नयाँदिल्ली । इण्डियन प्रिमियर लिग (आइपिएल)मा गुजरात टाइटन्सका राशिद खानको बलसँगै ब्याट पनि चलेपछि राजस्थान रोयल्सको अपराजित यात्रामा पूर्णविराम लागेको छ । उत्कृष्ट बलिङ गर्नुभएका उहाँले कठिन समयमा ब्याट पनि चलाएपछि जारी आइपिएलमा राजस्थान रोयल्सले पहिलो हारको सामना गर्नुपर्यो । खेलको अधिकांश समय राजस्थान रोयल्सलाई जितको दावेदार मानिएको थियो । तर, अन्तिम पाँच ओभरले खेलको मुहार नै बदलिदियो ।
राजस्थानले दिएको १९७ रनको विशाल लक्ष्य गुजरातले अन्तिम बलमा ३ विकेट बाँकी छँदै भेट्टायो । गुजरातका लागि कप्तान शुभमन गिलले ४४ बलमा सर्वाधिक ७२ रन बनाउनुभयो । ओपनर साई सुदर्शनले ३५ तथा राशिदले ११ बलमा २४ रन बनाउनुभयो ।
राशिद खानले गुजरात टाइटन्सका लागि ‘ट्रबलसुटर’को भूमिका निर्वाह गर्नुभयो । मोहम्मद कैफका अनुसार राशिद खानले अन्तिम ओभरमा आवेश खानलाई आफ्नो रणनीति परिवर्तन गर्न बाध्य पार्नुभएको थियो । वास्तवमा आवेश खानको बल योर्कर बलिङ गर्ने हो । तर, उहाँको योर्करलाई राशिद खानले चौकामा परिणत गर्नुभएको थियो । जसका कारण अन्तिम बलिङ गर्दा उहाँले आफ्नो रणनीति परिवर्तन गर्न बाध्य हुनुभयो र लेन्थ बल गर्नुभयो । जसलाई राशिदले चौकामा परिणत गरी अप्रत्याशित जित दिलाउन सफल हुनुभयो ।
जितमा राहुल तेवाटियाको पनि महत्वपूर्ण भूमिका थियो । राहुल तेवातियाले २२ बलमा २२ रनको इनिङ खेल्नुभयो । राशिदले प्लेयर अफ द म्याचको अवार्ड प्राप्त गर्नुभयो । जितसँगै उहाँले भन्नुभयो, ‘मैले यसअघिका खेलमा राम्रो बलिङ गर्न सकेको थिइनँ । आइपिएलअघि तीन-चार महिना खेल्न नपाउनुको कारण पनि होला । तर, यो खेलमा बल ठीकसँग खस्यो र यो राम्रो बलिङले ब्याटिङमा ऊर्जा दिने काम गर्यो ।’ यसअघि उहाँले बलिङमा पनि चमत्कार गर्नुभएको थियो । उहाँले चार ओभरमा १८ रन दिएर एक विकेट लिनुभएको थियो । एजेन्सी ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच