रूपेशलाई बुद्धिचालको उपाधि

हिमालय टाइम्स

१२ चैत्र २०८०, सोमबार ०४:०६

Read Time = 3 mins

प्रिन्ट संस्करण

खेलकुद

खेलकुद बिविध

A A- A+

काठमाडौं । महालक्ष्मी नगरपालिका-९ को आयोजनामा सञ्चालन भएको प्रथम वडाध्यक्ष कप रापिड बुद्धिचाल प्रतियोगिताको उपाधि नेपाल च्याम्पियन फिडे मास्टर रूपेश जैसवालले जित्नुभएको छ । ललितपुर महानगरपालिका-११ बाट प्रतिनिधित्च गर्नुभएका रूपेशले नवौँ चरणको खेलमा पूर्व नेपाल च्याम्पियन बद्रीलाल नेपालीसँग बराबरी खेली सात खेलमा जित र एक खेलमा बराबरी गर्दै सात अंक बनाउनुभयो ।

आठौँ चरणको खेलमा कमल श्रेष्ठलाई पराजित गर्नुभका रूपेश पाँचौँ चरणको खेलमा सुरत दाहालसँग पराजित भए पनि खेलमा फर्किनुभएको थियो । उपाधिसँगै उहाँले २५ हजार रुपैयाँ पुरस्कार पाउनुभयो । बद्रीलाल नेपाली दोस्रो र थापाथली चेस पार्क क्लबका सुशील चौधरी तेस्रो स्थानमा रहनुभयो । बद्रीले १५ हजार र सुशीलले १० हजार रुपैयाँ पुरस्कार पाउनुभयो ।

झापाका विजेश राजकर्णिकार चौथो स्थानमा र सुरत दाहाल पाँचौँ स्थानमा रहनुभयो । ३७ जना खेलाडीलाई नगद पुरस्कार व्यवस्था गरिएको प्रतियोगितामा सजिन महर्जन र सञ्जय महर्जन ललितपुरको विजेता र उपविजेता हुनुभयो ।

यस्तै, महालक्ष्मी नगरपालिकातर्फ कमल श्रेष्ठ र अशोकमोहन श्रेष्ठ पहिलो र दोस्रो स्थानमा रहनुभयो भने भेट्रानमा पूर्व नेपाल च्याम्पियन नवीन तण्डुकार उत्कृष्ट ठहरिनुभयो । जगन्नाथ ताम्राकार दोस्रो हुनुभयो ।

महिलातर्फ श्रीलंकाका सचिन रणसिंगे पहिलो, सिन्दिरा जोशी दोस्रो र पुनम प्रसाईं तेस्रो हुनुभयो । अनरेटेडमा शैलेश श्रेष्ठ र यू-१२ मा अग्रता आचार्य पहिलो हुनुभयो । दुईदिने प्रतियोगितामा एक सय १६ खेलाडीको सहभागिता रहेको थियो ।

विजेतालाई महालक्ष्मी महानगरपालिकाका नगरप्रमुख हरिगोविन्द श्रेष्ठ, उपप्रमुख लक्ष्मी महर्जन, नेपाल बुद्धिचाल महासंघका कार्यवाहक अध्यक्ष हेराकाजी महर्जन, महालक्ष्मी नगरपालिका-९ का अध्यक्ष जयकृष्ण बोगटीलगायतले पुरस्कार प्रदान गर्नुभएको थियो ।

बुद्धिचाल

उपाधि

प्रतियोगिता

यो खबर पढेर तपाईलाई कस्तो महसुस भयो ?