विद्यालय शिक्षा ऐन जारी गर्न माग गर्दै शिक्षकहरू अनिश्चितकालीन आन्दोलनमा

काठमाडौं । विद्यालय शिक्षा ऐन जारी गर्नुपर्ने माग राख्दै शिक्षकहरू बुधबारदेखि फेरि आन्दोलित भएका छन् । विद्यालय तहको परीक्षा सकाएर देशभरका शिक्षकहरू काठमाडौंमा भेला भई प्रदर्शनमा उत्रिएका हुन् । उनीहरूले ‘विगतमा भएका ‘सम्झौता कार्यान्वयन गर्’, ‘शिक्षा ऐन जारी गर्’, ‘हाम्रो माग पूरा गर्’, ‘शिक्षक पेसालाई सम्मान गर्’, लगायत विभिन्न नारा लगाउँदै प्रदर्शनमा उत्रिएका हुन् । नेपाल शिक्षक महासंघको अगुवाइमा उक्त आन्दोलन भएको हो । दोस्रो चरणको आन्दोलनका कार्यक्रमअन्तर्गत महासंघले विद्यालय शिक्षा ऐन जारी गर्न दबाब दिने भन्दै प्रमुख राजनीतिक दलका पार्टी कार्यालयमा धर्ना दिएको थियो । तर, सदनको हिउँदे अधिवेशनबाट पनि विद्यालय शिक्षा विधेयक अघि बढ्न नसकेपछि महासंघले अनिश्चितकालीन काठमाडौं केन्द्रित सडक आन्दोलन सुरु गरेको हो । यसअघि भएको सहमतिका आधारमा विद्यालय शिक्षा विधेयक पारित गर्नुपर्ने महासंघको माग छ ।

माघ २० गतेदेखि आन्दोलनमा रहेको नेपाल शिक्षक महासंघले बुधबारदेखि काठमाडौं जाऔँ अभियानअन्तर्गत अनिश्चितकालीन सडक आन्दोलन सुरु गरेका हुन् । महासंघका अध्यक्ष लक्ष्मीकिशोर सुवेदीले संसद्मा छलफलमा रहेको विद्यालय शिक्षा विधेयक यथाशीघ्र जारी गर्न मागसहित आन्दोलन थालिएको बताउनुभयो । अब हरेक दिन बिहान ११ बजेदेखि ४ बजेसम्म माइतीघर बानेश्वर सडक खण्डमा भेला भएर प्रदर्शन गर्ने कार्यक्रम रहेको अध्यक्ष सुवेदीले बताउनुभयो । गुणस्तरीय विद्यालय शिक्षा, विद्यार्थी र शिक्षक कर्मचारीमैत्री अग्रगामी विद्यालय शिक्षा ऐन जारी गराउन राज्य पक्षलाई बाध्य पार्न आन्दोलन गर्न लागिएको अध्यक्ष सुवेदीको भनाइ छ । आन्दोलनमा देशभरका सबै शिक्षक कर्मचारी सहभागी हुने उहाँले बताउनुभयो । काठमाडौं आएका शिक्षक कर्मचारी विद्यालय शिक्षा ऐन जारी नहुँदासम्म काठमाडौंबाट नफर्किने उहाँले जनाउनुभयो । शिक्षा विधेयक प्रतिनिधि सभामा पेस भई छलफलका क्रममा छ । विधेयकमा रहेका कतिपय प्रावधानमा शिक्षकहरूको असहमति छ ।

‘शिक्षकले आन्दोलन गर्नुपर्ने कारण छैन’
प्रतिनिधिसभा अन्तर्गतको शिक्षा, स्वास्थ्य तथा सूचना प्रविधि समिति सभापति अम्मरबहादुर थापाले शिक्षकले मागेको भन्दा बढी माग पूरा गर्ने बताउँदा बताउँदै शिक्षकहरू आन्दोलनमा आएको प्रतिक्रिया दिनुभएको छ । रातारात विधेयक पास हुन नसक्ने बताउँदै सभापति थापाले भन्नुभयोे, ‘यो आर्थिक वर्षमा पेस गर्छु भनेकै छ । आन्दोलन गर्नुपर्ने कारण छैन । मागेको भन्दा बढी दिने भनेकै छ । आन्दोलन गर्नु भनेको शिक्षा बिगार्नु हो ।’ हिउँदे अधिवेशन अन्त्य भएकाले शिक्षकहरूले अध्यादेश ल्याउन सकिने बताइरहेका छन् । तर, सभापति थापा अध्यादेशको पक्षमा हुनुहुन्न । अध्यादेशबाट कानुन बनाउने ? शिक्षा बिगार्ने ? अध्यादेशबाट आयो भने विधेयकको के अर्थ ? डेढ वर्षको मिहिनेत खेर जान्छ,’ सभापति थापाले भन्नुभयोे । शिक्षामा दलीयकरण नहुने गरी आगामी अधिवेशनमा विधेयक पास हुने उहाँको जिकिर छ । ‘विद्यार्थीको विषययमा देशको विषयमा सोच्ने छैन । आफ्नोे विषयमा मात्र सोच्ने भयो,’ उहाँले भन्नुभयो, ‘आगामी अधिवेशनमा पेस हुन्छ ।’ शिक्षा समितिले उपसमिति बनाएर काम गरिरहेको सभापति थापाले बताउनुभयो । विधेयक पास गर्न माग गर्दै बुधबारदेखि देशभरबाट शिक्षकहरू काठमाडौं आइपुगेका छन् । विधेयक पास नभएसम्म आन्दोलन जारी राख्ने चेतावनी शिक्षकहरूले दिएका छन् ।

ट्राफिक व्यवस्थापन अस्तव्यस्त
शिक्षकहरूको प्रदर्शनका कारण बुधबार काठमाडौंको नयाँ बानेश्वरदेखि माइतीघर मण्डलासम्म ट्राफिक व्यवस्थापन अस्तव्यस्त बन्यो । विद्यालय शिक्षा ऐन जारी गर्न माग गर्दै शिक्षकहरूले बुधबार काठमाडौंमा ¥याली निकालेका थिए । शिक्षक महासंघको अगुवाइमा काठमाडौंका विभिन्न स्थानबाट निस्किकेको र्‍याली माइतीघर मण्डलामा पुगेर धर्नामा परिणत भएको थियो । त्यसैबीच प्रदर्शनका कारण सो क्षेत्रमा ट्राफिक व्यवस्थापन अस्तव्यस्त बनेको हो । आन्दोलनलाई शान्तिपूर्ण बनाउन आठ सय स्वयंसेवक परिचालन गरिएको शिक्षकहरूको भनाइ छ ।