी राष्ट्रिय एकताका आधारहरू, आपसी सद्भाव, सहिष्णुता, सहअस्तित्वको अभ्यासमा खलल पुग्नेगरी नेपाली कांग्रेस धर्म निरपेक्षताको पक्षमा उभिएको विषयप्रति उनीहरूको असहमति छ । सनातन हिन्दूराष्ट्र नेपाल स्थापना महाअभियान घोषणा गर्दै उनीहरूले पार्टीको महासमिति बैठकमा हिन्दूराष्ट्रको एजेण्डा प्रवेश गराउने तयारी गरेका छन् । पार्टीको महासमिति बैठकमा हिन्दूराष्ट्रको विषय एजेण्डाको रूपमा आत्मसाथ गरेर अन्य राजनीतिक दल र आम समुदायसँग छलफल अगाडि बढाउने आशा गरेको स्पष्ट पार्दै भण्डारीले भन्नुभयो, ‘हलबाहिर ब्यानरसहित तपाईंहरूले ऊर्जा दिने कि नदिने ? बाहिरको ऊर्जाले हामी भित्र तताउछौँ, राष्ट्रलाई हिन्दूराष्ट्रमा फर्काएर देखाउँछौँ । पहिले आफ्नो जग, आफ्नो घर बलियो बनाऔँ । हिम्मत राख्नुहोस् सबै जना, धर्नामा बसौँ ।’
प्रदेश र जिल्ला कार्यसमितिका सभापतिलाई सहभागी गराउने
नेपाली कांग्रेसले महासमितिका सदस्य नरहेका प्रदेश कार्यसमितिका सभापति, जिल्ला कार्यसमितिका सभापति र भ्रातृ संघ तथा शुभेच्छुक संस्थाका केन्द्रीय अध्यक्षहरूलाई महासमिति बैठकमा सहभागी गराउने भएको छ । प्रदेश कार्यसमितिका सभापतिसहित महासमिति सदस्य नरहेकाहरूलाई आमन्त्रित सदस्यका रूपमा सहभागी गराउने मुख्यसचिव कृष्णप्रसाद पौडेलले बताउनुभयो ।
शिक्षकहरूलाई पार्टीको सदस्यता दिने काम बन्द गर्छौं : पाण्डे
नेपाली कांग्रेसका सहमहामन्त्री बद्री पाण्डेले शिक्षकहरूलाई पार्टीको सदस्यता दिने काम बन्द गर्ने दाबी गर्नुभएको छ । नेपाली कांग्रेसले विगतमा शिक्षकहरूलाई राजनीतिको केन्द्रमा राखेको तर अब त्यस्तो गर्न नहुनेमा जोड दिँदै पाण्डेले भन्नुभयो, ‘शिक्षकहरूलाई राजनीतिक औजारको रूपमा प्रयोग गरिएकै हो । त्यो हाम्रो कमजोरी भएको हो । अब यसलाई सुधार गर्नुपर्छ । शिक्षकलाई राजनीतिक दलको सदस्यता दिन बन्द गर्नुपर्छ । अब कांग्रेसले सदस्यता दिने काम गर्दैन ।’
महासमितिबाट प्रभावकारी भिजन देखाउनुपर्छ : हुमागाईं
नेपाली कांग्रेसका केन्द्रीय सदस्य शिवप्रसाद हुमागाईंले देशमा देखिएका समस्याको समाधान पार्टीले दिनसक्छ भनेर महासमितिबाट प्रभावकारी भिजन देखाउन सक्नुपर्ने बताउनुभएको छ । महासमितिमा प्रस्तुत हुने नीति, सांगठनिक, समसामयिक राजनीतिक र आर्थिक प्रस्तावमा सुझाव दिँदै नागरिकसँग जोडिएका सरोकारका विषयमा कांग्रेसले महासमितिबाट प्रभावकारी भिजन दिन सक्नुपर्ने जिकिर गर्दै हुमागाईंले भन्नुभयो, ‘किसानका मुद्दा, युवा पलायनको मुद्दा, रोजगारमूलक शिक्षा र सुलभ स्वास्थ्य पहुँचका मुद्दा यतिखेर मुख्य हुन् । त्यसैले अत्यन्तै गम्भीर भएर महासमिति सक्दा सबै नीतिमा कांग्रेसले मात्रै समाधान दिनसक्छ भनेर महासमितिले एउटा प्रभावकारी भिजन देखाउन सक्नुपर्छ ।’
महासमितिमा छुट्टै प्रस्ताव पेस गर्छु : शर्मा
