२०८२ मा जनचाहना अनुसारको परिणाम हासिल होस् : पूर्वराजा ज्ञानेन्द्र

काठमाडौं । पूर्वराजा ज्ञानेन्द्र शाहले नयाँ वर्ष २०८२ को अवसरमा अर्को राजनीतिक सन्देश दिनुभएको छ । नयाँ वर्षको शुभकामना दिने नाममा उहाँले अहिलेको अस्थिर राजनीतिक व्यवस्थाबाट २०८२ मा देशले मुक्ति पाउने बताउनुभएको छ । गत फागुन ७ गते मनाइएको प्रजातन्त्र दिवसका अवसरमा दिएको राजनीतिक सन्देशको तरंग सेलाउन नपाउँदै उहाँले अर्को तरंग ल्याउने कोसिस गर्नुभएको हो ।
उहाँले सन्देशका क्रममा हरेक नयाँ वर्ष उत्साहका साथ आएर अन्तिममा निराश बनाउँदै जाने गरेको बताउनुभएको छ । ‘हरेक वर्ष नयाँ उत्साहसहित आउने गर्छन् तर अन्त्य भने घनघोर निराशामा बित्ने गरेको छ । समाजका दल, समुदायले आफ्ना धारणा राख्न पाउनु प्रजातन्त्रको सुन्दर विशेषता हो’, उहाँले १४ मिनेट लामो भिडियो सन्देशमा भन्नुभएको छ, ‘तर त्यस्तो धारणा र मान्यता प्रस्तुत गर्दा संयम अपनाउनुपर्छ ।’

उहाँले नागरिक स्वतन्त्रताभन्दा अर्को तन्त्र वा वाद नहुने पनि बताउनुभएको छ । ‘वास्तविक प्रजातन्त्रमा राम्रोलाई राम्रो, नराम्रोलाई नराम्रो र असल कामको गुणगान गर्ने र सुन्ने संस्कार हुन्छ’, उहाँले भन्नुभएको छ, ‘नेपाली जनतामा रहेको देशभक्तिपूर्ण भावना अनुकरणीय र अनुशरणीय छ ।’ उहाँले देश अहिले जटिल राजनीतिक मोडमा रहेको बताउँदै २०८२ सालमा यसबाट निकाल्नुपर्ने उल्लेख गर्नुभएको छ । शाहले राष्ट्रियता र प्रजातन्त्रलाई मूल कार्यभार मानी संवैधानिक राजसंस्थाका रूपमा रहने आफूहरूको परम्परामा मान्यता रहेको पनि बताउनुभएको छ । ‘वर्तमानमा जनताको चाहनाको कदर गरी राज्यसंस्थाको स्रोत जनता नै हुन्’, उहाँले भन्नुभयोे, देशलाई विद्यमान जटिलताबाट मुक्त गराई शान्त, स्थिर, समृद्ध मुलुक बनाउने जुन जागरूकता पैदा भएको छ, २०८२ मा नेपाली जनताको चाहना अनुसारको परिणाम हासिल हुने विश्वास थपिएको छ ।’ शाहले देश भ्रष्टाचारको दलदलमा रहेको पनि बताउनुभएको छ । उहाँले अरू देशहरू समृद्धिको पथमा धेरै माथि पुगिसक्दा पनि नेपाल भने राजनीतिक अस्थिरता र भ्रष्टाचारको जालोमा फसेको भन्दै दलहरूतिर कटाक्ष पनि गर्नुभएको छ ।

उहाँले मुलुकको आर्थिक अवस्था कमजोर बन्दै गएको, उद्योगधन्दा सुस्त रहेको, बेरोजगारी उच्च भएको र राष्ट्रिय ऋण बढ्दो क्रममा रहेको उल्लेख गर्नुभयो । सामाजिक सद्भाव, राष्ट्रिय एकता र मौलिक धर्म-संस्कृति कमजोर बन्दै गएको भन्दै उहाँले ती सबै विषयलाई गम्भीर रूपमा लिनुपर्ने बताउनुभयो । ‘स्वदेश फर्क, स्वदेश नै स्वर्ग’ भन्ने अभियान चलाउनु आजको आवश्यकता भएको पनि उहाँले उल्लेख गर्नुभएको छ ।

तीनकुने घटनाप्रति दुःख व्यक्त
पूर्वराजा शाहले गत चैत १५ गते काठमाडौंको तीनकुनेमा भएको जनप्रदर्शनका क्रममा भएको हिंसा, आगजनी, तोडफोड र मानवीय एवं भौतिक क्षतिप्रति दुःख व्यक्त गर्नुभएको छ । नयाँ वर्ष २०८२ को शुभकामना दिने क्रममा उहाँले तीनकुने घटनामा भएको हिंसा र तोडफोडका साथै मानवीय क्षतिप्रति दुःख व्यक्त गर्नुभएको हो । उहाँले चैत १५ को राजावादीहरूको हिंसात्मक प्रदर्शनलाई जनप्रदर्शनको संज्ञा दिनुभएको छ । ‘चैत १५ गते भएको जनप्रदर्शनमा जुन प्रकारको हिंसा आगजनी र तोडफोड भयो मानवीय एवं भौतिक क्षति भयो, त्यो सुन्दा हामीलाई अत्यन्त दुःख लाग्यो’, उहाँले भन्नुभएको छ, ‘नागरिक स्वतन्त्रताभन्दा ठूलो तन्त्र वा वाद हुँदैन । वास्तविक प्रजातन्त्रमा राम्रोको प्रशंसा र नराम्रोको आलोचना हुन्छ । गुणगान पनि हुन्छ । आलोचना पनि सुन्ने संस्कार हुन्छ ।’ देशमा व्याप्त अशान्ति, अराजकता, निराशा र असन्तुष्टिबाट आम नेपालीलाई मुक्त गर्न नेपालको राजसंस्थाले जहिल्यै पनि योगदान पु¥याउँदै आएको पूर्वराजा शाहको भनाइ छ ।