नेपाली हवाई सेवालाई कालोसूचीबाट हटाएन इयुले

काठमाडौं । युरोपियन युनियन (इयु)ले नेपाललाई राखेको सुरक्षा सूची (कालोसूची) लाई निरन्तरता दिएको छ । उसले नेपाल नागरिक उड्डयन प्राधिकरणलाई पत्र पठाउँदै उक्त जानकारी गराएको हो । नेपाल सरकारले पटक-पटक प्रयास गरे पनि नेपाल युरोपियन युनियनको उडानसम्बन्धी कालोसूचीबाट हट्न नसकेको हो । इयुले नेपाल वायुसेवा निगमलाई देखाउँदै कालोसूचीलाई निरन्तरता दिएको छ । नेपालमा भएको स्थलगत अवलोकन तथा मूल्यांकनका आधारमा कात्तिक २८ मा बेल्जियममा भएको सुनुवाइबाट तयार पारिएको प्रतिवेदनका आधारमा कालोसूचीलाई निरन्तरता दिएको प्राधिकरणले जनाएको छ ।

इयु प्रतिनिधिमण्डलले भदौ २५ गतेदेखि २९ गतेसम्म नेपालमा नागरिक उड्डयन प्राधिकरण, नेपाल वायुसेवा निगम र श्री एयरलायन्सको स्थलगत अवलोकन तथा मूल्यांकन गरेको थियो । कात्तिक २८ देखि ३० गतेसम्म ब्रसेल्समा तीनवटै निकायका प्रतिनिधि राखेर सुनुवाइ गरेको थियो । दुई अडिटका आधारमा बुधबार इयुले प्र्राधिकरण, बेल्जियमस्थित नेपाली दूतावाससहित सरोकारवालालाई प्रतिवेदनको सार पठाउँदै नेपाललाई सुरक्षा सूचीबाट तत्काल हटाउन नसक्ने जनाएको हो । युनियनले बिहीबार सार्वजनिक गरेको प्रतिवेदनअनुसार नेपाली वायु सेवा कम्पनीलाई युरोपेली मुलुकको आकाश प्रयोगमा १० वर्षदेखि लागेको प्रतिबन्धलाई निरन्तरता दिएको छ ।

प्रतिवेदनले निगमलाई युरोप उडानमा जानसक्ने गरी थुप्रै सुधार गर्नुपर्ने सुझाएको छ । उसले निगम नेतृत्व, प्रक्रियागत पद्धति तथा समग्र प्रणालीमा सुधार गरिनुपर्ने जनाएको छ । सुरक्षा व्यवस्थापन प्रणाली (एसएमएस) पालना नगरेको, प्राधिकरणले वार्षिक गर्ने सम्परीक्षणमा औँल्याएका कमी कमजोरी सुधार नगरेको, सम्परीक्षण सूचीको गुणस्तर सुधार नगरेको, उडान समयको निश्चितता, हवाई कागजात व्यवस्थापन तथा सुझाव कार्यान्वयनजस्ता पक्षमा गम्भीर कमजोरी रहेको, वायुयानको उडान योग्यता तथा क्षमता सम्बन्धमा गर्नुपर्ने आवश्यक नियमन तथा सुरक्षा चासोमा कमी देखिएको प्रतिवेदनमा उल्लेख छ ।

तथापि, नेपालका प्रधानमन्त्रीको पहलकदमी, सरकारको प्रतिबद्धता तथा वर्तमान प्राधिकरण महानिर्देशकको गतिशील नेतृत्व र कार्यशैलीबाट प्रशंसनीय सुधार भएको औँल्याउँदै उपलब्धिलार्ई निरन्तरता दिई भविष्यमा अझ बढी परिणाममुखी बनाउन राजनीतिक नेतृत्व एवं सरकारको रचनात्मक भूमिका अपरिहार्य रहेको इयुले उल्लेख गरेको छ ।

नेपाल एयरलाइन्सको लापरबाही, प्रधानमन्त्री लिएर उड्दा ३१ यात्रु छुटे
बुधबार प्रधानमन्त्री पुष्पकमल दाहाल ‘प्रचण्ड’ कोप-२८ मा सहभागी हुन नेपाल एयरलाइन्सले समय अगाडि सार्दा ३१ जना यात्रु छुट्न पुगे । बुधबार राति साढे ९ बजे प्रधानमन्त्री प्रचण्डसहित २५० जना यात्रु दुबईका लागि उड्नुभएको थियो । प्रधानमन्त्री प्रचण्ड कोप-२८ मा सहभागी हुन त्यहाँ जानुभएको हो । नेपाल एयरलाइन्सको राति साढे ११ बजे नियमित उडान हुन्छ । त्यसअनुसार नै बुधबारका लागि पनि त्यही समयको टिकट बुकिङ भइसकेको थियो । तर, भिभिआइपीको भ्रमण हुने भएकाले उक्त समय अगाडि सारिएको नेपाल वायु सेवा निगमका प्रवक्ता रमेश पौडेलले जानकारी दिनुभयो । समय अगाडि सार्दा ३१ जना यात्रु छुटे । उनीहरूलाई एयरलाइन्सले काठमाडौंका होटलहरूमा राखेको थियो । फ्लाइट छुटेका प्रज्वल विक्रम रानाले सामाजिक सञ्जालमा भिडिओ राख्दै नेपाल एयरलाइन्सको लापरबाहीले आफूहरू छुटेको बताउनुभएको छ । ‘काठमाडौंबाट दुबई साढे ११ बजेको फ्लाइटमा जान लागिरहेको थिएँ । सोही फ्लाइटमा हाम्रो सम्माननीय प्रधानमन्त्री पनि जान लाग्नुभएको रहेछ । सोही कारणले फ्लाइटलाई दुई घण्टा अगाडि सारेको रहेछ,’ उहाँले भन्नुभएको छ, ‘तर, नेपाल एयरलाइन्सले हामी धेरैजना यात्रुहरूलाई जानकारी पनि दिएन ।’ राना साढे ८ बजे एयरपोर्टमा पुग्नुभएको थियो । उहाँ त्यहाँ पुग्दा कर्मचारीहरू प्रधानमन्त्रीको बिदाइका लागि गएको र करिब एक घण्टापछि ड्युटी अफिसर आएर माथिको आदेशअनुसार सारिएको भन्ने जानकारी दिएको उहाँले बताउनुभयो । ‘जानकारी गराउनुपर्ने कुरामा आफ्नो जिम्मेवारी हो भन्ने खालको व्यवहार पनि गर्नुभएन । र, पछि एउटा पत्र दिइयो,’ उहाँले भन्नुभयो ।

यसबारे केही कारबाही गर्न पनि उहाँले माग गर्नुभएको छ । निगमका प्रवक्ता रमेश पौडेलले आफूहरूबाट लापरबाही नभएको दाबी गर्नुभयो । ‘हामीले उहाँहरूको इमेल राखेका हुन्छौँ । फोन नम्बर राखेका हुन्छौँ । मंसिर ८ गतेदेखि नै यस्तो हुँदै छ भनेर जानकारी गराएका थियौँ । तर, पनि केही छुट्नुभएको छ । त्यसमा दुःख लागेको छ,’ उहाँले भन्नुभयोे, ‘अरू २५० जना यात्रुहरूले चाहिँ सूचना पाएर छिटो आइपुग्नुभयो । उहाँहरू कसरी छुट्नुभयो भन्ने हामी छानविन गर्छौं ।’

निगमद्वारा क्षमा याचना
नेपाल वायु सेवा निगम (नेपाल एयरलाइन्स)ले टिकट काटिसकेका ३१ जना यात्रुहरूलाई नचढाई दुबई उडेको विषयमा क्षमा मागेको छ । साथै यसबारे आन्तरिक छानविन गरी कारबाही गर्न निगमका वाणिज्य विभाग प्रमुखलाई निर्देशनसमेत दिएको छ । बिहीबार दिउँसो नेपाल एयरलाइन्सका प्रवक्ता रमेश पौडेलले विज्ञप्ति जारी गरी यात्रुहरूलाई पर्न गएको असुविधाप्रति क्षमायाचना गर्दै ती सबै यात्रुहरूलाई वैकल्पिक उडानबाट गन्तव्यमा पुर्‍याउने प्रबन्ध मिलाइएको जनाउनुभएको छ । साथै यस्ता घटना फेरि दोहोरिन नदिन र आन्तरिक छानविन गरी कारबाही गर्न निगमका अध्यक्ष युवराज अधिकारीले वाणिज्य विभाग प्रमुखलाई विशेष निर्देशन दिएको विज्ञप्तिमा उल्लेख छ । यात्रुहरूले राति साढे ११ बजे उड्ने भनिएको जहाज साढे ९ बजे नै उड्दा आफूहरू मर्कामा परेको भन्दै त्यसको लिखित कारण मागेका थिए । त्यसपछि नेपाल एयरलाइन्सका ड्युटी अफिसरले ‘भिभिआइपी फ्लाइट’का कारण यात्रुहरू छुटेको व्यहोराको पत्र दिनुभएको थियो ।

मन्त्री किराँतीले माग्नुभयो माफी
संस्कृति, पर्यटन तथा नागरिक उड्डयनमन्त्री सुदन किराँतीले नेपाल एयरलाइन्सले प्रधानमन्त्रीको युएई भ्रमणका क्रममा बुधवार ३१ यात्रु छोडिएकोप्रति माफी माग्नुभएको छ । बिहीबार काठमाडौंमा एक कार्यक्रमबीच उहाँले यस्तो बताउनुभएको हो । उहाँले २७४ जना प्यासेन्जरमध्ये ३१ जना छोडिएको र उनीहरूलाई सरकारले नै होटलमा राखी बिहीबार गन्तव्यमा पुर्‍याएको बताउनुभयो । उहाँले भिभिआइपी सवार हुने भएकाले परराष्ट्रको चिठी, निर्देशनको आधारमा झण्डै दुई हप्ता अघिदेखि नै राति साढे ११ बजेको फ्लाइट सार्नुपरेको बताउनुभयो । उहाँले प्यासेन्जरहरूलाई मेल र फोन गरेर जानकारी गराएपनि फोन नउठाउने र मेल जाँच नगर्नेहरू समस्यामा परेको बताउनुभयो ।

मन्त्री किराँतीले युरोपियन युनियनको कालोसूचीमा देश करिब १३ वर्ष अघिदेखि रहेको भन्दै अब खुल्ने चरणतिर प्रवेश गरेको जिकिर गर्नुभयोे । १२ बुँदे चिठी पठाएको र १२ बुँदा पालना गरेको खण्डमा कालोसूचीबाट हट्ने बताउनुभयो ।