नेपाली कांग्रेसका महासमिति सदस्य एवं सांसद सुनील शर्माले आसन्न महासमिति बैठकमा आफूले पार्टी रूपान्तरणका निम्ति छुट्टै प्रस्ताव पेस गर्ने जानकारी दिनुभएको छ । शनिबार काठमाडौंमा पत्रकार सम्मेलन गरी शर्माले कांग्रेसको नेतृत्वमा जनमुखी सरकार निर्माण गर्न जनताको भरोसायोग्य पार्टी बनाउनुपर्ने सहितका विषय समेटिएको छुट्टै प्रस्ताव पेस गर्ने जानकारी दिनुभएको हो । कांग्रेसले जनप्रिय, जनताको भरोसायोग्य पार्टी बनाउने र आफ्नो नेतृत्वमा जनमुखी सरकार निर्माण गर्ने कुरामा विलम्ब गर्न नहुने उहाँको जिकिर छ । वडादेखि केन्द्रसम्मको सभापति र दुईतिहाइ पदाधिकारी निर्वाचित गर्ने र एकतिहाइ पदाधिकारी सभापतिले मनोनीत गरी समिति बनाउने व्यवस्था गर्नुपर्ने र सभापतिले समितिभित्रै अल्पमतमा परेर काम गर्न नसक्ने अवस्थाको अन्त्य गर्नुपर्नेमा उहाँको जोड छ ।
करिब ७० लाख खर्च हुने
नेपाली कांग्रेसको आसन्न महासमिति बैठकका लागि खाजा र खानाका लागि मात्र करिब ७० लाख रुपैयाँ खर्च हुने प्रारम्भिक अनुमान गरिएको छ । बैठकका लागि सम्पूर्ण भोजनको व्यवस्थापनको जिम्मा अनुपम फुडल्याण्डले पाएको छ । भोजन व्यवस्थापन उपसमितिका संयोजक उदयशमशेर राणाका अनुसार एकजनाको लागि दैनिक ८८० रुपैयाँमा फुडल्याण्डसँग सम्झौता गरिएको छ । महासमिति बैठकमा २५ सयभन्दा बढी प्रतिनिधिहरू सहभागी हुने अपेक्षा छ । राणाका अनुसार बैठकका दौरान सदस्यहरूलाई बिहानको खाजा, खाना र दिउँसो खाजा गरी तीन टाइमको भोजनको व्यवस्था गरिएको छ । साँझको खाना र आवासको व्यवस्था भने महाधिवेशन प्रतिनिधि आफैँले गर्नुपर्नेछ ।
स्वास्थ्य व्यवस्थापन समन्वय उपसमिति सदस्य चयन
महासमिति बैठकलाई व्यवस्थित र प्रभावकारी बनाउन पार्टीका केन्द्रीय सदस्य उर्मिला नेपाल केसीको संयोजकत्वमा गठित ‘स्वास्थ्य समन्वय उपसमिति’ ले स्वास्थ्य व्यवस्थापन समन्वय उपसमितिमा सदस्यहरू चयन गरेको छ । यसमा डा. शंकरप्रसाद पौडेल, डा. शोभाराम सुवेदी, डा. भेषराज पौडेल, डा. प्रकाश ज्ञवाली, डा. लक्ष्मीप्रसाद घिमिरे, डा. श्रवणकुमार श्रेष्ठ, डा. सुरज कर्माचार्य, डा. कालिल झा, डा. मिथिलेश मिश्र र डा. नेत्रप्रसाद बस्नेतलाई चयन गरेको छ । यसैगरी, डा. पुन्नेश्वर केशरी, डा. ऐश्वर्य श्रेष्ठ, डा. अजय चौधरी, डा. सुदर्शन पोख्रेल, डा. बैकुण्ठ सुवेदी, डा. सुरेन्द्रशर्मा चालिसे, डा. विनोद शाह, डा. सृजना श्रेष्ठ, डा. सरिता बजगाईं र डा. जितेन्द्र मण्डललाई पनि चयन गरिएको छ ।
यस्तै डा. प्रेरक रेग्मी, डा. बुद्धिप्रसाद पौडेल, डा. जितेन्द्र श्रेष्ठ, डा. रमेश पौडेल, डा. शारदा खनाल, डा. उपेच्छा केसी, डा. शंकर गौतम, डा. नवीन झा, डा. ऋषिकेशव भुसाल, डा. कृष्टिना बेलवासे, डा. ज्योति शाह, डा. किरणचन्द्र पौडेल, डा. किरण लम्साल र डा. कौशर आलम गरी ३४ सदस्य रहनुभएको छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच