काठमाडौं । सिद्धिचरण नगरपालिका (साबिक विगुटार गाउँपालिका) ओखलढुंगाका चर्चित राजनीतिकर्मी तथा समाजसेवी पीताम्बर दाहालको निधन भएको छ । काठमाडौं कपनमा बस्दै आउनुभएका दाहालको ८६ वर्षको उमेरमा सोमबार निधन भएको हो । उहाँ केही समययता अस्वस्थ हुनुहुन्थ्यो ।
साबिक राँगादीप विद्यालयको शिक्षकका रूपमा लामो समय अध्यापन गरी तत्कालीन पञ्चायती राजनीतिमा परिवर्तनको आवाज बुलन्द गर्दै सक्रिय दाहाल निर्दलीयकालमा पटक–पटक गिरफ्तारसमेत हुनुभएको थियो । ०३६ सालको बहुदल वा निर्दल भन्ने जनमत संग्रहका समयमा उहाँ बहुदलका पक्षमा सक्रिय हुनुभएको थियो । त्यसपछिका दिनमा उहाँले नेपाली कांग्रेसलाई सहयोग गर्ने काम गर्नुभयो र पार्टीको अभियानमा सक्रिय हुँदै जिल्ला विकासको सदस्यसमेत हुनुभयो ।
स्वर्गीय दाहालको सोमबार नै पशुपति आर्यघाटमा दाहसंस्कार गरिएको छ । उहाँको पार्थिव शरीरमा ओखलढुंगाबाट संघीय सांसद तथा नेपाली कांग्रेसका केन्द्रीय सदस्य रामहरि खतिवडा, ट्रेड युनियन कांग्रेसका पूर्वसभापति खिलानाथ दाहाल, कांग्रेसका युवा नेता अजय लुईँटेलसहितले नेपाली कांग्रेसको झण्डा ओढाएर सम्मान प्रकट गर्नुभएको थियो । विगुटारको राजनीतिक, सामाजिक र शैक्षिक जीवनमा योगदान गर्नुभएका नेता दाहालप्रति श्रद्धाञ्जली दिन विगुटार, वरुणेश्वर, जन्तरखानी, राँगादीप, प्राप्चा, हर्कपुर, माधवपुर, ओखलढुंगा वरपर क्षेत्रबाट काठमाडौंमा बसोबास गर्नुहुनेहरूको ठूलो संख्यामा उपस्थिति रहेको थियो ।
स्वर्गीय दाहालका एक धर्मपत्नी, दुई छोरा, पाँच छोरी र नातिनातिनाहरू रहेका छन् । दाहालको निधनमा विराज समाज र विगुटार विकास फाउण्डेसनले गहिरो दुख प्रकट गर्दै श्रद्धाञ्जली प्रकट गरेका छन् ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच