दाङ । दाङमा शुक्रबारदेखि ‘भिएफएक्स सिनेमाज’ नामक जिल्लाकै पहिलो मल्टिप्लेक्स सिनेमा हल सञ्चालनमा आएको छ । दुई युवा व्यवसायी विजय रावत र चेतनजंग रानाले करिब २० करोडको लागतमा हल सञ्चालनमा ल्याउनुभएको हो । दुईवटा अडिटोरियम रहेको हलमा जम्मा ४१२ (एउटामा १६५ र अर्कोमा २४७) सिट क्षमता छ । भिएफएक्स सिनेमाज प्रालिअन्तर्गत सञ्चालनमा आएको हल घोराही उपमहानगरपालिका–८ सौंडीकुला चोकबाट करिब ४०० मिटर दक्षिणतिर अवस्थित छ ।
हल सञ्चालक रावत र रानाले संयुक्तरूपमा शुक्रबार बिहान साढे आठ बजेको शोमा नेपाली चलचित्र ‘परदेशी-२’ लाई स्क्रिनिङ गर्दै हलको औपचारिक शुभारम्भ गर्नुभएको हो । रावत र रानाले हलको निर्माण तीन वर्षअघिदेखि सुरु गर्नुभएको थियो । जग्गासहित करिब २० करोडको लगानीमा निर्माण भएको हल कोरोना महामारी र आर्थिक मन्दीका कारण निर्माणमा ढिलाइ भएको थियो ।
उद्घाटन कार्यक्रममा बोल्दै हल सञ्चालक रावतले ‘अन्त सबैतिर थ्रिडीसहित सबै सिनेमा चल्ने हलहरू निर्माण भइसक्दा पनि दाङमा हालसम्म गुणस्तरीय हल थिएन,’ उहाँले भन्नुभयो, ‘त्यही तथ्यलाई मध्यनजर गर्दै दर्शकको चाहना ध्यानमा राखेर हामीले मल्टिप्लेक्स सिनेमा हलमा लगानी गरेका हौँ ।’
उहाँले आफ्नो हलमा विदेशीभन्दा नेपाली चलचित्रलाई प्राथमिकता दिने पनि बताउनुभयो । ‘चलचित्र नै चलेको छैन भने त माया-प्रेमले मात्र हल चल्दैन । राम्रो चलेको नेपाली चलचित्रलाई पीडित हुने अवस्था आउन दिने छैनौँ,’ रावतले प्रतिबद्धता व्यक्त गर्नुभयो ।
कार्यक्रममा भिएफएक्स सिनेमाजको योजना सुनाउँदै अर्का सञ्चालक रानाले भन्नुभयो, ‘हामीले भिएफएक्स ब्राण्डलाई मल्टिप्लेक्स चेनका रूपमा देशव्यापी विस्तार गर्दैछौँ ।’ दाङपछि काठमाडौंमा हल खोलिने र त्यसपछि देशैभर विस्तार गरिने योजना रहेको उहाँले बताउनुभयो ।
दाङमा यसअघि गणेश हल, मनकाँशी हल र स्वर्गद्वारी हल सञ्चालनमा छन् । जिल्लाभर भएका नौवटा हलमध्ये कोरोना कहरपछि भने अन्य ६ वटा हल सञ्चालनमा आउन सकेनन् ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच