काठमाडौं । नेपाल कम्युनिष्ट पार्टी (एमाले)का अध्यक्ष तथा पूर्वप्रधानमन्त्री केपी शर्मा ओलीले श्रीमती राधिका शाक्यसहित चलचित्र ‘महाजात्रा’ हेर्नुभएको छ । चलचित्र हेरेपछि उहाँले १० नम्बर मा ९.५ नम्बर दिनुभयो । उहाँले चलचित्रलाई १० मा १० अंक दिन केही राजनीतिका विषयले रोकेको सुनाउनुभयो ।
अध्यक्ष ओलीले भन्नुभयो, ‘फिल्म राम्रो बन्न सन्देश दिने कथा र त्यसलाई सम्प्रेषण गर्ने अभिनय चाहिन्छ, यी दुवै पक्ष महाजात्रामा सशक्त छन् । यसले बाटो बिराएकालाई सही मार्गमा हिँड्न प्रेरणा दिन्छ’, उहाँले भन्नुभयो, ‘यसले पहिलो हाफमा मनोरञ्जन र दोस्रो हाफमा सन्देश दिएको छ । फिल्म काल्पनिक कथामा बन्छ र राजनीति यथार्थमा चल्छ । त्यसकारण फिल्मबाट गलत कार्यमा लागेका लाई सही बन्न प्रेरणा मिल्छ ।’
अध्यक्ष ओलीसँगै ईश्वर पोखरेल, शंकर पोखरेल, प्रदीप ज्ञवाली, रघुजी पन्त, कोमल ओलीलगायत ४० नेताले चलचित्र हेनुभएको थियो । चलचित्र अवधिभर मनोरञ्जनसँगै सन्देश पनि प्राप्त गरेको गायिका तथा नेत्री कोमल ओलीले सुनाउनुभयो । ‘फिल्मको सुरुवातदेखि नै म हाँसी रहे । यसले भ्रष्टचारविरोधी भावना उजागर गर्नुपर्छ, राजनीति गर्नेले सही रूपमा राजनीति गर्नुपर्छ भन्ने सन्देश दिएको छ । मैले यो शृंखलाका सबै फिल्म हेरेकी छु, यसमा महिलालाई सम्मान गरेर बनाइएको छ’, उहाँले भन्नुभयो ।
उपस्थित सम्पूर्ण नेतालाई निर्देशक प्रदीप भट्टराई, अभिनेता हरिवंश आचार्य, विपिन कार्की, रवीन्द्रसिंह बानियाँ, अरविन खड्कालगायतले भेटेर धन्यवाद दिनुभएको थियो । चलचित्रलाई अध्यक्ष ओली अगाडि पूर्वरानी कोमल राज्यलक्ष्मी देवीशाह र उपप्रधानमन्त्री तथा गृहमन्त्री रवि लामिछानेले हेरिसक्नुभएको छ ।
षट्कोण आर्ट्सले निर्माण गरेको ‘जात्रा’ शृंखलाको तेस्रो भाग ‘महाजात्रा’ ले तीन दिनमा चार करोड २६ लाख रूपैयाँको ग्रस कलेक्सन गरेको छ । निर्माण पक्षले पहिलो दिन एक करोड २३ लाख, दोस्रो दिन एक करोड ८३ लाख र तेस्रो दिन एक करोड २० लाख रूपैयाँको ग्रस कलेक्सन गरेको जानकारी दिएको छ ।
यही चैत ९ गतेदेखि नेपालसँगै विश्वभर एकसाथ सिनेमाघरमा आएको चलचित्रमा प्रदीप भट्टराईको लेखन तथा निर्देशन छ । चलचित्रमा हरिवंश आचार्य, विपिन कार्की, रविन्द्रसिंह बानियाँ, वर्षा राउत, अर्जुनजंग शाही, प्रकाश घिमिरे, राजाराम पौडेल, प्रवीण खतिवडा, दिव्यदेव, सुमन कार्की, शिशिर बाङ्देल, गौमाया गुरुङ, अरविन खड्कालगायतको अभिनय छ । चलचित्र म्याक्स दीपेशखत्री र यज्ञश्वर पौडेलले संयुक्त रूपमा निर्माण गर्नुभएको हो ।
‘मुरी मुरी साथी’ सार्वजनिक
चलचित्र ‘महाजात्रा’ समावेश ‘मुरी मुरी साथी’ बोलको गीत सार्वजनिक भएको छ । सार्वजनिक गीतमा फडिन्द्र (विपिन कार्की), जोयश (रवीन्द्रसिंह बानियाँ) र मुन्ना (रवीन्द्र झा)बीचको मित्रतालाई प्रस्तुत गरिएको छ । हर्क साउदको शब्द रहेको गीतमा कालीप्रसाद बाँस्कोटाले संगीत र स्वर सुन्न सकिन्छ । गीतको भिडियोलाई छायांकन निर्देशक पुरुषोत्तम प्रधानले खिच्नुभएको हो । सार्वजनिक गीतमा चलचित्रमा उहाँहरू बीच शृंखलावद्ध रूपमा आउने उतारचढावसँगै झाँगिएको मित्रतालाई प्रस्तुत गरिएको निर्देशक तथा लेखक प्रदीप भट्टराईले बताउनुभयो ।
‘गीतमा तीन पात्रले जीविकोपार्जनका लागि गर्ने संघर्ष, विभिन्न अवरोधमा टिकेको मित्रता र उनीहरूको गरिवीले डगमगाउन नसकेको नैतिकतालाई प्रस्तुत गरेका छौ,’ उहाँले भन्नुभयो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच