राष्ट्रिय फुटबल टिमको बन्द प्रशिक्षणमा ३० जना खेलाडी

काठमाडौं । नेपाली राष्ट्रिय फुटबल टिमको बन्द प्रशिक्षणमा ३० जना खेलाडीलाई बोलाइएको छ । दुई नयाँ युवा अनुहारसहित ३० खेलाडीलाई नवनियुक्त प्रशिक्षक म्याट रसले बन्द प्रशिक्षणमा बोलाउनुभएको हो । नेपालले मार्च २१ मा सिंगापुरसँग मैत्रीपूर्ण र मार्च २५ मा मलेसियासँग एएफसी एसिया कप छनोटको खेल खेल्नेछ । गोलकिपर एञ्जल श्रेष्ठ पहिलोपटक टिममा पर्नुभएको हो । उहाँसँगै यू-१६ र १८ युथ लिगमा राम्रो प्रदर्शन गर्नुभएका सुवासले टिममा स्थान बनाउनुभएको छ । उहाँले युथ लिगमा पुलिस क्लबको प्रतिनिधित्व गर्नुभएको थियो ।

नेपालको प्रारम्भिक टोलीमा गोलरक्षक किरणकुमार लिम्बू, विशाल सुनार, दीप कार्की, अभिषेक बराल र एञ्जल श्रेष्ठ रहनुभएको छ । यस्तै, डिफेन्डरमा अनन्त तामाङ, छिरिङ लामा, रोहित चन्द, विमल पाण्डे, सनिस श्रेष्ठ, रन्दीप पौडेल, सुमित श्रेष्ठ, अञ्जन राई, अभिषेक लिम्बू, आशिष गुरुङ र अशोक खवास हुनुहुन्छ ।

मिडफिल्डरमा लकेन लिम्बू, रोहन कार्की, मणि लामा, भरत खवास, एरिक विष्ट, मनिष डाँगी, आयुष घलान, क्रितिश रत्न छुन्जु रहनुभएको छ भने फरवार्डमा जिलेस्पीजंग कार्की, अञ्जन विष्ट, समिर तामाङ, दिनेश हेन्जन, सुवास ठकुरी बम र निराजन धामी हुनुहुन्छ ।

एसियन कपमा ध्यान दिँदै साफ जिताउने प्रयास गर्छु : प्रशिक्षक रोस
नेपाली राष्ट्रिय फुटबल टोलीका नवनियुक्त प्रशिक्षक म्याट रोसले आफ्नो लक्ष्य आसन्न एसियन कप छनोटमा उत्कृष्ट प्रदर्शन गर्दै नेपाललाई साफ च्याम्पियनसिप उपाधि दिलाउनु रहेको बताउनुभएको छ । अखिल नेपाल फुटबल संघ (एन्फा) ले आइतबार अष्ट्रेलियाका रोसलाई मुख्य प्रशिक्षकमा नियुक्त गरेको थियो । सोमबार सञ्चारकर्मीसँग कुरा गर्दै रोसले चार सातादेखि आफूले नेपाली फुटबललाई नियालिरहेकाले नेपालमा क्षमतावान खेलाडी भएको बताउनुभयो ।

उहाँको प्रशिक्षणमा नेपालले मैत्रीपूर्ण खेलपछि एसियन कपको छनोट खेल्नेछ । एएफसी एसियन कप २०२७ को छनोटमा नेपालले मार्च २५ मा मलेसियासँग प्रतिस्पर्धा गर्नेछ । यो खेल नेपालमा नै हुनुपर्ने थियो । तर, दशरथ रंगशालाले अन्तर्राष्ट्रिय मान्यता नपाउँदा त्यो खेल मलेसियामा हुन लागेको हो । यद्यपि, एन्फाका प्रवक्ता सुरेश शाहले मलेसियासँग हुने पहिलो खेललाई अवे खेलका रूपमा परिवर्तन गरेर दोस्रो खेललाई होम गेम प्रस्ताव गरिएको र जुन एएफसीबाट पनि स्वीकृत भइसकेको बताउनुभयो ।

‘एसियन कप छनोटको पहिलो लेग दशरथ रंगशालामा हुनुपर्ने थियो । एएफसीले सेक्युरिटी कन्सर्न देखायो । सेक्युरिटी सर्टिफिकेट बन्न असारसम्म लाग्ने भयो । त्यसैले पहिलो खेललाई मलेसियामा राखेर अवे गेमको प्रस्ताव गरेका थियौं । नोभेम्बरमा हुने खेल नेपालमा गराउने मलेसियाको एफ सहमत भएको छ । एएफसीले स्वीकृति दिएको छ,’ उहाँले भन्नुभयो । एसिया कप छनोटमा नेपाल समूह ‘एफ’ मा छ । यस समूहमा बलियो भियतनामसँगै लाओस र मलेसिया छन् । भियतनाम सन् २०१९ मा एसियन कपको क्वाटरफाइनलसम्म पुगेको थियो । एउटा टोली छनोट हुने यस समूहबाट प्रशिक्षक म्याटले छनोट हुने लक्ष्य राख्नुभएको छ ।

रोसले विदेश गएका खेलाडीलाई स्वदेश फर्किएर राष्ट्रिय टोलीमा योगदान गर्ने ढोका सधैं खुला रहने पनि बताउनुभयो । रोसले आफू नेपाली टोलीको प्रशिक्षक बन्न पाउनु खुसीको क्षण भएको पनि सुनाउनुभयो । नेपाली खेलाडीको क्षमता राम्रो देखेको भन्दै रोसले बल नियन्त्रण र दबाबपूर्ण खेलमा धैर्य गरेर खेल्न जरुरी रहेको बताउनुभयो । एन्फाले रोससँग एक वर्षका लागि सम्झौता गरेको हो ।

नेपाली टोलीका पूर्वप्रशिक्षक भिन्सेन्जो अल्बर्टो एनेसको कार्यकाल आठ महिनाअघि सकिएपछि नेपाली पुरुष टोली प्रशिक्षकविहीन थियो । एन्फाले प्रशिक्षकका लागि आवेदन दिएका विश्वभरका चार सय १६ प्रशिक्षकबाट २० जना हुँदै अन्तिममा पाँचजनाबाट रोसलाई नियुक्त गरेको हो । ‘युइएफए प्रो लाइसेन्स’ मान्यताप्राप्त रोस यसअघि सन् २०२० देखि २०२३ सम्म दक्षिण कोरिया राष्ट्रिय महिला टोलीको प्रशिक्षकको जिम्मेवारीमा हुनुहुन्थ्यो ।

सहायक प्रशिक्षकमा खड्की
नेपाली राष्ट्रिय पुरुष फुटबल टोलीको सहायक प्रशिक्षकमा सल्यान खड्की नियुक्त हुनुभएको छ । अखिल नेपाल फुटबल संघ (एन्फा) ले मंगलबार खड्कीलाई सहायक प्रशिक्षकको जिम्मेवारी दिएको हो । एन्फा महासचिव किरण राईले खड्कीलाई नियुक्ति पत्र प्रदान गर्नुभयो ।

एन्फाले खड्कीलाई नेपालले आगामी मार्च २१ गते सिंगापुरसँग खेल्ने मैत्रीपूर्ण खेल र मार्च २५ मा मलेसियासँग खेल्ने एसियन कप छनोट खेल २०२७ लाई लक्षित गरी जिम्मेवारी दिएको हो ।

एन्फाले मंगलबार नै टोलीको गोलरक्षक प्रशिक्षकमा विनोद महर्जन, व्यवस्थापकमा नकुल हमाल र रमेशकुमार कार्की तथा फिजियोमा निशान्त जोशीलाई नियुक्त गरेको छ ।