काठमाडौं । हङकङलाई पराजित गर्दै नेपाल एसिसी पुरुष प्रिमियर कप टी-ट्वान्टी क्रिकेट प्रतियोगिताको सेमिफाइनलमा प्रवेश गरेको छ । प्रतियोगिताअन्तर्गत सोमबारको खेलमा नेपालले हङकङलाई ८ विकेटले पराजित गरेको हो ।
हङकङले दिएको ११५ रनको सामान्य लक्ष्य नेपालले १२.२ ओभरमा पूरा गर्यो । नेपालका लागि ओपनरहरू कुशल भुर्तेलले ३२, आसिफ शेखले ४० रन बनाउनुभयो । कप्तान रोहित पौडेलले २५ र सन्दीप जोराले १९ रनको योगदान दिनुभयो ।
हङकङका लागि एहसान खान र यासिम मुर्तजाले समान १ विकेट लिनुभयो । यसअघि टस जितेर पहिले बलिङ गर्ने निर्णय गरेको नेपालले १७.५ ओभरमा हङकङलाई ११४ रनमै अलआउट गरेको थियो । ओमानको अल इमिरेट्स क्रिकेट मैदानमा भएको खेल वर्षाका कारण ढिलो सुरु भएको थियो भने खेल १८ ओभरमा झारिएको थियो ।
हङकङका लागि अंशी रथले सर्वाधिक ३४, कप्तान निजाकत खानले १२, जिसान अलीले १४ रन बनाउनुभयो । नेपालका लागि अविनाश बोहराले तीन, ललित राजवंशी, दीपेन्द्रसिंह ऐरीले समान दुई विकेट र करन केसीले एक विकेट लिनुभयो ।
लगातार तेस्रो जित निकालेको नेपाल ६ अंकसहित तालिकाको शीर्ष स्थानमा छ । साउदी अरेबिया, मलेसिया र हङकङको समान दुई अंक छ । नेपालले पहिलो खेलमा मलेसियालाई पाँच विकेटले पराजित गरेको थियो भने दोस्रो खेलमा कतारलाई ३२ रनले हराएको थियो । समूह चरणको अन्तिम खेलमा नेपालले बुधबार साउदी अरेबियासँग खेल्नेछ । १० टोली सहभागी प्रिमियर कपको समूहमा शीर्ष दुईमा रहने टोलीले अन्तिम चारमा स्थान पक्का गर्नेछन् ।
कतारसँग मलेसिया पराजित
यता, कतारले मलेसियालाई पराजित गरेको छ । सोमबार सम्पन्न खेलमा कतारले मलेसियालाई चार विकेटले पराजित गरेको हो । मलेसियाले दिएको १५२ रनको लक्ष्य पछ्याएको कतारले १७.२ ओभरमा ६ विकेट गुमाएर १५३ रन बनाएको थियो । कतारका कामरान खानले सर्वाधिक ३३ रन बनाउनुभयो । २३ बल खेल्नुभएका उहाँले सात चौका प्रहार गर्नुभयो ।
कप्तान मुहम्मद तनविर ३३, शाहजैब जमिल २४, मोहम्मद इरशाद २२ र मोहम्मद अहनफ १९ रनमा आउट हुँदा हिमान्शु राठोड र गायन मुनविरा ६/६ रनमा अविजित रहनुभयो ।
मलेसियाका वीरनदीप सिंहले सर्वाधिक दुई विकेट लिनुभयो । पवनदीप सिंह, मोहम्मद अमिर, मोहम्मद वाफिक र विजय उन्नीले एक÷एक विकेट लिनुभयो ।
त्यसअघि पहिला ब्याटिङ थालेको मलेसियाले निर्धारित १८ ओभरमा पाँच विकेट गुमाउँदै १५१ रन बनाएको थियो । मलेसियाका अहमद फैजले सर्वाधिक ३८ रन बनाउनुभयो । २२ बल खेल्नुभएका उहाँले तीन चौका र एक छक्का प्रहार गर्नुभएको थियो ।
मोहम्मद अमिर ३०, कप्तान वीरनदीप सिंह २६ र शर्विन मुनिन्दी २३ रनमा आउट हुँदा अकिल वाहिद २१ र नजमुस साकिव दुई रनमा अविजित रहनुभयो । कतारका हिमान्शु राठोडले दुई विकेट लिँदा इक्रामुल्लाह खान र गायन मुनविराको नाममा एक/एक विकेट रहृयो ।
जितसँगै समूह ‘बी’मा रहेको कतारले तीन खेलबाट दुई अंक जोडेको छ । कतार चौथो स्थानमा छ । यस समूहबाट तीन खेलमा तीन जित हासिल गर्दै नेपाल एक खेलअगावै सेमिफाइनलमा पुगिसकेको छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच