धनगढी । कैलालीको धनगढीमा जारी लिटल फ्लावर प्रिमियर लिग (एलपिएल) को आठौँ संस्करणअन्तर्गत सोमबार दोस्रो दिन सम्पन्न दुई खेलमा धनगढी क्रिकेट एकेडेमी र धनगढी स्पोर्ट्स क्लब विजयी भएका छन् । धनगढी क्रिकेट एकेडेमीले कैलाली मल्टिपल क्याम्पसलाई तथा धनगढी स्पोर्ट्स क्लबले कैलाली जिल्ला क्रिकेट क्लबलाई पराजित गर्दै प्रतियोगितामा विजयी सुरुवात गरेका हुन् । सोमबारको पहिलो खेलमा समूह ‘बी’ अन्तर्गत धनगढी क्रिकेट एकेडेमीले कैलाली मल्टिपल क्याम्पसलाई ४३ रनले पराजित गर्दै प्रतियोगिताको विजयी सुरुवात गरेको थियो । फाप्ला क्रिकेट मैदानमा निर्धारित १५ ओभरमा १२५ रनको लक्ष्य पछ्याएको कैलाली मल्टिपल क्याम्पसले पूरै ओभर ब्याटिङ गरे तापनि नौ विकेट गुमाएर ८१ रनमात्र बनाउन सक्यो ।
धनगढी क्रिकेट एकेडेमीका बलर निरज ऐरले चार विकेट लिँदै कैलाली मल्टिपलको इनिंग्स धरासायी बनाउनुभयो । प्लेयर अफ द म्याच घोषित ऐरले तीन ओभरमा एक मेडन ओभर फाल्दै मात्र चार रन खर्चिनुभयो । अनिश अवस्थी र मान साउदले दुई–दुई विकेट लिनुभयो । कैलालीको ब्याटिङमा गणेश ऐरले सर्वाधिक १७ तथा पंकज चौधरीले १४ रन बनाउनुबाहेक अन्य ब्याटरले दोहोरो अंकमा रन बनाउन सक्नुभएन ।
यसअघि टस हारेर ब्याटिङ गरेको धनगढी क्रिकेट एकेडेमीले १५ ओभरमा ६ विकेट गुमाएर १२४ रन बनायो । धनगढीका लागि कप्तान विजय रानाले ओपनिङ ब्याटिङ गर्दै सर्वाधिक ४१ रन योगदान दिनुभयो । जुन क्रममा उहाँले २६ बलमा पाँच चौका र एक छक्का प्रहार गर्नुभयो । रितिक थापाले अविजित ३७ रन बनाउनुभयो । जुन क्रममा ३० बलमा पाँच चौका र एक छक्का प्रहार गर्नुभयो । निरज ऐरले १० बलमा एक चौका र दुई छक्का मद्दतले २१ रन बनाउनुभयो । कैलालीका बलर अभिषेक कुँवर, लोकेन्द्र खनाल र दीप कपडेलले दुई-दुई विकेट लिनुभयो ।
सोमबार दोस्रो खेलमा समूह ‘ए’ अन्तर्गत धनगढी स्पोर्ट्स क्लबले कैलाली जिल्ला क्रिकेट क्लबलाई ७२ रनले पराजित ग¥यो । धनगढी स्पोर्ट्सले दिएको १६७ रनको लक्ष्य पछ्याएको कैलाली जिल्लाले १५.२ ओभरमा ९४ रनमा सबै विकेट गुमायो ।
कैलालीको ब्याटिङमा दीपक टमाटाले सर्वाधिक ३३ रन तथा विनोद नाथ र नरेन साउदले समान १३ रन योगदान दिनुभयो । बलिङमा भोजराज भट्ट र दीपक चन्द ठकुरीले तीन-तीन विकेट लिनुभयो भने नारायण जोशीले दुई विकेट लिनुभयो । दीपकले चार ओभरमा एक मेडन गर्दै १० रन तथा भोजले तीन ओभरमा २० रन खर्चिनुभयो । प्लेयर अफ द म्याच घोषित नारायणले ३.२ ओभरमा १२ रन खर्चिनुभयो ।
यसअघि टस जितेर ब्याटिङ गरेको धनगढी स्पोर्ट्स क्लबले निर्धारित २० ओभरमा ६ विकेट गुमाएर १६६ रन बनायो ।
धनगढीका लागि ओपनर आयुष्मान बमले सर्वाधिक ४५ रन बनाउनुभयो । जुन क्रममा उहाँले ३४ बलमा पाँच चौका र दुई छक्का प्रहार गर्नुभयो । नारायण जोशीले २५ बलमा ३५ रन बनाउने क्रममा तीन चौका र दुई छक्का तथा आयुब चन्दले २९ बलमा ३२ रन बनाउने क्रममा तीन चौका र एक छक्का प्रहार गर्नुभयो । ओपनिङ गर्नुभएका सुनिल धमलाले २५ रन बनाउनुभयो ।
कैलाली जिल्ला क्रिकेट संघको बलिङमा नरेन साउदले सर्वाधिक तीन विकेट लिनुभयो । जुन क्रममा उहाँले चार ओभरमा २८ रन खर्चिनुभयो । राहुल केसी र डबल ऐरले एक-एक विकेट लिनुभयो ।
प्रतियोगिताअन्तर्गत आज (मंगलबार) दुई खेल सञ्चालन हुनेछन् । पहिलो खेल बिहान नौ बजे सुदूरपश्चिमाञ्चल एकेडेमी र घोडाघोडी क्रिकेट एकेडेमीबीच तथा दिउँसो १ बजे शुक्लाफाँटा ब्ल्याकबक्स र खप्तड इन्डोरबीच हुनेछ ।
लिटल फ्लावर स्पोर्ट्स क्लबको आयोजनामा सुरु भएको प्रतियोगिताको यो आठौँ संस्करण हो । प्रतियोगिताको उपाधि विजेताले दुई लाख ५५ हजार र उपविजेताले एक लाख २८ हजार रुपैयाँ पुरस्कार पाउनेछन् । प्रतियोगितामा काठमाडौं, रौतहट, दाङ, कैलाली र कञ्चनपुरका गरी १६ वटा टिमको सहभागिता रहेको छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच