काठमाडौं । राष्ट्रिय लोक तथा दोहोरी गीत प्रतिष्ठान नेपालको आयोजनामा धादिङको चरौंदीमा भएको ‘ईन्द्रेणी सातौं राष्ट्रिय रनिङ शिल्ड दोहोरी गीत प्रतियोगिता-२०८०’ मा दिलिप थापा मगर र विमा अनुरागीले उपाधि आफ्नो पोल्टामा पार्न सफल हुनुभएको छ । प्रतिष्ठानको उपत्यका समन्वय समितिअन्तर्गतको बानेश्वर-कोटेश्वर समितिको तर्फबाट प्रतियोगितामा भाग लिनुभएका दिलिप थापामगर र विमा अनुरागीले उपविजेता कोरिया शाखालाई हराउँदै विजयी बन्नुभएको हो ।
प्रथम भएका समूहले तीन लाख नगद राशिसहित शिल्ड सहितको पुरस्कार प्राप्त गर्न सफल भएका थिए । द्वितीय स्थान हासिल गरेको कोरिया शाखाको तर्फबाट प्रतिस्पर्धी तारा थापा र टेकराज भण्डारीले दुई लाख नगद राशिसहित पुरस्कार जित्नुभयो ।
त्यसैगरी जापान शाखाले तृतीय पुरस्कार प्राप्त गर्न सफल भएको थियो भने अनामनगर समितिले सान्त्वना पुरस्कार प्राप्त गर्न सफल भयो । जापान शाखाको तर्फबाट प्रतिस्पर्धी निशान विश्वकर्मा र सपना रोकाले एक लाख नगद राशिको पुरस्कार प्राप्त गर्न सफल हुनुभयो भने अनामनगर समितिको तर्फबाट प्रतिस्पर्धी विजय बानियाँ र सबिता परियारले ५० हजार नगदसहित सान्त्वना पुरस्कार प्राप्त गर्नुभयो ।
प्रतियोगितामा सहभागी ४८ समूहमध्ये जुम्ला शाखाको तर्फबाट सहभागी गीता सेजुवाल उत्कृष्ट नवगायिका बन्न सफल हुनुभयो भने पाल्पा शाखाको तर्फबाट सहभागी रविन नेपाली उत्कृष्ट नवगायकको पुरस्कार प्राप्त गर्नुभयो । बसपार्क समिति रातोको तर्फबाट प्रतिस्पर्धी जमुना विक उत्कृष्ट प्रतिभावान गायिका बन्न सफल हुनुभयो । बसपार्क समिति सेतोको तर्फबाट सहभागी रत्न श्रेष्ठ र बागमती प्रदेशबाट सहभागी आशा केसीले उत्कृष्ट भेषभूषाको पुरस्कार प्राप्त गर्नुभयो ।
लुम्बिनीको तर्फबाट सहभागी लक्ष्मी बस्नेत उत्कृष्ट सिर्जनशील गायिका बन्न सफल हुनुभयो भने उपत्यका समन्वय समितिको तर्फबाट सहभागी शर्मिला श्रेष्ठ र काठमाडौं जिल्लाका अनिल सुनार उत्कृष्ट अनुशासित गायिका र गायकको पुरस्कार प्राप्त गर्नुभयो । सबै पुरस्कारको राशि १५ हजार नगद रहेको थियो । त्यस्तै बागलुङ जिल्लाशाखाको तर्फबाट सहभागी सुमन खड्का र सुन्धारा समितिको तर्फबाट सहभागी तिर्सना बुढा क्षेत्री उत्कृष्ट गायक गायिकाको पुरस्कार प्राप्त गर्नुभयो । उहाँहरूले २५ हजार नगदराशिसहितको पुरस्कार प्राप्त गर्नुभएको थियो ।
धादिङ जिल्लाको रोराङ–बेनीघाट गाउँपालिका वडा नं.७ स्थित चरौंदीको मैदानमा आयोजित ‘ईन्द्रेणी सातौैं राष्ट्रिय रनिङ शिल्ड दोहोरी गीत प्रतियोगिता-२०८०’ फागुन ५ मा प्रधानमन्त्री पुष्पकमल दाहाल ‘प्रचण्ड’बाट उद्घाटन भएको उक्त कार्यक्रम नेपाल सरकारका नागरिक उड्यन, पर्यटन तथा संस्कृतिमन्त्री सुदन किरातीको प्रमुख आतिथ्यतामा सम्पन्न भएको थियो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच