काठमाडौं । अख्तियार दुरुपयोग अनुसन्धान आयोगले सुनसरी कोशी गाउँपालिकास्थित श्री राष्ट्रिय माध्यमिक विद्यालय लौकहीका तत्कालीन प्रधानाध्यापकसहित तीन जनाशिक्षकले फर्जी हाजिरी जनाई तलव भत्ताको रुपमा गैरकानूनी लाभ लिएको आरोपमा विशेष अदालतमा मुद्दा दर्ता गरेको छ ।
अख्तियारका प्रवक्ता हरि घिमिरेका अनुसार उनीहरुले प्राविधिक शिक्षा तथा व्यवसायिक तालिम परिषद्मार्फत प्रदान गरिने चिकित्सा शिक्षा अध्ययन छात्रवृत्ति अन्तर्गत हेल्थ असिष्टेन्ट विषयको खुल्ला कोटा अन्तर्गत न्युरो मेडिकल कलेज विराटनगर मोरङमा अध्ययन अवधिमा बिद्यालयमा अनुपस्थित भएपनि सो अवधिको तलब भत्ता सुविधा लिएको पाइएको छ ।
शैक्षिक वर्ष २०७५–०७६ देखि ३ वर्षे अध्ययन अवधिमा राष्ट्रिय माध्यामिक विद्यालय लौकही सुनसरीका शिक्षक बालेश्वर यादवले आफू न्युरो हेल्थ कलेज विराटनगरमा अध्ययनरत रहँदाको एकान्नब्बे दिन फर्जी हाजिरी जनाई तथा ४७ दिन गयल समेत गरी जम्मा रु १,३०,८४३।०२ तलव भत्ता बुझेको अख्तियारको दाबी छ ।
तत्कालीन प्रधानाध्यापकहरु धनीलाल यादव (हाल अवकाश प्राप्त), भोली यादव (हाल अवकाश प्राप्त) र विरेन्द्र प्रसाद यादवको हकमा शिक्षक धनीलाल यादवले प्रधानाध्यापक पदको जिम्मेवारीमा रहँदा शिक्षक बालेश्वर यादव न्युरो हेल्थ कलेज विराटनगरमा अध्ययनरत रहेको अवधिमध्ये २०७५ साल आश्विनदेखि २०७६ साल फागुनसम्मको विद्यालय तथा गाउँपालिकाको कार्यालयसमेतको फर्जी हाजिरी ३५ दिन र गाउँपालिकाको कार्यालयमा काज कार्यरत रहँदाकाे अवधि ३७ दिनको गरी जम्मा रु ६४,९००।४४ भुक्तानी दिएको अख्तियारले जनाएको छ ।
शिक्षक भोली यादवले प्रधानाध्यापक पदको जिम्मेवारीमा रहँदा शिक्षक बालेश्वर यादव न्युरो हेल्थ कलेज विराटनगरमा अध्ययनरत रहेको अवधिमध्ये मिति २०७७ साल माघदेखि २०७८ साल कात्तिकसम्म ३४ दिन फर्जी हाजिरी मात्र गराएकाे अध्यापन नगराई रु ३३,६१८।४२ तलब भत्ता दिलाएको दाबीमा उल्लेख छ ।
यस्तै, शिक्षक विरेन्द्र प्रसाद यादवले प्रधानाध्यापक पदको जिम्मेवारीमा रहँदा शिक्षक बालेश्वर यादव न्युरो हेल्थ कलेज विराटनगरमा अध्ययनरत रहको अवधिमध्ये मिति २०७८ साल मंसिरदेखि २०७८ साल फागुनसम्मको विद्यालयमा २२ दिन फर्जी हाजिरी गराएको र २०७८ साल मंसिर महिनामा गयल रहेको अवधि १० दिनको गरी रु३२,३२४।१६ शिक्षक बालेश्वर यादवलाई गैरकानूनी लाभ दिलाई भुक्तानी दिएको अख्तियारको ठहर छ ।
प्रधानाध्यापक धनीलाल यादव, भोली यादव र वीरेन्द्र प्रसाद यादवालाई भ्रष्टाचार निवारण ऐन, २०५९ को दफा २२ को प्रतिबन्धात्मक वाक्यांशमा उल्लेख भएअनुसार भ्रष्टाचार निवारण ऐन, २०५९ को दफा ८ को उपदफा (३) बमोजिमको कसुरको मतियार भएको देखिएको अख्तियारले जनाएकाे छ ।
उनीहरु मध्याे प्रधानाध्यापक यादवलाई रु ६४,९००।४४ प्रधानाध्यापक भोली यादवलाई रु ३३,६१८।४२ र प्रधानाध्यापक विरेन्द्र प्रसाद यादवलाई रु।३२,३२४।१६ बिगो कायम गरी आज मुद्दा दायर गरिएकाे प्रवक्ता घिमिरेले बताउनु भयो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच