लुम्बिनीको पर्यटन प्रवद्र्धनमा एनआरएनएले सघाउने

गैरआवासीय नेपाली संघ (एनआरएनए) र लुम्बिनी सांस्कृतिक नगरपालिका, कपिलवस्तु नगरपालिका, रामग्राम नगरपालिका तथा देवदह नगरपालिकाको संयुक्त साझेदारीमा लुम्बिनी क्षेत्रको पर्यटन प्रवद्र्धन तथा विकासका लागि साझेदारीपत्रमा हस्ताक्षर भएको छ । काठमाडाैंस्थित एनआरएनए सचिवालयमा आयोजित कार्यक्रमबीच उक्त समझदारीपत्रमा हस्ताक्षर भएको हो । समझदारीपत्रमा एनआरएनए अध्यक्ष डा. बद्री केसी, लुम्बिनी सांस्कृतिक नगरपालिकाका प्रमुख सजरुद्दिन मुसलमान, कपिलवस्तु नगरपालिकाका प्रमुख धनपत यादव, रामग्राम नगरपालिकाका प्रमुख सुदिप पौडेल तथा देवदह नगरपालिकाका प्रमुख धु्रवप्रसाद खरेलले हस्ताक्षर गर्नुभएको एनआरएनएले जनाएको छ ।
विश्व शान्तिका अग्रदूत भगवान् गौतम बुद्ध जन्मस्थल विश्व सम्पदा सूचीमा सूचीकृत रूपन्देहीस्थित लुम्बिनी सांस्कृतिक नगरपालिका, बुद्धले सिद्धार्थ गौतमका रूपमा यौवनकाल बिताएको (आफ्नो जीवनको झण्डै २९ वर्ष व्यतित गरेको) कपिलवस्तुको तिलौराकोटस्थित कपिलवस्तु नगरपालिका, बुद्धको मामाघर रूपन्देहीको देवदह नगरपालिका र नवलपरासीस्थित बुद्धको अष्टधातु रहेको रामग्राम नगरपालिकाको पर्यटकीय प्रवद्र्धन र विकास नै समझदारीको मुख्य उद्देश्य रहेको बताइएको छ ।

अन्तर्राष्ट्रियस्तरमा शान्ति, सद्भाव प्रवद्र्धन गर्न, नेपालको पर्यटन प्रवद्र्धनमा टेवा पु¥याउन एनआरएनए र स्थानीय सरकारबीचको सहकार्य सुदृढ बनाई बुद्ध धर्मको उद्गम भूमि लुम्बिनीले बोकेको परम्परागत संस्कृति र शान्तिको दर्शन अन्तर्राष्ट्रियस्तरमा पु¥याई बलियो बनाउने संयुक्त प्रयासका रूपमा समझदारीलाई लिइएको छ । साथै बुद्ध धर्मको भावनामार्फत् नेपाल र विश्वभर शान्ति र भाइचारा सिद्धान्त सञ्चार गर्न पनि सहयोग पुग्ने अपेक्षा गरिएको छ ।

यो पनि पढ्नुहोस्

खर्चिला चिनियाँ पर्यटक भित्र्याउँ !

सो अवसरमा अध्यक्ष केसीले विश्व शान्तिका अग्रदूत भगवान् गौतम बुद्धको जन्मस्थल, शान्तिभूमि, धार्मिक एवं पर्यटकीय क्षेत्र बुद्ध परिपथका चार नगरपालिका र गैरआवासीय नेपाली संघबीच संस्थागतरूपमै सम्बन्ध कायम भएकोमा खुसी व्यक्त गर्दै लुम्बिनीलाई अन्तर्राष्ट्रियस्तरमा थप परिचित गराउन एनआरएनएले स्थानीय सरकारसँग मिलेर काम गर्ने बताउनुभयो । उहाँले भन्नुभयो, ‘संसारका जुनसुकै कुनामा जाँदा पनि हामी बुद्ध जन्मेको देशका हौँ भन्दा जति गर्विलो महसुस हुन्छ भनेरमात्र अब पुग्दैन, वास्तवमै गर्व महसुस गर्न हामीले अन्तर्राष्ट्रियस्तरमा बुद्धको जन्मभूमि लुम्बिनीको प्रचार गरी बढीभन्दा बढी पर्यटक भिœयाउने भूमिका हुनुपर्छ ।’

आफूहरूले केन्द्र सरकारसँग थुप्रै काम गरेको जानकारी गराउँदै अध्यक्ष डा. केसीले स्थानीय सरकारसँग मिलेर एनआरएनएले अझ धेरै काम गर्न सक्ने विश्वास व्यक्त गर्नुभयो । हरेक गैरआवासीय नेपाली पर्यटकीय सद्भावनादूत भएको उहाँको भनाइ थियो । देवदह नगरपालिकाका प्रमुख धु्रवप्रसाद खरेलले लुम्बिनी प्रदेशका चारवटा ऐतिहासिक स्थानलाई विश्व बजारमा चिनाउन र जोड्न एनआरएनएले गरेको पहल सकारात्मक रहेको बताउनुभयो । कपिलवस्तु नगरपालिकाका प्रमुख सुदिप पौडेलले लुम्बिनी क्षेत्रको विकासका लागि एनआरएनएले सुरु गरेको नयाँ आयामले मूर्त रूप लिने विश्वास व्यक्त गर्नुभयो । लुम्बिनी सांस्कृतिक नगरपालिकाका प्रमुख सजरुद्दिन मुसलमानले लुम्बिनीको पर्यटन प्रवद्र्धनका लागि भएको समझदारीले समग्र लुम्बिनी प्रदेशको विकासमा पनि सहयोग गर्ने विश्वास व्यक्त गरेको उक्त नगरपालिकाका प्रशासकीय प्रमुख कृष्ण सापकोटाले जानकारी गराउनुभएको थियो ।

त्यस्तै, रामग्राम नगरपालिकाका प्रमुख धनपत यादवले एनआरएनएसँगको सहकार्यले लुम्बिनी विकासको सपना पूरा गर्ने र पर्यटकीय प्रचारप्रसारमा सघाउ पुग्ने आशा राखेको बताउनुभयो । संस्कृति पर्यटन तथा नागरिक उड्डयन मन्त्रालयका उपसचिव सरोजकुमार पोखरेलले गैरआवासीय नेपालीहरू नै विदेशमा नेपाल चिनाउने सच्चा दूत भएको भन्दै नेपालको पर्यटकीय विकास र प्रवद्र्धनका लागि सरकार सहकार्य गर्दै अघि बढिरहेको र आगामी दिनमा पनि व्यवस्थितरूपमा अघि बढाउने प्रतिबद्धता व्यक्त गर्नुभयो । संघका उपसचिव तथा पर्यटन प्रवद्र्धन कमिटीका संयोजक सोम सापकोटाले बुद्ध परिपथको महान् अभियान पूरा गर्न एनआरएनएले महŒवपूर्ण भूमिका निर्वाह गर्ने बताउनुभयो । कार्यक्रममा संस्कृति पर्यटन तथा नागरिक उड्डयन मन्त्रालयका सचिव डा. दिपक काफ्ले, कोशी प्रदेश सांसद मिना श्रेष्ठ, देवदह नगरपालिकाका उपप्रमुख विद्यालक्ष्मी गुरुङ, लुम्बिनी सांस्कृतिक नगरपालिकाका रामप्रसाद ज्ञवाली, लेखा अधिकृत रामचन्द्र अर्याल, एनआरएनएका सल्लाहकार टिबी कार्की, अतुल कोइरालालगायतको उपस्थिति रहेको एनआरएनएले जनाएको छ ।

उपप्रधानमन्त्री महासेठसँग पनि छलफल
एनआरएनए अध्यक्ष डा. बद्री केसी नेतृत्वको प्रतिनिधिमण्डलले उपप्रधानमन्त्री एवं भौतिक पूर्वाधार तथा यातायातमन्त्री रघुवीर महासेठसँग भेट गरी नेपालको आर्थिक, सामाजिक, सांस्कृतिकलगायतका विविध क्षेत्रको समृद्धिका लागि सरकार तथा सरोकारवालासँग हातेमालो गर्दै अघि बढ्न एनआरएनए तयार रहेको जनाएको छ ।

सो अवसरमा एनआरएनए अध्यक्ष केसीले देशको पूर्वाधार विकासका लागि विश्वभरका गैरआवासीय नेपाली मिलेर १० अर्बको लगानी रहेको परियोजना सुरु गरेको जानकारी गराउँदै भविष्यमा ५० अर्बको लगानी भिœयाउने बताउनुभयो । त्यसका लागि गैरआवासीय नेपालीहरूको बाहुल्यता रहेको देशमा रोड शोसमेत गर्ने र रोड शोलगायतका कार्यक्रममा नेपाल सरकारलाई समेत सहभागी गराउने योजना रहेको केसीले जानकारी गराउनुभयो ।

मन्त्री महासेठले लगानीका क्षेत्र पहिचान गरेरमात्रै लगानी गर्न आग्रह गर्दै बिनाअध्ययन ठूला–ठूला परियोजनामा लगानी गर्नुभन्दा साना तर लगानी सुरक्षित हुने क्षेत्र पहिचान गर्न आवश्यक रहेको बताउनुभयो । उहाँले जो जहाँ भए पनि गैरआवासीय नेपालीहरू एउटै कित्तामा उभिएर देशका लागि हातेमालो गर्नुपर्नेमा जोड दिँदै भन्नुभयो, ‘मन ठूलो बनाएर सबैसँग मिलेर अघि बढ्नुस् ।’