काठमाडौं । थाइल्याण्डको राष्ट्रिय ध्वजावाहक थाई एयरवेज इन्टरनेसनलले नोभेम्बरदेखि फेरि नेपालमा उडान सुरु गर्ने भएको छ । जसका लागि एयरवेजले एजेन्सी सोसाइटी इन्टरनेसनल ट्राभल सर्भिसेसलाई नेपाली बजारका जनरल सेल्स एजेन्ट नियुक्त गरेको छ ।
सम्झौताअनुसार सोसाइटी इन्टरनेसनल ट्राभल सर्भिसले थाई एयरवेज इन्टरनेसनलका लागि सम्पूर्ण ग्राहक र एजेन्ट सपोर्ट सेवासहित चौतर्फी सेल्स, मार्केटिङ र विमानस्थलस्थित सेवा उपलब्ध गराउनेछ ।
सम्झौताअनुसार थाई एयरवेजले विश्वव्यापी कोरोना महामारीका कारण अप्रिल २०२० देखि रोकिएको काठमाडौंका लागि उडान पुनः सञ्चालन गर्नेछ । सन् १९६८ को डिसेम्बरमा नेपालका लागि पहिलोपटक उडान सञ्चालन गरेको थाई एयरवेज नेपाली उड्डयन इतिहासमा र नेपाली जनतामाझ विशेष स्थान राख्न सफल भएको छ । थाई एयरवेज थाइल्याण्डमा विदेशी पर्यटन प्रवद्र्धन गर्ने आफ्नो निरन्तर प्रतिबद्धताअनुसार नेपाली जनतामा थाई एयरवेजको सेवा र सुविधाका लागि उपस्थिति सुदृढ गर्दै नेपाली बजारमा रहेको अवसर सदुपयोग गर्न चाहन्छ ।
थाई एयरवेज इन्टरनेसनलका चिफ कमर्सियल अफिसर कोराकोट चटासिङ्घाले थाई एयरवेज इन्टरनेसनलको काठमाडौं उडान पुनः सञ्चालनमा आएकोमा खुसी व्यक्त गर्दै भन्नुभयो, ‘थाइल्याण्डभित्रका विभिन्न आन्तरिक तथा विश्वप्रसिद्ध गन्तव्य जस्तै फुकेट, पट्टाया र क्राबी साथै राजधानी शहर बैंककलाई थाई एयरवेजको उडान पुनः सञ्चालनले नेपाली पर्यटक र यात्रुको बढ्दो संख्याका लागि मात्र नभई दुई देशबीचको आर्थिक गतिविधिसमेत अभिवृद्धि गर्नेछ भन्ने कुरामा विश्वस्त रहेको छ ।’
अष्ट्रेलिया, जापान, कोरिया, मलेसिया र विश्वका विभिन्न शहरमा थाई एयरवेजको उडान रहेकाले नेपाली यात्रुलाई सहज र सुरक्षित उडान विकल्प प्रदान गर्नुका साथै नेपालको पर्यटन प्रवद्र्धन गर्न सक्षम हुने उहाँको भनाइ छ ।
आरआर ग्रुप अफ कम्पनीको भगिनी संस्था सोसाइटी इन्टरनेसनल ट्राभल सर्भिसेजका अध्यक्ष रविचन्द्र सिंहले भन्नुभयो, ‘हामी थाई एयरवेज इन्टरनेसनलको नेपालका लागि जिएसए नियुक्त भई काम गर्न पाउँदा हर्षित र सम्मानित भएका छौँ । हाम्रो नियुक्ति सोसाइटी इन्टरनेसनल ट्राभलको अन्तर्राष्ट्रिय उत्कृष्ट अभ्याससहितको स्थानीय विशेषताको प्रतिबिम्ब हो भन्नेमा विश्वस्त छौँ । थाई एयरवेजको उडान पुनः सञ्चालनले पर्यटकलाई नेपाल भ्रमणका लागि थप कनेक्टिभिटी उपलब्ध गराएर नेपालको पर्यटन उद्योग प्रवद्र्धन गर्न पनि मद्दत गर्नेछ भन्नेमा हामी विश्वस्त रहेका छौँ ।’
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच