कालीकोट । कालीकोटको शुभकालिका गाउँपालिका-६ मा रहेको कर्णाली कोपिला स्याहारसुसार केन्द्रमा अनियमितता भएको पाइएको छ । आर्थिक वर्ष २०७९/८० मा गाउँपालिकाले एकैपटक ३० लाख रकम दिएर स्थापना गरेको स्याहारसुसार केन्द्र दर्ता गर्नमात्रै १५ लाख रकम खर्च भएपछि रकम अनियमितता भएको पाइएको हो । स्याहार केन्द्रमा लक्ष्यअनुसारका अनाथ बालबालिका नरहेको र एकैपटक ३० लाख खर्च गरेको पाइएपछि अख्तियार दुरूपयोग अनुसन्धान आयोग सुर्खेत कार्यालयको टोलीले त्यस विषयमा अनुसन्धान थालेको छ ।
यो आर्थिक वर्षमा गाउँपालिकाले १५ लाख बजेट विनियोजन गरेको छ । स्याहारसुसार केन्द्रमा रहेका ११ जना विद्यार्थी चन्द्रसूर्य माध्यमिक विद्यालयमा अध्ययन गर्दै आएका छन् । वर्षमा ३० लाख खर्च गर्ने हो भने राम्रो विद्यालयमा पढाउन सकिने स्थानीयको प्रतिक्रिया छ । केन्द्रले बालबालिकालाई सरकारी विद्यालयमा पढाइरहेको छ । यता राज्य कोषबाट वार्षिक ३० लाख भुक्तानी पनि लिइरहेको छ । वडा नम्बर-६ का पूर्वअध्यक्ष कर्णबहादुर केसीले अनाथ बालबालिकाको नाममा केही निश्चित मान्छेले आफ्नो भविष्य बनाइरहेको बताउनुभयो ।
उहाँले अरू हामीलाई चासो केही होइन, वर्षमा १५ देखि ३० लाख खर्च गर्ने हो भने काठमाडौंका राम्रै निजी विद्यालयमा अनाथ बालबालिकालाई पढाउन सकिन्छ । तर, धुलोमा राखेर राज्य कोषको १५ लाख खर्च गर्नु भ्रष्टाचार भएको बताउनुभयो । निजी विद्यालयलाई एक लाख २० हजार दिने हो भने एक वर्षमा खान, बस्न र पढ्न पुग्ने उहाँले बताउनुभयो ।
रकम दुरूपयोग भएको विषयमा गाउँपालिका भने सहमत छैन । शुभकालिका गाउँपालिकाका निमित्त प्रमुख प्रशासकीय अधिकृत गणेशबहादुर शाहीले दर्तामात्र नभएर सबै खर्च गत आर्थिक वर्षमा २८ लाख भएको बताउनुभयो । उहाँले दर्तामात्र होइन, दर्ता, सामानको मूल्य र बच्चाको खाने बस्ने गरी २८ लाख खर्च भएको र सो बजेट भुक्तानी भएको सुनाउनुभयो ।
‘असारमै दर्ता, असारमै कसरी २८ लाख खर्च भयो ?,’ स्थानीयले प्रश्न गर्दै आएका छन् । एक महिनामा ३० लाख खर्च गर्ने, सरकारी विद्यालयमा पढाएर अनाथ बालबालिकाको भविष्य बिगार्नुबाहेक अरू केही नभएको स्थानीयको भनाइ छ । अख्तियार दुरूपयोग अनुसन्धान केन्द्र सुर्खेतका सूचना अधिकारी रत्नचन्द्र गौतमले उजुरी परेपछि नियमित स्थलगत अनुगमनका हिसाबले टोली एकपटक पुग्ने गरेकाले कर्णाली कोपिला स्याहारसुसार केन्द्रसम्म पुगेको बताउनुभयो ।
शुभकालिका पुगेको टोलीले गाउँपालिका अध्यक्ष, वडाध्यक्ष र कर्णाली कोपिला स्याहारसुसार केन्द्रका अध्यक्षलाई मात्र भेटेर सेटिङ गरेर गएको स्थानीयले आरोप लगाएका छन् ।
कालीकोटमा अनाथ बालबालिकाको उद्धारका साथै पठनपाठनका लागि खोलिएका केही अनाथालय बजेट नपाएर सञ्चालकले घरखेत बेच्नुपरेका बेला शुभकालिका गाउँपालिका-६ मा भने कर्णाली कोपिला स्याहारसुसार केन्द्रले बालबालिकालाई सरकारी विद्यालयमा पढाएर राज्यको लाखौँ रकम हजम गरिरहेको स्थानीयको गुनासो छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच