सर्लाही । सर्लाहीको धनकौल गाउँपालिकामा पशुचौपायलाई लम्पी स्किनविरुद्धको खोप लगाउन सुरु गरिएको छ ।
केही समयदेखि स्थानीय किसानले पालेका गाई, गोरु, भैँसीलगायतका चौपायमा लम्पी स्किनको सङ्क्रमण देखा परेपछि गाउँपालिकाले सातवटै वडामा शिविर आयोजना गरेर पहिलो पटक खोप लगाउन सुरु गरेको हो ।
गाउँपालिकाबाट लम्पी स्किनविरुद्धको दुई हजार भाइल खोप खरिद गरिएको गाउँपालिकाको पशु सेवा शाखाका प्रमुख रामश्रेष्ठ जानकारी दिनुभयो । उहाँका अनुसार यो खोप सङ्क्रमित नभएका पशुलाई मात्रै लगाइने छ । लम्पी स्किन लागिसकेका पशुलाई खोपले काम नगर्ने पशु प्राविधिकले बताएका छन् । धनकौल गाउँपालिकाको सबै वडामा लम्पी स्किन देखिएपनि एकिन तथ्याङ्क भने नरहेको भेटेरिनरी अस्पताल तथा पशु सेवा विज्ञ केन्द्र मलङ्गवाका वरिष्ठ पशु विकास अधिकृत शङ्कर साहले बताउनुभयो ।
उहाँका अनुसार धनकौलसहित जिल्लाको २० वटै पालिकामा लम्पी स्किनको सङ्क्रमण फैलिएको छ । धनकौल गाउँपालिकामा मात्रै यस रोगको सङ्क्रमणबाट दुईवटा पशु मरिसकेका छन् । वरिष्ठ पशु विकास अधिकृत साहले लम्पी स्किनको सङ्क्रमण भएका बेला उच्च ज्वरो आई पशु मर्ने गरेका बताउनुभयो । दुहुनो चौपायमा यो रोगले भेटेपछि दुध उत्पादनमा कमी आउने र प्रजननमा समस्या तथा गर्भपतन समेत हुनसक्ने सम्भावना रहेको साहले बताउनुभयो । धनकौल गाउँपालिकाले आज सदरमुकाम मलङ्गवाबाट समेत प्राविधिक बोलाएर वडा नं. २ बाट लम्पी स्किनविरुद्धको खोप लगाउन सुरु गरेको हो ।
उता, ईश्वरपुर नगरपालिकाले पनि घरघरमै पशु चिकित्सक पठाएर लम्पी स्किनविरुद्धको उपचार सुरु गरेको छ । आज पहिलो दिन वडा नं. १ मा पशु चिकित्सक पठाएर लम्पी स्किन देखिएर ज्वरो आएका, घाउ भएका चौपायको उपचार सुरु गरिएको नगरपालिकाले जनाएको छ ।
आफूहरु घरघरमै पुगेर बिरामी भएका चौपायलाई उपचार गर्ने, रोगविरुद्ध लड्न सक्ने औषधि वितरण गर्ने काम गरिरहेको नगरपालिकाको पशु सेवा शाखाका पशु प्राविधिक प्रदीप कार्कीले बताउनुभयो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच