काठमाडौं । २०८० साल नेपाली क्रिकेट प्रेमिका लागि एउटा ऐतिहासिक वर्ष बन्न पुग्यो । अन्य खेलमा त्यति चर्चा नभए पनि पूरै वर्ष क्रिकेटमय भयो । क्रिकेटसँगै महिला फुटबल, पारा खेलकुद, कराँते, तेक्वान्डो जस्ता खेलका लागि २०८० साल ऐतिहासिक रहृयो । विशेषगरी, नेपाल टी-ट्वेन्टी विश्वकपमा छनोट हुनु सम्पूर्ण खेलप्रेमीका लागि गर्वको विषय बन्यो । फुटबलका लागि भने यो वर्ष फापेन । फुटबलले अन्तर्राष्ट्रियस्तरमा गर्व गर्नलायक कुनै उपलब्धि हासिल गर्न सकेन ।
नेपाली फुटबलको नेतृत्वदायी निकाय अखिल नेपाल फुटबल संघ (एन्फा) का पदाधिकारी वर्षभर आपसी विवादमै अल्झिरहे । खेलाडी पलायनका कारण नेपाली पुरुष फुटबल टिम निर्माणमै असर परिरहँदा महिला टिमले भने उल्लेख्य उपलब्धि हासिल ग¥यो । महिला फुटबलले एसियाली खेलकुदमा डेब्यु ग¥यो । नेपालका ६ खेलाडीले भारतको महिला आई लिग खेलिरहेका छन् । वाफ महिला च्याम्पियनसिपमा नेपाली टोली उपविजेता बन्नु ठूलै उपलब्धि हुन् । सावित्रा भण्डारी युरोपेली क्लब अन अभान्ट ग्यांगम्पमा अनुबन्ध भएसँगै नेपाली खेलाडी पनि युरोपमा खेल्न सक्छन् भन्ने प्रमाणित भयो ।
नेपाली क्रिकेट टोलीले यस वर्ष भारत, पाकिस्तान, श्रीलंका, बंगलादेशजस्ता बलिया टेष्ट राष्ट्रसँगै एसिया कपको मञ्चमा प्रदर्शन गर्ने मौका पायो । यही वर्ष नेपाली पुरुष क्रिकेट टोलीले आफूभन्दा बलिया राष्ट्रहरूसँग जिम्बाबेमा आईसिसी एकदिवसीय विश्वकपको छनोट प्रतियोगिता पनि खेल्यो । महिला क्रिकेट टोली पनि निकट भविष्यमा श्रीलंकामा आयोजना हुने महिला टी-२० एसिया कपमा छनोट हुन सफल भयो । एसियाली खेलकुदमा दीपेन्द्रसिंह ऐरीले कहिल्यै नतोडिने विश्व कीर्तिमान बनाउनुभयो । यसै वर्ष नेपाल क्रिकेट संघ (क्यान) ले पहिलो पटक सेन्ट्रल कन्ट्र्याक्ट (केन्द्रीय सम्झौता) मा रहने महिला तथा पुरुष क्रिकेट खेलाडीहरूको वर्गीकरण र खेलाडीसँग सम्झौता गरेको छ । क्यानले पुरुषतर्फ ३० र महिलातर्फ १९ जना खेलाडीसँग केन्द्रीय सम्झौता गरेको हो ।
विश्वकप छनोटसँगै, एसिया कप यात्रा, एसियाली खेलकुदमा विश्व कीर्तिमान, एरिका गुरुङले २५ वर्षपछि व्यक्तिगत प्रतिस्पर्धामा जितेको रजत पदक, पलेशा गोवद्र्धनको पाराओलम्पिक छनोट तथा सन्तोषी श्रेष्ठको लगातार सफलताका लागि यो वर्ष सम्झिइनेछ । राष्ट्रिय महिला क्रिकेट टोलीकी अनुभवी खेलाडी ज्योति पाण्डेले यसै वर्ष सक्रिय खेल जीवनबाट सन्न्यास लिएको घोषणा गर्नुभयो भने नेपाली क्रिकेट टोलीका लेग स्पिनर सन्दीप लामिछाने बलात्कार मुद्दामा अहिले टिम बाहिर छन् । यो नेपाली क्रिकेटका लागि दुःखद् प्रसंग हो ।
यता, एसियाली खेलकुदमा नेपाल २९ खेलमा सहभागी भएको थियो । धेरै खेलले निराश बनाइरहँदा १९ वर्षकी एरिका गुरुङले रजत पदक जित्नुभयो । उहाँले विश्व कराँते च्याम्पियनसिप र युएस ओपनमा पनि स्वर्ण जित्नुभयो । एसियाली खेलकुद प्रतियोगिताको इतिहासमा कुनै पनि नेपाली कराँते खेलाडीले जितेको यो पहिलो रजत पदक हो । यस्तै महिला कबड्डीले यो वर्ष नेपाललाई कास्य पदक दिलाएको थियो । यो पनि एउटा सुखद् प्रंसग हो । यता, सेन्ट्रल एसियनमा लगातार दुई पटक च्याम्पियन भएको भलिबल टिमले यसै वर्ष एसियाली खेलकुदमा डेब्यू गर्यो । पारा तेक्वान्दो खेलाडी पलेशा गोवद्र्धन यसै वर्ष फ्रान्सको पेरिसमा आयोजना हुने पारा ओलम्पिक खेलकुद प्रतियोगितामा छनोट हुनुभएको छ । चीनमा जारी एसियाली क्षेत्रको छनोट प्रतियोगितामा स्वर्ण पदक जित्दै पलेशा पेरिस पारा ओलम्पिकमा छनोट हुनुभएको हो । उहाँ पारा ओलम्पिक खेलकुदमा छनोट भएको यो लगातार दोस्रो पटक हो ।
यसै वर्ष नेपाली एथलेटिक्स खेलाडी सन्तोषी श्रेष्ठले बंगलादेशको राजधानी ढाकामा सम्पन्न ‘बंगबन्धु शेख मजिब ढाका इन्टरनेसनल म्याराथन’ मा स्वर्ण पदक जित्नुभयो । उहाँले म्याराथनको पहिलो अन्तर्राष्ट्रिय सहभागितामै स्वर्ण पदक हात पार्नुभएको हो । समग्रमा नेपाली खेलकुदले उत्साहजनक प्रदर्शन गरेपनि यो वर्ष पुरुष क्रिकेट नै सबैभन्दा चर्चामा रहन पुग्यो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच